ރޭޑިއަންޓް ސަލާމަތްވުން ވާނީ އުނދަގޫ ދަތުރަކަށް

"ރޭޑިއަންޓް ސްޕޯޓްސް ކަލްބަށް، ފުރުސަތު ދޭން ހަގީގަތުގައި ވެސް އެފްއޭއެމުން ބޭނުން ނުވަނީ."

މިއީ ފުޓްބޯޅައިގެ ހަރަކާތްތަކުން ސަސްޕެންޑް ކޮށްފައިވާ ނިއު ރޭޑިއަންޓްގެ ސަޕޯޓަރުންގެ ތެރެއިން އުފެދިގެން އައި ރޭޑިއަންޓް ކްލަބަށް އެފްއޭއެމްގެ ހައިސިއްޔަތު ނުދޭން ނިންމުމުން ނިއު ރޭޑިއަންޓްގެ ސަޕޯޓަރުން ބުނަމުންދާ ވާހަކަ އެވެ.

ހަގީގަތުގައި ވެސް އެފްއޭއެމް އަށް ހަޖަމް ނުވަނީ ހެއްޔެވެ؟ އެކަމަކު މިކަހަލަ މައްސަލަތަކުގައި މީގެ ކުރިން ފީފާގެ އެކި ކޮމިޓީތަކުން ނިންމާފައިވާ ނިންމުންތަކަށް ބަލާއިރު، ފުޓްބޯޅައިން ފުރުސަތު ހޯދުމަށް ރޭޑިއަންޓަށް ގިނަ މަރުހަލާތަކެއް ކަޑަތުކުރަން ޖެހޭނެ ކަމަށް ބެލެވެ އެވެ.

ގްރީސްގެ "އާރިޒް އެފްސީ" އަކީ އޭގެ އެއް މައްސަލަ އެވެ. އެގައުމުގެ "އާރިޒް ޓެސަލޮނީކީ އެފްސީ" އަށް ކުޅުނު ބްރެޒިލްގެ ޑިއޯގޯ ސިސްޓޮން އަށް ދޭން ޖެހިފައި ހުރި މުސާރަ، ދައްކަން "އާރިޒް އެފްސީ" އަށް، ފީފާގެ ޑިސިޕްލިނަރީ ކޮމިޓީން ނޮވެމްބަރު 2019 ގައި އެންގި އެވެ. ހަގީގަތުގައި ޑިސިޕްލިނަރީ ކޮމިޓީން "އާރިޒް" އަށް އެންގީ، އޭގެ ކުރިން ފީފާގެ ޑިސްޕިއުޓް ރިޒޮލިއުޝަން ޗެމްބާ (ފީފާ ޑީއާރްސީ) އިން އެންގި އެންގުމަށް އަމަލު ކުރުމަށެވެ.

މިއީ ގްރީސްގެ ފުޓްބޯޅައިގެ ތާރީހުގައި އެހެން ކްލަބަކުން ކުޅުންތެރިއެއްގެ ހައްގަށް އަރައިގެންފައިވުމުން، އެ ކުޅުންތެރިޔާގެ ހައްގު އަދާކުރުމަށް އަނެއް ކަލަބަކަށް އެންގި ފުރަތަމަ ފަހަރެވެ. އާރިޒް އެފްސީ އަކީ، 2015 ގައި ލިކުއިޑޭޝަނަށް ވެއްޓުނު، އާރިޒް ޓެސަލޮނީކީ އެފްސީގެ "ސްޕޯޓިން ސަކްސެސާ" އެއްކަމަށް ފާހަގަވެފައިވާ ކަމަށް ފީފާ ޑީއާރްސީން ނިންމި އެވެ.

ނިއު ރޭޑިއަންޓްގައި ވެސް އޮތީ ދަރަނީގެ މައްސަލަތަކެކެވެ.

ނިއު ރޭޑިއަންޓުގެ ކުރީގެ ކޯޗު، ބެނާޑޯ ޓަވަރޭޒް އަށް ދޭން ޖެހިފައި ހުރި ފައިސާ ދެއްކުމަށް ހަ ދުވަހުގެ މުއްދަތެއް ފީފާއިން ވަނީ އެ ކްލަބަށް ދީފަ އެވެ. އެ ޓީމަށް ކުޅުނު އަފްގާނިސްތާންގެ ޑިފެންޑަރު ޒޯހިބް އިސްލާމް ހާރޫން އަމީރީ އަށް ދޭން ޖެހިފައިވާ ފައިސާގެ މައްސަލަ ވެސް އޮތީ ފީފާގަ އެވެ. އޮންލައިން ނޫސް "ވަން" އަށް އަމީރީ ހުކުރު ދުވަހު ދީފައިވާ އިންޓަވިއުއެއްގައި ބުނެފައި ވަނީ ނިއު ރޭޑިއަންޓުގެ ސަޕޯޓަރުން އިތުރު ކްލަބެއް ހެދިކަން އެނގުމުން އޭނާގެ ވަކީލުން އެމައްސަލަ ފީފާއާ ހަމައަށް ގެންގޮސްފައިވާ ކަމަށެވެ.

ފީފާގެ ކޮމިޓީތަކުން، އެވެނި މިވެނި ކްލަބަކީ ސްޕޯޓިން ސަކްސެސާއެއް ކަމަށް ކަނޑައަޅއިފައި ހުރީ ހައްގު އުނިވެ ނުވަތަ ހައްގު ގެއްލިފައިވާ ކުޅުންތެރިޔަކު އެ މައްސަލަ ފީފާ އަށް ހުށަހެޅުމުންނެވެ. ފީފާގެ ކޮމިޓީން ރޭޑިއަންޓާ ބެހޭގޮތުން އެކަހަލަ ނިންމުމެއް ނިންމައިފައެއް ނެތެވެ. އެކަމަކު އެފްއޭއެމުން ބުނަނީ އޭއެފްސީން އެގޮތަށް އަންގާފައިވާ ކަމަށެވެ.

"ނިއު ރޭޑިއަންޓުގެ ދަރަންޏަށް ރޭޑިއަންޓުން ޒިންމާވާނަމަ އެކްލަބަށް އެފްއޭއެމްގެ މެންބަރުކަން ދިނުމާ މެދު އޭއެފްސީ އިއުތިރާޒެއް ނެތްކަމަށް އޭއެފްސީން ވަނީ އަންގާފައި،" މިދިޔަ ބުދަ ދުވަހު އެފްއޭއެމުން ބޭއްވި ޕްރެސް ކޮންފަރެންސްގައި ޑެޕިޔުޓީ ޖެނަރަލް ސެކްރެޓަރީ އަބްދުﷲ ޝިބާއު (ޝިބާ) ވިދާޅުވި އެވެ.

މި މައްސަލައިގައި ރޭޑިއަންޓުން ތިބި ސްޓޭންޑަށް ބަލާއިރު އެ ކްލަބުން ތިބީ މިކަމުގައި އެހާ ފަސޭހައިން ދޫކުރާ ގޮތަކަށް ނޫނެވެ. މައްސަލަ ހިފައިގެން އާބިޓްރޭޝަން މަރުހަލާ އަށް ދާނެ ކަމަށް އެކްލަބުން ބުނެ އެވެ.

ރޭޑިއަންޓަކީ ނިއު ރޭޑިއަންޓްގެ ސްޕޯޓިން ސަކްސެސާއެއް ކަމަށް އޭއެފްސީއާ ހަވާލާދީ އެފްއޭއެމުން ބުނަނީ ދެ ކުލަބްގެ ނަމާއި ލޯގޯ އާއި ކުލަތައް އެއްވަތަރުވެ، ކުރިން ނިއު ރޭޑިއަންޓުގެ ބޯޑުގައި މަސައްކަތް ކުރި އަހްމަދު ވާސިފް އާއި ޒަހީނުއްދީން ސައީދު އިންނެވުމުންނެވެ. ވާސިފް އާއި ޒަހީން އަކީ ނިއު ރޭޑިއަންޓް ސަސްޕެންޑް ކުރި ފަހުން އެކަލްބަށް އިންތިހާބުވި ބޯޑުގައި މަގާމުތައް އަދާކުރެއްވި ބޭފުޅުންނެވެ.

އާބިޓްރޭޝަން މަރުހަލާ އަށް ގޮސްގެން ރޭޑިއަންޓަށް ކާމިޔާބުވުން އެއީ ދުރު ކަމެއްގެ ގޮތުގައި، މިކަހަލަ މައްސަލަތަކުގައި ފީފާގެ ކޮމިޓީތަކުން ނިންމާފައިވާ ނިންމުންތަކުން ހާމަވެ އެވެ. ފަހަރެއްގައި އާބިޓްރޭޝަން މަރުހަލާގައި ކާމިޔާބު ވެސް ވެދާނެ އެވެ.

ގަތަރުގެ ކުރީގެ ކްލަބް، އަލް ޖައިޝް އަށް މައްސަލަތައް ކުރިމަތިވެ އެ ކްލަބްގެ ހަރަކާތްތެރިވުން ހުއްޓާލި އެވެ. ފަހުން ގަތަރުގެ އެހެން ކްލަބެއް ކަމަށްވާ އަލް ލެޚްވިޔާ އެފްސީ އާއި އަލް ޖައިޝް އެކުވެ އަލް ދުހައިލްގެ ނަމަށް އަލް ލެޚްވިޔާ ރީބްރޭންޑްކުރި އެވެ.

އަލް ޖައިޝް އިން މުސާރަ ދޭން ޖެހިފައިވާ ކުޅުންތެރިއެއް ކަމަށްވާ ނިލްމާ ޑަ ސިލްވާ މައްސަލަ ފީފާ އަށް ގެންދިޔަ އެވެ. އޭނާގެ ހުށަހެޅުމަކީ އަލް ދުހައިލް އަކީ އަލް ޖައިޝްގެ ސްޕޯޓިން ސަކްސެސާއެއް ކަަމަށެވެ. އެކަމަކު ފީފާގެ ޑިސިޕްލިނަރީ ކޮމިޓީން ނިންމީ އަލް ދުހައިލް އަކީ އަލް ޖައިޝްގެ ސްޕޯޓިން ސަކްސެސާއެއް ކަމަށް ކަނޑައަޅާނެ ހަމައެއް ނެތް ކަމަށެވެ.

މައްސަލައިގައި އެފްއޭއެމް ޖެހިލުންވުން

ރޭޑިއަންޓުން ތުހުމަތު ކުރަނީ، ނިއު ރޭޑިއަންޓްގެ ސަޕޯޓަރުންނާ މެދު އެފްއޭއެމުން ތަފާތުކުރުން ގެންގުޅޭ ކަމަށެވެ. އެކަމަކު އެފްއޭއެމުން އެކަން ދޮގު ކުރެ އެވެ. އޭއެފްސީން ނިންމާފައިވާ ނިންމުމުގެ ކޮޕީއެއް ހޯދަން ރޭޑިއަންޓުން އެދުމުން އެފްއޭއެމުން އެ މަރުހަލާ ވެސް ދިގު ދެންމި ކަމަށް ރޭޑިއަންޓުން ބުނެ އެވެ. ލިޔުން ހިއްސާ ކުރުމުގައި އޭއެފްސީން އިއުތިރާޒެއް ނެތް ކަމަށް ބުނިފަހުން ވެސް ރޭޑިއަންޓަށް ލިޔުން ދީފައި ވަނީ މާފަހުންނެވެ.

ރޭޑިއަންޓަކީ، ނިއު ރޭޑިއަންޓްގެ ސްޕޯޓިން ސަކްސެސާ އެއްކަމަށް އެފްއޭއެމުން ބުނަނީ އޭއެފްސީއާ ހަވާލާ ދިނުމަށް ފަހު އެވެ. އެފްއޭއެމް އަށް ފާޑުކިޔާ ފުޓްބޯޅައިގެ ކުރީގެ ހިންގުންތެރިޔަކު ބުނި ގޮތުގައި މައްސަލައިގައި އެފްއޭއެމް ފެންނަނީ ޖެހިލުންވެ ފަހަތު ފަޔަށް ބުރަވެފައިވާ ތަނެވެ.

"އޭއެފްސީއާ ހަވާލާ ދެނީ ކީއްކުރަންތޯ. ސީދީ އެފްއޭއެމް އަށް ވެސް ނިންމޭނެ. އެފްއޭ އަކީ ފީފާ އާއި އޭއެފްސީގެ ސްޓޭންޑް ވެސް ދަމަހައްޓަން ޖެހޭ ބައެއް،" އޭނާ ވިދާޅުވި އެވެ.

"އެކަމަކު އެފްއޭއެމް ފެންނަނީ ވަރަށް ބޮޑަށް ޖެހިލުންވެގެން އުޅޭތަން. ކޮންމެހެން އޭއެފްސީން ނުވަތަ ފީފާއިން އަންގަންދެން މަޑުކުރާކަށް ނުޖެހޭ. އެފްއޭއެމުން މިކަން ނިންމޭނެ."