ބާޖަމާލުއްދީންގެ އިމާރާތްތައް ތަޅާލަން 2.4 މިލިއަން

އަރަބިއްޔާ ސްކޫލުގެ އާ އިމާރާތުގެ މަސައްކަތް ފަށަން، ބާޖަމާލުއްދީންގެ އިމާރާތް ތަޅާލަން 2.4 މިލިއަން ރުފިޔާއަށް މިއަދު ބަޔަކާ ހަވާލުކޮށްފި އެވެ.

އެޑިއުކޭޝަން މިނިސްޓްރީގައި ބޭއްވި ރަސްމިއްޔާތެއްގައި އެ މަސައްކަތް ހަވާލުކުރީ ވެލްޓްރޭޑިން ޕްރައިވެޓް ލިމިޓެޑް ކިޔާ ކުންފުންޏަކާ އެވެ. ދައުލަތުގެ ބަޖެޓުން 2.4 މިލިއަން ހަރަދުކުރާ ގޮތަށް އެ މަސައްކަތް ހަވާލުކުރީ 75 ދުވަސް (ދެ މަހާއި ބައިގެ) ތެރޭގައި ނިންމާށެވެ.

މީގެ އަށް އަހަރު ކުރިން ބޭނުންކުރަން ފެށި އަރަބިއްޔާގެ އިމާރާތުގެ ތަނބުތަކުގައި ވަރަށް ބޮޑަށް ރެނދުލައި، ގެއްލުންވެފައި ހުރުމުން މިދިޔަ ޖެނުއަރީ މަހުން ފެށިގެން ދަރިވަރުންނަށް ވަގުތީ ގޮތުން ކިޔަވައިދެމުން އަންނަނީ ކުރިން ފޮރިން ފޮރިން މިނިސްޓްރީ ހިންގި އިމާރާތުގަ އެވެ.

ސަރުކާރުން ނިންމާފައިވަނީ ބާޖަމާލުއްދީން ބިމުގައި އަރަބިއްޔާ ސްކޫލްގެ އާ އިމާރާތް އަޅާށެވެ.

މި އަހަރުގެ ތެރޭގައި އަމަލީ މަސައްކަތް ފަށައި އަންނަ އަހަރުގެ ތެރޭގައި އަރަބިއްޔާގެ އާ އިމާރާތް ނިމޭނެ ކަމަށް މިނިސްޓްރީން ބުނެފައިވެ އެވެ.

އާ އިމާރާތުގެ އަމަލީ މަސައްކަތް ފަށަން ބާޖަމާލުއްދީން ބިމުގައި މިހާރު ހުރި އިމާރާތްތައް ތަޅާލާނެ ބަޔަކު ހޯދަން މިނިސްޓްރީން އިއުލާންކުރުމާ އެކު، 22 ފަރާތަކުން ކުރިމަތިލި އެވެ.

ބާޖަމާލުއްދީންގެ ނަމުން މަޝްހޫރުވި އިމާރާތަކީ ކުރީގެ ޖަމާލުއްދީން ސްކޫލެވެ. އެތަން ވަރަށް ބޮޑަށް ބާވެ، ހަލާކުވުމުން އެ ސްކޫލްގެ ދަރިވަރުންނަށް އެ އިމާރާތާ ޖެހިގެން އާ އިމާރާތެއް ހަދައިދީ ދަރިވަރުން ބަދަލުކުރި އެވެ.

އެ އަށް ފަހު، ބާ ޖަމާލުއްދީން އިމާރާތް ބޭނުންކުރީ ގައުމީ ޔުނިވާސިޓީގެ ކޯސްތައް ހިންގުމަށެވެ. ނަމަވެސް އެތަން ބޭނުންކުރުމަށް ރައްކާތެރި ނޫން ކަމަށް ބުނެ ކުރީގެެ ސަރުކާރުން އެމްއެންޔޫ އެތަނުން ބޭރުކުރި އެވެ. އޭގެ ފަހުން، އިލެކްޝަންސް ކޮމިޝަން (އީސީ) އިން އިންތިޚާބީ މަރުކަޒުގެ ގޮތުގައި ވެސް އެ ތަން ބޭނުންކުރަން ފެށި އެވެ.

އަރަބިއްޔާގެ އިމާރާތް އެޅުމަށް މިހާރު އެ ތަން ވެސް ވަނީ ހުސްކޮށްފަ އެވެ.