ބޮޑު ރާޅަކާ އެކު އަބްދުﷲ ފިތުނީ ދޯންޏަކާއި ކޮންޓެއިނަރެއްގެ މެދުގައި

މ. ކޮޅުފުށީ ބޭރުގައި މުދާ އުފުލާ ދެ ދޯނި އަޅަން އުޅުމުގެ ތެރޭގައި އަބްދުﷲ އަހުމަދު މަރުވީ ނެގި ބޮޑު ރާޅަކާ އެކު އޭނާ ހުރި ދޯންޏާއި ކައިރީގައި އޮތް އަނެއް ދޯނީގައި ހުރި ކޮންޓެއިނަރުތަކުގެ މެދުގައި ފިތިގެން ކަމަށް އާއިލާ އިން ބުނެފި އެވެ.

އިއްޔެ ހަވީރެއްހާއިރު އެ ހާދިސާ ހިނގީ ލިޓަސްގެ ދެ ދޯންޏެއްގައިި މުދާ ބަރުކޮށްގެންދަނިކޮށް ވަރަށް ބޮޑަށް ކަނޑުގަދަވެ ކޮޅުފުށީ ކައިރީ އޮންނަ ފަޅު ރަށެއް ކަމަށްވާ، ތުވަރުގެ ބޭރުގައި މަޑުކޮށްގެން އޮއްވާ އެވެ.

އެ ހާދިސާ ހިނގި ގޮތް ކިޔައިދެމުން، ބ. ހިތާދު އަށް އުފަން، އަބްދުﷲ އާ ދެބެންގެ ދެދަރި މީހަކު "މިހާރު" އަށް ބުނީ އަބްދުﷲ އަކީ އެތަނުން ދޯންޏެއްގައި މަސައްކަތް ކުރަމުން އައި ފަޅުވެރިއެއް ކަމަށާއި އެ ހާދިސާ ހިނގީ ދޯނި އެޅުމަށް ޓަޔަރެއް ބާލަން އުޅެނިކޮށް ނެގި ބޮޑު ރާޅަކާ އެކު ކައިރީގައި އޮތް އަނެއް ދޯނީގެ ކޮންޓެއިނަރުތަކުގައި އޭނާ ޖެހިގެން ކަމަށެވެ.

"އެއްކޮށް ދަތުރުކުރަމުންދިޔަ ދެ ދޯނި އެއީ. ވަރަށް ބޮޑަށް ގަދަވެގެން އެތަނުގައި މަޑުކޮށްފައި ދޯނި އަޅަންވެގެން ދޯނީގެ އެއް ފަރާތަށް ޓަޔަރެއް އެއްލަން އުޅެނިކޮށް ރާޅެއް ނެގީއޭ ބުނަނީ. އެ ރާޅުގައި އަނެއް ދޯނި އައިސް ޖެހެނީ އަބްދުﷲ ހުރި ދޯނީގައި. އެ ދޯންޏަކީ ތަންކޮޅެއް އުސްކޮށް އޮންނަ ދޯންޏަކަށްވާތީ އޭނާއާ އެކީގައި ގޮސް ޖެހެނީ އަނެއް ދޯނީގެ ކޮންޓެއިނަރުތަކުގައި،" އޭނާ ކިޔައިދިނެވެ.

ކޮންޓެއިނަރާއި ދޯނީގެ މެދުގައި ޖެހުނު ގޮތަށް 60 އަހަރުގެ އަބްދުﷲ ގެ ގައިގެ ތަންކޮޅެއް މަށައިގެން ދިއުން ފިޔަވައި މާބޮޑު އަނިޔާއެއް އޭނާގެ ބޭރު ފުށުން ފެންނާކަށް ނެތެވެ. އެކަމަކު މުލީ ހޮސްޕިޓަލުގެ މެނޭޖަރު އަހުމަދު ނާފިޒު ވިދާޅުވެފައިވާ ގޮތުން ފުލުހުންގެ އެދުމުގެ މަތިން ހެދި އެކްސްރޭ އިން ދައްކާ ގޮތުގައި އަބްދުﷲގެ މޭކަށިތައް ވަނީ ވަރަށް ބޮޑަށް ބިނދިފަ އެވެ.

ނާފިޒު ވިދާޅުވި ގޮތުގައި އިއްޔެ ހަވީރު 5:15 ގައި އެކަމުގެ ރިޕޯޓް ހޮސްޕިޓަލަށް ލިބުމާ އެކު އެމްއެންޑީއެފްގެ އުޅަނދެއްގައި ފަންސަވީހަކަށް މިނެޓްގެ ތެރޭގައި ވަނީ ދެ ނަރުހަކާއި މެޑިކަލް އޮފިސަރެއް އެ ސަރަހައްދަށް ފޮނުވައިފަ އެވެ.

އެކަމަކު އެތަނަށް ގޮސް ބެލިއިރު ވެސް އަބްދުﷲ އޮތީ ނިޔާވެފަ އެވެ.

ރޭގެ ވަގުތެއްގައި އޭނާގެ ހަށިގަނޑު މާލެ ގެނެސްފައި ވަނީ އޭނާގެ ހަތަރު ދަރިއަކާއި އަނބިމީހާގެ އިތުރުން އާއިލާގެ ގިނަ ބަޔަކު މާލޭގައި ތިބުމުންނެވެ. އަދި ތިނަދޫގައި ހުރި އޭނާގެ ދަރިފުޅު ވެސް މިހާރު މާލެ އައިސްފައިވާ ކަމަށް އާއިލާއިން ބުންޏެވެ.

މީގެ ކުރިން މަސްވެރިކަމުގައި އުޅުނު އަބްދުﷲ ސަޕްލައި ދޯނީގައި މަސައްކަތްކުރަން ފެށިތާ ދެ ވަރަކަށް އަހަރުވެދާނެ އެވެ.

އަބްދުﷲ ގެ މައްޗަށް ކުރާ ކަށުނަމާދު އޮތީ މިއަދު މެންދުރު ނަމާދަށް ފަހު އާސަހަރާ މިސްކިތުގަ އެވެ.