އެމެރިކާ އިން ޔޫކްރޭނަށް 39.8 ބިލިއަން ޑޮލަރު ދެނީ

އަސްކަރީ އަދި އިގްތިސާދީ ގޮތުން ޔޫކްރޭނަށް އެހީވުމުގެ ގޮތުން އެމެރިކާ އިން 39.8 ބިލިއަން ޑޮލަރު ދިނުމަށް، އެމެރިކާގެ ގާނޫނު ހަދާ މަޖިލީހުގެ ތިރިގެ، ހައުސް އޮފް ރެޕްރެޒެންޓެޓިވްސް އިން ފާސްކޮށްފި އެވެ.

ޔޫކްރޭނަށް އެހީވުމުގެ ބިލް، ގާނޫނު ހަދާ މަޖިލީހުގެ ތިރިގެ އިން މި ފާސްކުރީ، މިދިޔަ އެޕްރީލް މަހުގެ ތެރޭގައި އެމެރިކާގެ ރައީސް ޖޯ ބައިޑެން ހުށަހެޅުއްވި ބިލްގައި ކަނޑައަޅާފައިވާ އަދަދަށް ވުރެ، ހަތް ބިލިއަން ޑޮލަރު އިރުތުކޮށްފަ އެވެ. ރައީސް ބައިޑެން ހުށަހެޅުއްވި ބިލްގައި ކަނޑައަޅާފައި އޮތީ 33 ބިލިއަން ޑޮލަރު ދިނުމަށެވެ.

އޭގެ ތެރޭގައި، ޔޫކްރޭންގެ ސަލާމަތީ ކަންތައް ވަރުގަދަކުރުމަށް ދޭ ހަ ބިލިއަން ޑޮލަރާއި، އެމެރިކާ އިން ޔޫކްރޭނަށް މިހާތަނަށް ފޮނުވާފައިވާ ހަތިޔާރަށް އަގު ދެއްކުމަށްޓަކައި ދޭ 8.7 ބިލިއަން ޑޮލަރާއި، ޖާސޫސީ މައުލޫމާތު އެއްކުރުމުގެ މަސައްކަތަށް ދޭ 3.9 ބިލިއަން ޑޮލަރު ވެސް ހިމެނެ އެވެ. އެމެރިކާގެ ގާނޫނު ހަދާ މަޖިލީހުގެ ތިރިގެ އިން މި ބިލް ފާސްކުރީ، ދެ ޕާޓީގެ ވޯޓާ އެކުގަ އެވެ.

މި ބިލް ފާސްކުރުމާ ގުޅޭ ގޮތުން ތިރިގޭގެ ރައީސް ނެންސީ ޕެލޯސީ މެމްބަރުންނަށް ފޮނުއްވި ސިޓީއެއްގައި ވިދާޅުވެފައިވަނީ، މިހާރުގެ ހާލަތުގައި މުހިންމީ ވަގުތު ކަމަށާއި، އިންތިޒާރު ކުރެވެން މިހާރު ނެތް ކަމަށެވެ. ޔޫކްރޭނަށް ފޮނުވަން ފާސްކުރި މި އެހީން ދުނިޔެ އަށް ދޭ ވަރުގަދަ މެސެޖަކީ، ކާމިޔާބު ހާސިލު ކުރެވެންދެން، ޔޫކްރޭންގެ ރައްޔިތުންނާ އެކުގައި އެމެރިކާ ދެމިއޮތުމަށް ނިންމާފައިވާ ނިންމުމަށް އެއްވެސް ބަދަލެއް ނާންނަކަމެވެ.

ތިރިގޭގައި މި ބިލް ފާސްކުރުމަށް ވޯޓު ދެއްވީ 368 މެންބަރުންނެވެ. ބިލް ފާސްކުރުމާ ދެކޮޅަށް ވޯޓު ދެއްވީ 57 މެންބަރެކެވެ. ތިރިގެ އިން މި ބިލް ފާސްވުމާއެކު ދެން މި ބިލް ދާނީ ގާނޫނު ހަދާ މަޖިލީހުގެ މަތިގެ، ސެނެޓް އަށެވެ. ވެރިކަން ކުރާ ޑިމޮކްރެޓިކް ޕާޓީ އަށް ސެނެޓްގައި ލިބިފައިވަނީ ހަނި އަގުލަބިއްޔަތެއް ކަމަށް ވިޔަސް، މާގިނަ ބަހުސަކާ ނުލައި، ރިޕަބްލިކަން ޕާޓީގެ ވެސް ވޯޓާއެކު، މި ހަފުތާގެ ތެރޭގައި ނުވަތަ މިއަންނަ ހަފުތާގެ ކުރީކޮޅު ސެނެޓުން މި ބިލް ފާސްކުރާނެ ކަމަށް ބެލެވެ އެވެ.

ރަޝިޔާ ސިފައިން ޔޫކްރޭންގައި ކުރަމުންދާ ހަނގުރާމައިގައި، ރަޝިޔާ ސިފައިން ބަލިކުރުމަށްޓަކައި ޔޫކްރޭނަށް އަސްކަރީ ގޮތުން އެހީވުމަށް އެމެރިކާ ސަރުކާރުން ނިންމި ނިންމުމަށް، އެމެރިކާގެ ވެރިކަން ކުރާ ޑިމޮކްރެޓިކް ޕާޓީންނާއި އިދިކޮޅު ރިޕަބްލިކަން ޕާޓީން ވެސް ތާއީދުކުރެ އެވެ.