ވީއައިިއޭގެ މަޝްރޫއުތައް ރައީސް ބައްލަވާލައްވައިފި، ގިނަ މަޝްރޫއުތައް ނިމުމަކާ ގާތަށް

ވެލާނާ އިންޓަނޭޝަނަލް އެއާޕޯޓުގެ މަސައްކަތްތައް ހިނގަމުންދާ ގޮތް ރައީސް އިބްރާހިމް މުހައްމަދު ސޯލިހް މިއަދު ބައްލަވާލައްވައިފި އެވެ.

ރައީސް މިއަދު ހަވީރު ކުރެއްވި ޒިޔާރަތުގައި އެއާޕޯޓުގެ އާ ސީޕްލޭން ޓާމިނަލާއި ފަޔާ ސްޓޭޝަނާއި ޕެސެންޖާ ޓާމިނަލްގެ އިތުރުން ކާގޯ ޓާމިނަލާއި ފިއުލް ފާމްގެ މަސައްކަތް ކުރިއަށް ދާ ގޮތް ބައްލަވާލެއްވި އެވެ.

ރައީސް އޮފީހުން ބުނީ ސީޕްލޭން ޓާމިނަލްގެ މަސައްކަތުގެ 99.9 ޕަސެންޓް ނިމި، މިހާރު ކުރިއަށް ދަނީ އޮޕަރޭޓަރުންގެ ލައުންޖްތަކުގެ ފިޓްއައުޓް މަސައްކަތްތައް ކަމަށެވެ. އަދި އަލަށް ގާއިމްކުރާ ފިއުލް ހައިޑްރަންޓް ސިސްޓަމްގެ 85 ޕަސެންޓް ނިމިފައިވާއިރު ފިއުލް ފާމްގެ 95 ޕަސެންޓް މަސައްކަތްތައް ވެސް ނިމިފައިވާ ކަމަށް ރައީސް އޮފީހުން ބުންޏެވެ.

ރައީސް އޮފީހުން ބުނިގޮތުގައި ފިއުލް ފާމް މަޝްރޫއުގެ ދަށުން ގާއިމްކުރި ފިއުލިން ސްޓޭޝަންގެ މަސައްކަތް މިހާރު ވަނީ ނިމިފަ އެވެ. އަދި މި މަހު ފަހުކޮޅު އެ ސްޓޭޝަންގެ ބޭނުން ކުރަން ފަށާނެ އެވެ.

ކާގޯ ޓާމިނަލްގެ މަސައްކަތް ވެސް 93 ޕަސެންޓް މިހާރު ވަނީ ނިމިފަ އެވެ. ދެން އޮތީ އެތެރޭގައި ފެންސް ޖެހުމާއި ފިނިޝިންގެ މަސައްކަތްތަކާއި މެޝިނަރީ އިންސްޓޯލް ކުރުން ފަދަ ކަންކަމެވެ. އަދި ބައެއް ސާމާނު ލިބުމުގައި ދަތިތަކެއް ހުރުމުން އަންނަ ސެޕްޓެމްބަރު މަހު ހުރިހާ މަސައްކަތްތަކެއް ނިންމާލެވޭނެ ކަމަށް ރައީސް އޮފީހުން ބުންޏެވެ.

ޓާމިނަލާ އިންވެގެން ހަދަމުންދާ ކާގޯ ހާބަރުގެ މަސައްކަތުގެ 98 ޕަސެންޓް ނިމިފައިވާއިރު، އާ ޕެސެންޖާ ޓާމިނަލްގެ މަސައްކަތުގެ 30 ޕަސެންޓް ނިމި، އެ މަސައްކަތް ބާރަށް ކުރިއަށް ދާ ކަމަށް ރައީސް އޮފީހުން ބުންޏެވެ.