ފޯ ސީޒަންސްގެ އެޕްރެންޓިސް ޕްރޮގްރާމަށް ފަސްޓް ލޭޑީގެ ތައުރީފު

ފޯ ސީޒަންސް މޯލްޑިވްސް އިން ކޮންމެ އަހަރަކު ވެސަް ކުރިއަށް ގެންދާ އެޕްރެންޓިސް ޕްރޮގްރާމަށް ފަސްޓް ލޭޑީ ފަޒްނާ އަހްމަދު މިއަދު ތައުރީފު ކުރައްވައިފި އެވެ.

އެެއީ ޓޫރިޒަމް ދާއިރާ އިން ކުރިއަށް ދާން ބޭނުންވާ ޒުވާނުންނަށް އެ ދާއިރާއާ ގުޅޭ ތަފާތު ކޯސްތައް ފޯ ސީޒަންސްގެ ފަރާތުން ހިންގާ ޕްރޮގްރާމެކެވެ.

މި އަހަރުގެ ކޯސްތަކުން ދަސްވެނިވި ދަރިވަރުންނަށް ހަނދާނީ ލިއުން ދިނުމަށް އެމްއެންޔޫގައި ބޭއްވި ރަސްމިއްޔާތުގައި ފަޒްނާ ވަނީ ވޭތުވެ ދިޔަ 20 އަހަރު ދުވަހު ކާމިޔާބުކަމާއެކު އެޕްރެންޓިސް ޕްރޮގްރާމް ހިންގައިފައިވާތީ ފޯ ސީޒަންސްގެ މެނޭޖްމެންޓަށް މަރުހަބާ އާއި ޝުކުރު ދަންނަވައިފަ އެވެ.

އަދި މި އަހަރުގެ ޕްރޮގްރާމުން ދަސްވެނިވި ދަރިވަރުންގެ މަސައްކަތް ފާހަގަކުރައްވައި، މަރުހަބާ ދެންނެވި އެވެ.

"ވަރަށް ވެސް އުނދަގޫ ހާލަތެއްގައި ތިޔަ ކުދިން މަސައްކަތްކޮށް، ރަނގަޅު ކާމިޔާބެއް ހޯދައިފައި ވުމަކީ އަދުގެ ޒުވާނުންނަށް ދެވޭ ވަރަށް ވެސް އަގުހުރި މިސާލެއް" ދަސްވެނިވި ކުދިންނާ މުހާތަބު ކުރައްވަމުން ފަސްޓް ލޭޑީ ވިދާޅުވި އެވެ.

އެ ކަމަނާގެ ވާހަކަފުޅު ބޮޑަށް އަމާޒު ކުރެއްވީ "ލައިފް ލޯންގް ލާނިން" ނުވަތަ ކިޔެވުމަށް ފަހު، ލިބުނު އިލްމާއެކު ދިރިއުޅުމުގައި ލިބޭ ތަފާތު ތަޖުރިބާއިން ދަސްވާ ދަސްވުމަށެވެ.

"ދެމިހުރި ގޮތެއްގައި ކަންކަން ދަސްކުރާ މީހުންގެ ތެރެއިން އަބަދުވެސް ވާން ޖެހޭނެ. އަހަރެމެންގެ ތެރޭގައި ލައިފް ލޯންގް ލާނިން އަށަގެންނުމަށް އަބަދުވެސް މަސައްކަތް ކުރާށެވެ" ފަޒްނާ ވިދާޅުވި އެވެ.

އަދި އޭގެ މުހިންމު ކަމާއި އެ އިން ލިބޭ ފައިދާތައް ދަރިވަރުންނާ ހިއްސާ ކުރެއްވި އެވެ.

ފޯ ސީޒަންސް އެޕްރެންޓިސް މިއަހަރުގެ ޕްރޮގްރާމުން 40 ދަރިވަރަކު ދަސްވެނިވި އެވެ. އެ ކުންފުނިން އަންނަނީ 2001 ވަނަ އަހަރުން ފެށިގެން މި ސަރަހައްދުގެ އެކި ގައުމުތަކުގައި ޕްރޮގްރާމް ހިންގަމުންނެވެ.