މިފްކޯގެ ޕްރޮމޯޝަން ނިންމާލައިފި، އަގުތައް ބަދަލުވާނެ

މިދިޔަ ރޯދަމަހާ ދިމާކޮށް މިފްކޯއިން ފެށި "ފަސްމީރު އެންމެ މީރު" ޕްރޮމޯޝަން މިއަދު ނިމުމާ އެކު ކުރިން ބުނެފައިވާ ގޮތަށް އަގުތަކަށް ބަދަލު އަންނާނެ ކަމަށް އެ ކުންފުނިން ބުނެފިއެވެ.

މަހުގެ އަގާއި މަހުގެ ބާވަތްތައް އުފެއްދުމަށް ބޭރުން އިމްޕޯޓުކުރާ ރޯމެޓީރިއަލްގެ އަގުތައް ބޮޑުވެފައި ވާތީ އަގުތައް ބޮޑުވެދާނެ ކަމަށް މިފްކޯ އިން ކުރިން ވެސް އޮތީ ބުނެފަ އެވެ. މިފްކޯ އިން ވަނީ އަގުތައް އުފުލުނަސް ރޯދަ މަހުގެ ތެރޭގައި އެ ކުންފުނީގެ އަގުތަކަށް ބަދަލު ނުގެނެސް އެއްވަރެއްގައި ހިފަހައްޓާފަ އެވެ.

މިފްކޯއިން ކުރިއަށް ގެންދިޔަ ޕްރޮމޯޝަނަކީ ބައިވެރިންގެ މެދުގައި ނަގާ ގުރުއަތުން ހަފްތާ އަކު ކޮންމެވެސް އެއް ނަސީބުވެރި އަކަށް 5،000 ރުފިޔާގެ ބީއެމްއެލް ގިފްޓު ކާޑެއް ލިބޭ އަދި ޕްރޮމޯޝަން ނިމުމުން ހުރިހާ ބައިވެރިންގެ މެދުގައި ނަގާ ގުރުއަތުން ކޮންމެވެސް އެއް ނަސީބުވެރިއަށް 100،000ރ.ގެ ފައިސާގެ އިނާމެއް ދޭން ނިންމާފައިވާ ޕްރޮމޯޝަނެކެވެ.

މިފްކޯގެ މި ޕްރޮމޯޝަނަކީ މާލެ ސަރަހައްދުގެ މިފްކޯގެ ފިހާރަތަކާއި ފެލިވަރު، ކޫއްޑޫ އަދި އައްޑޫގައި ހުންނަ މިފްކޯ ސައިޓް ފިހާރަތަކުން ކުރިއަށް ގެންދިޔަ ޕްރޮމޯޝަނެކެވެ.