މިފްކޯ ފަސްމީރު ރޯދަ ޕްރޮމޯ: ބޮޑު އިނާމަކަށް 100،000ރ.

މިފްކޯއިން 100،000ރ. ގެ ފައިސާގެ އިނާމެއް ހުށަހަޅައި މި އަހަރުގެ ރޯދަ ޕްރޮމޯޝަން ފަށައިފި އެވެ.

"މިފްކޯ ފަސްމީރު ރޯދަ ޕްރޮމޯ"ގެ ނަމުގަ ފެށި އެ ޕްރޮމޯޝަނުގައި 100،000ރ. ގެ ފައިސާގެ އިނާމު ހުށަހަޅާފައި ވަނީ އެއް ވަނަ އަށެވެ. ދެ ވަނަ އަށް 45،000ރ. ގެ ފައިސާގެ އިނާމު ހުށަހަޅާފައި ވާއިރު ތިން ވަނަ އަށް ހުށަހަޅާފައި ވަނީ 25،000ރ. ގެ ފައިސާގެ އިނާމެވެ.

މި ޕްރޮމޯޝަނުގަ ބައިވެރިވެވޭނީ މިފްކޯގެ ފިހާރަތަކުން 200ރ. އިން މަތީގެ ވިޔަފާރިކުރާ ކަސްޓަމަރުންނަށެވެ. 200ރ. އިން މަތީގެ ކޮންމެ ވިޔަފާރިއަކަށް ޕްރޮމޯޝަނުގައި ބައިވެރިވުމަށް ކޫޕަނެއް ލިބޭނެ އެވެ.

ރޯދަ މަހަށް ހާއްސަކޮށް މިފްކޯއިން ފެށި ޕްރޮމޯޝަންގެ އިތުރުން މަސްދަޅު ޕެކުތަކެއް ވެސް އެ ކުންފުނިން ވަނީ ތައާރަފްކޮށްފަ އެވެ. އޭގެތެރޭގަ ހިމެނެނީ 6 މަސްދަޅު، 12 މަސްދަޅު، 24 މަސްދަޅު އަދި 48 މަސްދަޅުުގެ ޕެކުތަކެކެވެ.

މިފްކޯއިން ބުނި ގޮތުގައި ރޯދަ މަހަށް ހާއްސަކޮށް މަސްދަޅު ކޭހަށް ޑެލިވަރީ ހިދުމަތްދިނުމަށް އެ ކުންފުނިން މިހާރު ވަނީ ތައްޔާރުވެފަ އެވެ.

މިފްކޯގެ ޖެނެރަލް މެނޭޖަރު ސޭލްސް އެންޑް މާކެޓިން އަހުމަދު ޒާމް ވިދާޅުވި ގޮތުގައި މި އަހަރުގެ ރޯދަ މަހު ވެސް އެ ކުންފުނީގެ ފިހާރަތަކުން މަހާއި މަސްދަޅު އެއް އަގެއްގައި ހުސްވުމެއް ނެތި ލިބެން ހުންނާނެ އެވެ.

މި ޕްރޮމޯޝަންގައި މިފްކޯގެ ކޮންމެ ފިހާރައަކުން ވިޔަފާރިކޮށްގެން ވެސް ބައިވެރިވެވޭނެ އެވެ.

މިފްކޯގެ އުފެއްދުންތައް ލިބެން ހުންނާނީ މާލެ އާއި ހުޅުމާލެ ފޭސް 1 އަދި 2ގެ މިފްކޯ ފިހާރަތަކުގެ އިތުރުން އައްޑޫ ފިޝަރީޒް ކޮމްޕްލެކްސް އާއި ކޫއްޑޫ ފިޝަރީޒް ކޮމްޕްލެކްސް އާއި ފެލިވަރު ފިޝަރީޒް ކޮމްޕްލެކްސްގަ އެވެ.