ހައި ކޯޓުގެ ފަނޑިޔާރު ކަމަށް އިސްގާޒީ ހުޒައިފާ އައްޔަން ކުރަނީ

ހައި ކޯޓުގެ ފަނޑިޔާރު ކަމަށް ފެމިލީ ކޯޓުގެ އިސްގާޒީ ހުޒައިފާ މުހައްމަދު އައްޔަން ކުރަން ނިންމައިފި އެވެ.

ހައި ކޯޓުގެ ފަނޑިޔާރުން ބެންޗުން ހުސްވެފައިވާ ތިން މަގާމުގެ ތެރެއިން އެއް މަގާމަށް ކުރިމަތިލާން ހުޅުވާލުމުން ކުރިމަތިލެއްވީ ހުޒައިފާގެ އިތުރުން ވަކީލެކެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން މިއަދު ނެރުނު ބަޔާނެއްގައިވަނީ ހައި ކޯޓުގެ ފަނޑިޔާރު ކަމަށް ހުޒައިފާ އައްޔަން ކުރަން ނިންމީ އޭނާއަކީ "ހައިލީ ރެކޮމެންޑެޑް" ބޭފުޅެއްކަމަށް ވާތީ އެ ކޮމިޝަންގެ އިއްޔެ ބޭއްވި ޖަލްސާއިން ކަމަށެވެ.

އިސްގާޒީ ހުޒައިފާއަކީ 2007 ވަނަ އަހަރު ރާއްޖޭގައި ފަނޑިޔާރު ކަމަށް ފުރަތަމަ އައްޔަންކުރި އަންހެން ދެ ބޭފުޅުންގެ ތެރެއިން އެއް ބޭފުޅާ އެވެ. އޭރުއްސުރެން ފެށިގެން އޭނާ މަސައްކަތް ކުރެއްވީ ފެމިލީ ކޯޓުގަ އެވެ. އެ ކޯޓުގެ އިސްގާޒީ ކަމަށް އޭނާ އައްޔަންކުރީ މިއަހަރު ކުރީކޮޅެވެ.

ހައި ކޯޓުގެ ބެންޗުން މަގާމެއް ހުސްވީ އެ ކޯޓުގެ ފަނޑިޔާރު އަލީ ސަމީރު އިސްތިއުފާ ދެއްވުމުންނެވެ. އަދި މަގާމުން ވަކިކުރަން ޖޭއެސްސީން މަޖިލީހަށް ފޮނުވުމުން އިސްތިއުފާ ދެއްވި ފަނޑިޔާރަކާއި މަޖިލީހުން ފާސްކޮށްގެން މަގާމުން ހައި ކޯޓުގެ ފަނޑިޔާރުކަމުން ވަކިކުރި ދެ ބޭފުޅުންގެ މަގާމު އަދިވެސް ހުސްކޮށް އެބައޮތެވެ.