ޔޯގާއާ ބެހޭ ފަތުވާ ނެރެފައިވަނީ އަމަލުކުރާ އިޖުރާއަތާ ހިލާފަށް: އިސްލާމިކް މިނިސްޓްރީ

ޔޯގާ ހެދުން އިސްލާމީ ޝަރީއަތާ ހިލާފު ކަމަށާއި އެކަން ކުރާ ފަރާތްތައް ދެނެގަނެ ފިޔަވަޅު އަޅައިދިނުމަށް އެދި އިސްލާމިކް މިނިސްޓްރީން ފުލުހުންނަށް ފޮނުވި ސިޓީއަކީ ޔޯގާ ދުވަހާ ގުޅިގެން ފޮނުވި ސިޓީއެއް ނޫން ކަމަށާއި އޭގައި ނެރެފައިވާ ފަތުވާ އަކީ އެފަދަ ކަންކަމުގައި އަމަލުކުރާ އުސޫލުތަކާ ހިލާފަށް ނެރެފައިވާ ފަތުވާއެއް ކަމަށް އެ މިނިސްޓްރީން މިއަދު ބުނެފި އެވެ.

އިސްލާމިކް މިނިސްޓްރީން ނެރުނު ނޫސްބަޔާނެއްގައި ބުނީ މި މަހު 15 ގައި ފޮނުވި ސިޓީގައި ގޯޔާއާ ބެހޭ ގޮތުން ނެރެފައިވާ ފަތުވާ އަކީ މިފަދަ ކަންކަމުގައި އަމަލުކުރަން ކަނޑައަޅާފައިވާ އޮންނަ އުސޫލާ ހިލާފަށް ނެރުނު ފަތުވާއެއް ކަމަށް ވާތީ ޔޯގާގެ ޝަރުއީ ހުކުމާމެދު ދިވެހިރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުގެ ތަފުސީލީ ފަތުވާއެއް ހޯދުމަށް ފަހު އާންމުކުރާނެ ކަމަށެވެ.

އިސްލާމިކް މިނިސްޓްރީގެ ސީނިއާ އެގްޒެކެޓިވް ޑިރެކްޓަރު ހިޝާމް އަހްމަދު ސޮއިކުރައްވައި ޕޮލިސް ކޮމިޝަނަރު މުހައްމަދު ހަމީދަށް ފޮނުވި އެ ސިޓީގައި ވަނީ މެޑިޓޭޓް ކުރަން ނުވަތަ ކަސްރަތެއްގެ ގޮތުގައި ރާއްޖޭގައި އެކި ބަލިތަކަށް ޝިފާ ހޯދުމުގެ ނަމުގައި ޔޯގާ ހަދަމުންދާ ކަމަށާއި އެއީ މުސްލިމުންގެ މައްޗަށް ހަރާމް ކޮށްފައިވާ ކުޅިވަރެއް ކަމަށް މިސްރާއި މެލޭޝިއާގެ ފަތުވާދޭ މަޖިލީހުން ފަތުވާ ނެރެފައިވާ ކަމަށެވެ.

މެޑިޓޭޝަން ހިމެނެނީ ހިންދޫ އަޅުކަމެއް ކަމުގައިވާ ޔޯގާގެ ތެރޭގައި ކަމަށް ވާތީ އެކަން އިސްލާމީ ޝަރީއަތާ ހިލާފު ކަމަށާއި ދީނީ އެއްބައިވަންތަކަން ހިމާޔަތް ކުރުމާ ބެހޭ ގާނޫނުގެ ދަށުން ޔޯގާ ހެދުން މަނާވާނެ ކަމަށް ވެސް ސިޓީގައި ބުނެފައިވެ އެވެ.

ސިޓީގައި ސޮއިކުރައްވާފައިވާ ހިޝާމް އަކީ މިދިޔަ ވެރިކަމުގައި އިސްލާމިކް މިނިސްޓްރީގެ ފަރާތުން ކޯޑިނޭޓަރެއްގެ ގޮތުގައި، އައްޑޫއަށް އެ މިނިސްޓްރީގެ އެންމެ އިސްބޭފުޅެއްގެ ގޮތުގައި ހަމަޖެއްސި ބޭފުޅެކެވެ. އެކަމަކު އޭރުގެ ރައީސް އަބްދުﷲ ޔާމީންގެ ސަރުކާރުގެ ފަހުކޮޅު ސަރުކާރަށް ފިއްތުންތައް ބޮޑުވި ވަގުތު ފެބްރުއަރީ 2018 ގައި އޭނާ އިސްތިއުފާ ދެއްވީ އެވެ. އެކަމަކު އަނެއްކާވެސް މި ސަރުކާރުން އިސްލާމިކް މިނިސްޓްރީއަށް އޭނާ އައްޔަންކުރެއްވީ އެވެ.

މިދިޔަ އަންގާރަ ދުވަހުގެ ހެނދުނު 6:30 ހާއިރު ގަލޮޅު ދަނޑުގައި ޔޯގާ ހަރަކާތް ކުރިއަށް ދަނިކޮށް ބަޔަކު ވަދެގަނެ ޔޯގާ ހަދަން ތިބި މީހުންނަށް އިންޒާރު ދީ ތަކެއްޗަށް ގެއްލުންދީފަ އެވެ. އެ މައްސަލާގައި މިހާތަނަށް 19 މީހަކު ވަނީ ހައްޔަރުކޮށްފަ އެވެ. ބޭރު ގައުމުތަކުގެ ޑިޕްލޮމޭޓުން ވެސް ތިއްބާ ހިންގި މި ހަމަނުޖެހުން އަންނަނީ ސީރިއަސް މައްސަލައެއްގެ ގޮތުގައި ބަލަމުންނެވެ.