އެސްޓީއޯގެ ރޭޑިއޯގްރަފީ ކޯސް އަންނަ ސެޕްޓެމްބަރު މަހު ފަށަނީ

ރޭޑިއޯގްރަޕީ ދާއިރާ އިން ދިވެހިން ތަމްރީންކުރަން އެސްޓީއޯ އިން ތައާރަފްކުރި ރޭޑިއޯގްރަފީ ކޯސް އަންނަ ސެޕްޓެމްބަރު މަހު ފަށަން ނިންމައިފި އެވެ.

އެ ކުންފުނިން ފީ ދައްކައިދޭ ގޮތަށް ހިންގާ ލެވެލް ފަހެއްގެ ރޭޑިއޯގްރަފީ (ޑިޕްލޮމާ) ކޯހަކީ އެލައިޑް ހެލްތު ކައުންސިލާއި އެމްކިއުއޭ ގަބޫލުކުރާ، އެ އިދާރާތަކުގެ ހުއްދަ ލިބިފައިވާ ކޯހެކެވެ. މި ކޯސް ކުރިއަށް ގެންދަނީ އެ ކުންފުނީގެ އިތުރުން ހެލްތު މިނިސްޓްރީ އާއި މޯލްޑިވްސް ނެޝަނަލް ޔުނިވާސިޓީ ގުޅިގެންނެވެ.

ކޯހުގެ ފުރަތަމަ ބެޗަށް 25 ދަރިވަރުން ހޮވާނެ އެވެ.

ކޯސް ކުރިއަށް ގެންދަން ހަމަޖެހިފައިވަނީ އެސްޓީއޯގެ ޓްރެއިނިން އިންސްޓިޓިއުޓް އަދި މިދިޔަ އަހަރުގެ ޖޫން މަހު ޖެނެރަލް އިލެކްޓްރޯނިކް (ޖީއީ) ހެލްތު ކެއާއާ ގުޅިގެން ހުޅުވި އެސްޓީއޯ ޖީއީ ސްކިލް ލެބްގަ އެވެ. އެ ކޯހުގެ ދަށުން ދެ އަހަރުގެ ކިޔެވުމާ އެކު ހަ މަސްދުވަހުގެ އިންޓާންޝިޕެއް ފުރިހަމަކުރަން ޖެހެ އެވެ.

ކޯހުގައި ބައިވެރިވެވޭނީ އޭލެވެލް ސައިންސް ސްޓްރީމްގެ ދެ މާއްދާއިން ފާސްވެފައި ތިބި ދަރިވަރުންނަށެވެ.

ރޭޑިއޯގްރަފީ ކޯސް ރަސްމީކޮށް ތައާރަފްކޮށްފައި ވަނީ މިދިޔަ އަހަރުގެ އޭޕްރީލް މަހުގެ ތެރޭގަ އެވެ. އެ ދާއިރާ އަކީ މުސާރަ ރަނގަޅު، ދިވެހިން ގަޔާވާނެ މުހިންމު ދާއިރާއެއް ކަމަށާއި ކުރިމަގުގައި ރޭޑިއޯގްރަފީ ދާއިރާއިން ގިނަ ދިވެހިން ފެނުމަށް އުންމީދުކުރައްވާ ކަމަށް އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވަނީ ވިދާޅުވެފަ އެވެ.