ވިއްސާރައިގައި ލިބުނު ގެއްލުން މަރާމާތުކުރުމަށް ޖޯލި މޯލްޑިވްސް ވަގުތީ ގޮތުން ބަންދުކޮށްފި

ރާއްޖެ އަށް މިހާރު ކުރަމުންދާ ވިއްސާރާގައި 'ޖޯލި މޯލްޑިވްސް' ގެ ވޯޓާ ވިލާގެ ފާލަން ވެއްޓި ލިބުނު ގެއްލުންތައް މަރާމާތުކުރުމަށްޓަކައި އެ ރިސޯޓު ވަގުތީ ގޮތުން މިއަދު ބަންދުކޮށްފި އެވެ.

ރ. މުރުވަންދޫގައި ހިންގާ ޖޯލި މޯލްޑިވްސް ރިސޯޓްގައި ރޭ ހިނގި އެ ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.

"ރަށުގައި އެ ވަގުތު ތިބި ހުރިހާ އެންމެންގރ ހާލު ރަނގަޅު" ޖޯލި މޯލްޑިވްސް އިން ނެރުނު ބަޔާނެެއްގައި ބުންޏެވެ.

އެ ރިސޯޓުގައި ތިބި ހުރިހާ ގެސްޓުން ރ. ބޮޑުފުށީގައި ހިންގާ 'ޖޯލި ބީންގް' ރިސޯޓަށް ބަދަލުކޮށް، މަރާމާތުގެ މަސައްކަތް ފަށާފައިވާ ކަމަށް ވެސް ބުންޏެވެ.

ލިބިފައިވާ ގެއްލުންތައް އެއްކޮށް މަރާމާތުކުރުމަށް ފަހު އަލުން އެ ރިސޯޓު ހުޅުވަން ހަމަޖެހިފައިވަނީ އަންނަ ސެޕްޓެމްބަރު މަހު އެވެ.

މާލެ އިން ފުރައިގެން ސީޕްލޭންގައި 45 މިނެޓް ތެރޭގައި ދެވޭ ޖޯލި މޯލްޑިވްސްގައި 73 ވިލާ ހުރެ އެވެ. އެ ރިސޯޓު ހުޅުވާފައިވަނީ 2018 ވަނަ އަހަރު އެވެ