ޕީއެސްޖީން އަހަންނާ މެދު ގެންގުޅޭ ޕްލޭނެއް ނޭނގޭ: ނޭމާ

ޓޯކިޔޯ (ޖުލައި 24) - އޭނާގެ ކުރިމަގާ މެދު ޕީއެސްޖީގެ ޕްލޭންތައް ހުރި ގޮތް ނޭނގޭކަމަށް އެ ޓީމުގެ ފޯވާޑް ނޭމާ ބުނެފި އެވެ.

ނޭމާ ދޫކޮށްލަން ޕީއެސްޖީން މަސައްކަތް ކުރާ ކަމަށް މިދިޔަ މަހު ފަހު ކޮޅު މީޑީއާތަކުން ރިޕޯޓް ކުރި އެވެ.

ޖަޕާންގައި މިހާރު ކުރިއަށްދާ ޕްރީ ސީޒަން ޓްރޭނިންގައި އެ ގައުމުގެ އުރަވާ ރެޑް ޑައިމަންޑްސް އާ ދެކޮޅަށް ޕީއެސްޖީ ރޭ ކުޅުނު މެޗުގެ ދެވަނަ ހާފުގައި ނޭމާ ކުޅުނެވެ. މެޗަށް ފަހު އޭނާ ބުނީ ޕީއެސްޖީގައި ހުންނަން އޭނާ ބޭނުންވާ ކަމަށެވެ.

"އަދި މިހާތަނަށް ކްލަބުން އަހަންނަށް ވަކި އެއްޗެއް ނާންގާ. އެހެންވީމަ އަހަންނަކަށް ނޭނގޭ ކްލަބްގެ ޕްލޭންތައް އަހަންނާ މެދު ހުރީ ކިހިނެއް ކަމެއް،" ނޭމާ، 30، ބުންޏެވެ.

އޭގެ ފަހުން، މެޗުގެ ޕޯސްޓް މެޗު ޕްރެސްގައި ވާހަކަ ދައްކަމުން ޕީއެސްޖީގެ އާ ކޯޗު ކްރިސްޓޮފް ގަލްޓިއޭ ބުނީ ބްރެޒިލްގެ ފޯވާޑް ޓީމުގައި ހުންނާނެ ކަމާ މެދު ޔަގީންކޮށް އެއްޗެއް ބުނަން ނޭނގޭ ކަމަށެވެ.

އެކަމަކު ޕްރީ ސީޒަން ޓްރޭނިން ފެށި ފަހުން ވެސް ނޭމާ ވަރަށް ރަނގަޅަށް މަސައްކަތް ކުރަމުން އަންނަ ކަމަށް ގަލްޓިއޭ ބުންޏެވެ.

"އޭނަ ވެސް ހުރީ އަހަންނާ މެދު ހިތްހަމަ ޖެހިފަ. އަދި އޭނާ ހުރީ ވަރަށް ފިޓްކޮށް،" ގަލްޓިއޭ ބުންޏެވެ.

"ކުރިއަށް އޮތް ދުވަސްތަކުގައި ވާނެ ގޮތެއް ނޭނގެ. ޓްރާންސްފާ ޕީރިއަޑް ނިމުމުގެ ކުރިން ވެސް ވާނެ ގޮތެއް ނޭނގޭ. އެކަމާ އެއް ވެސް ވަރަކަށް އަހަރެން އޭނާ އާ ވާހަކައެއް ނުދައްކަން."

އިނގިރޭސި ޗެމްޕިއަން، މެންޗެސްޓާ ސިޓީން ނޭމާ ގެންދަން މަސައްކަތް ކުރާ ކަމަށް ކުރިން މީޑިއާ ތަކުން ރިޕޯޓް ކުރި އެވެ. އެކަމަކު ސިޓީގެ ކޯޗު ޕެޕް ގާޑިއޯލާ ވަނީ އެ ވާހަކަތައް ދޮގު ކޮށްފަ އެވެ.