ރާއްޖެއިން މަންކީ ޕޮކްސް އަށް ޝައްކުވި މީހާ ނެގެޓިވްވެއްޖެ

ދުނިޔޭގައި ހަލުކަމާއެކު ފެތުރެމުންދާ މަންކީ ޕޮކްސް ކަމަށް ޝައްކު ކުރެވިގެން ރާއްޖެއިން ޓެސްޓު ކުރި ބިދޭސީ މީހާ އެ ބައްޔަށް ނެގެޓިވް ވެއްޖެ އެވެ.

ހެލްތު މިނިސްޓްރީގެ އޮފިޝަލަކު "މިހާރު" އަށް ވިދާޅުވީ އެ ބަލީގެ އަލާމަތްތައް ހުރެގެން ޓެސްޓު ކުރި މީހާގެ ނަތީޖާ ނެގެޓިވްވެގެން އޭނާ މިހާރު ހޮސްޕިޓަލުން ދޫކޮށްލާފައިވާ ކަމަށެވެ.

"ރާއްޖޭގައި މިވަގުތު މަންކީ ޕޮކްސްގެ އެއްވެސް ކޭސްއެއް ނެތް،" އޭނާ ވިދާޅުވި އެވެ.

މީގެ ކުރިން ވެސް އެ ބައްޔަށް ޝައްކުވާ އަލާމާތްތަކެއް ފެނިގެން މީހުން ރާއްޖެއިން ޓެސްޓްކުރި އެވެ. ނަމަވެސް އޭނާ ވެސް ވަނީ މަންކީ ޕޮކްސް އަށް ނެގެޓިވް ވެފަ އެވެ.

އެކަމާ ގުޅޭ ގޮތުން ހެލްތު ޕްރޮޓެކްޝަން އެޖެންސީ (އެޗްޕީއޭ) ބުނެފައި ވަނީ މިވަގުތު މަންކީ ޕޮކްސް އަށް ޓެސްޓްކުރެވޭނެ ގޮތްތަކާއި ފަރުވާކުރެވޭނެ ބޭހާއި ބަލިން ރައްކާތެރިވުމަށް ދެވޭނެ ވެކްސިން ފަދަ ވަސީލަތްތައް ވަރަށް މަދު ކަމަށާއި ނަމަވެސް ބަލި ފެތުރެން ފެށުމާ އެކު މޮނިޓާކޮށް އެ ބައްޔާ ގުޅިގެން ރާއްޖެއިން ވާންޖެހޭ ތައްޔާރީތައް ފަށާފައި ކަމަށެވެ.

"ސާވެއިލެންސް ހަރުދަނާކުރުމާއި ބަލި ޖެހޭ މީހުންނަށް ފަރުވާކުރުމާ ބެހޭ ގައިޑްލައިންތައް ކަނޑައެޅުން ފަދަ މަސައްކަތްތަކާ އެކު ވެކްސިނާއި ބޭހާއި ލިބޭނެ ގޮތްތައް މިދަނީ ބަލަމުންނެވެ،" އެޗްޕީއޭ އިން ބުންޏެވެ.

މަންކީޕޮކްސްގެ އަލާމާތްތައް:

- ހުން އައުން، ގައިގައި ރިއްސުން، ވަރުބަލިވުން، ގޮށްލުން.

- ހަމުގައި ބިހި ނެގުން (މި އައުޓްބްރޭކްގައި ގިނައިން ފެންނާނީ ކުރިމަތިފަރާތާއި ފުރަގަސް ފަރާތާއި އަނގައިގެ ވަށައިގެން ބިހިނެގުން.

- ބިހިތައް ފުރަތަމަ ނަގާއިރު ހުންނާނީ ފަތިކޮށް. އެއަށް ފަހު ފެންފޮޅަށްވެ ފަޅައިގެންގޮސް ކުރަލާނެ.

- ހުން އައުންފަދަ އަލާމާތްތަކުން ފެށިގެން ގޮސް ބިހި ނަގާ، ކުރަލާ އަދި ކުރައިގެ އާ ހަން އުފެދި ކުރަ ވެއްޓެންދެން ބަލި ޖެހޭ މީހާގެ ފަރާތުން އެހެން މީހުންނަށް ބަލި ޖެހުމުގެ ފުރުސަތު އޮވޭ.