ޑެންގީ ހުން ޖެހިގެން ދެ ކުއްޖަކު އައިސީޔޫގައި

ޑެންގީ ހުން ޖެހިގެން ހާލު ބޮޑުވި ދެ ކުއްޖަކަށް އައިޖީއެމްއެޗުގެ އައިސީޔޫގައި ފަރުވާ ދޭން ފަށައިފި އެވެ.

އެ ހޮސްޕިޓަލްގެ ކުޑަކުދިންގެ ބަލިތަކުގެ ޑޮކްޓަރު، ޑރ. އަހުމަދު ފައިސަލް ވިދާޅުވީ ޑެންގީ ހުން ޖެހިގެން ފަރުވާދެމުން އަންނަ ދެ ކުދިންގެ ހާލު ރަނގަޅުވަމުން އަންނަ ކަމަށެވެ. އިތުރު ތަފްސީލެއް ނުދެއްވަ އެވެ.

އެ ތަނުން އެއް ކުއްޖަކީ 11 މަހުގެ ކުއްޖެކެވެ.

ޑެންގީ ހުން ޖެހިގެން މި ފަހުން ކުޑަ ކުއްޖަކު ނިޔާވެފައިވެ އެވެ.

މިއީ ވިއްސާރަ ދުވަސްވަރަކަށް ވާތީ މި ދުވަސްވަރު ޑެންގީ ހުން އިތުރެވެ. މަދިރިން ރައްކާތެރިވުމަށް ހަށިގަނޑު ރަނގަޅަށް ނިވާވާ ގޮތަށް ހެދުން އަޅާ މަދިރި ލޯޝަން ފަދަ ތަކެތި ބޭނުން ކުރުމަށް އެޗްޕީއޭ އިން ވަނީ އިލްތިމާސްކޮށްފަ އެވެ. އަދި ފަތިސްގަޑި އާއި އިރުއޮއްސޭ ވަގުތު ގޭގެ ދޮރުތައް ލައްޕާ މަގު މައްޗަށް ފެން ހެދޭނެ ގޮތަށް ފުޅިފަދަ ތަކެތި އުކާނުލުން ފަދަ ކަންކަމަށް މި ދުވަސްވަރު ސަމާލުވުމަކީ ވެސް ޑެންގީ ހުން މަދުކުރެވޭނެ ކަމެއް ކަން ކަމާބެހޭ އިދާރާތަކުން ހަނދާންކޮށްދެ އެވެ.

ޑެންގީ ހުމުގެ އިތުރުން ވައިރަލް ހުމާއި ބޭރަށް ހިނގުން ވެސް މިދުވަސްވަރު ވަނީ އިތުރުވެފަ އެވެ.