އާމިރުގެ މިފަހަރުގެ ފިލްމު ވެސް ނުހިނގި

ބޮލީވުޑްގެ އެންމެ ކުޅަދާނަ އެއް އެކްޓަރު ކަމަށްވާ އާމިރު ޚާންގެ "ލާލް ސިންގް ޗައްދާ" އަށް ސިނަމާގައި މާބޮޑު ތަރުހީބެއް ލިބެމުން ނުދާ ކަމަށް ރިޕޯޓްތައް ބުނެފި އެވެ.

ހޮލީވުޑްގެ ހިޓު ފިލްމު، "ފޮރެސްޓް ގަމްޕް" ގެ ހިންދީ ރިމޭކް، "ލާލް ސިންގް ޗައްދާ" މިދިޔަ ބުރާސްފަތި ދުވަހު ރިލީޒްކުރީ ފިލްމު ބޮއިކޮޓް ކުރުމަށް ގިނަ ބަޔަކު ގޮވަމުންދިޔަ ދަނޑިވަޅެއްގަ އެވެ.

ފިލްމު ޓްރޭޑް އެނަލިސްޓެއް ކަމަށްވާ ތަރަން އާދާޝް ބުނެފައިވާ ގޮތުގައި ފިލްމަށް ފުރަތަމަ ދުވަހު ލިބިފައި ވަނީ 12 ކްރޯޑް ރުޕީސް އެވެ. އެއީ ހައިރާންވާ ވަރުގެ ދަށް އަދަދެއް ކަމަށް އޭނާ ބުނެފައިވެ އެވެ.

ބޮލީވުޑް ހަންގާމާގައި ރިޕޯޓްކުރާ ގޮތުގައި މިއީ ފާއިތުވި 13 އަހަރުގައި އާމިރުގެ ފިލްމަކަށް އެންމެ ތަރުހީބު ކުޑަވި ފިލްމެވެ.

އެންމެ ފަހުން 2018 ގައި ރިލީޒްކުރި އާމިރުގެ "ތަގްސް އޮފް ހިންދޮސްތާން" އަކީ ވަރަށް ބޮޑު ފްލޮޕެކެވެ. އެކަމަކު އެ ފިލްމު އެޅުވި ދުވަހު އެކަނި ވެސް 52 ކްރޯޑް ރުޕީސް ލިބުނެވެ.

ލާލް ސިންގް ޗައްދާއަކީ ފްލޮޕަކަށް ވެދާނެ ކަމުގެ ބިރުހީވެފައި ވިޔަސް އެ ފިލްމަކީ ހިންދީ ސިނަމާގައި މިއަހަރު ރިލީޒްކުރި ފިލްމުތަކުގެ ތެރެއިން ފުރަތަމަ ދުވަހު ތިން ވަނައަށް އެންމެ ބޮޑު އާމްދަނީއެއް ލިބުނު ފިލްމެވެ. އެ ލިސްޓުގެ ކުރީގައި 14.1 ކްރޯޑު ރުޕީސްއާ އެކު އޮތީ ޒުވާން ތަރި، ކާތިކް އާރިޔަންގެ "ބޫލް ބުލައްޔާ 2" އެކެވެ. އަދި ތިން ވަނާގައި އޮތީ ބައްޗަން ޕާންޑޭ އެވެ. އެއީ 13.2 ކްރޯޑު ރުޕީސްއާ އެކު އެވެ.

ލާލް ސިންގް ޗައްދާއާ އެކު މިވަގުތު އަކްޝޭ ކުމާރުގެ "ރަކްޝާ ބަންދަން" ވެސް ސިނަމާގައި އެބަ ދައްކަ އެވެ.

ދެ ފިލްމުގެ ފެށުން ވެސް މާ ރަނގަޅަށް ނުދާތީ ސިނަމާތަކުގައި ޝޯ ދައްކާ މިންވަރު ވެސް މަދުކޮށްފައިވާ ކަމަށް ރިޕޯޓްތައް ބުނެ އެވެ.

އެ ދެ ފިލްމު ވެސް ރިލީޒްކޮށްފައި މިވަނީ ބޮލީވުޑްގެ ހައި ޕްރޮފައިލް ރިލީޒްތަކެއް ފެއިލްވަމުންދާ އަންނަ ވަގުތެއްގަ އެވެ. ސޯޝަލް މީޑިއާގައި ފިލްމުތައް ބޮއިކޮޓްކުރަން ގޮވުން ވެސް އިތުރެވެ.