އާދަޔާ ހިލާފު ސީޒަނުގައި ވެލެންސިއާ އިތުރު ތައްޓަކާ ދިމާލަށް

ޓީމުގެ އެންމެ މުހިއްމު ކުޅުންތެރިޔާ އަލީ އަޝްފާގް (ދަގަނޑޭ) އަށް އަނިޔާ އާއި ތަފާތު އެކި މައްސަލަތަކާ ހުރެ ސީޒަން ހުޅުވި މެޗު ފިޔަވައި އެހެން މެޗެއްގައި ނުކުޅެވުނެވެ. ކެޕްޓަން އަލީ ފާސިރު (ސެންޓޭ) އަށް ބޮޑު އަނިޔާއެއް ކުރިމަތިވި އެވެ. އަދި އެއަށް ވުރެ ވަކިން ބޮޑު ޝޮކެއް ލިބުނީ ޓީމުގެ ޑިފެންޑަރު ޑަކްސަން ޕުސްލާސް ދަންޖެހި މަރުވެފައި ހުއްޓާ ފެނުމުންނެވެ.

ގެންޖެހުމަކަށް ފަހު ގޮންޖެހުމެކެވެ. އަޑިގަނޑަކަށް ފަހު އަޑިގަނޑަކަށް މި ސީޒަންގައި ކްލަބް ވެލެންސިއާ ދިޔައީ ވެއްޓެމުންނެވެ. ލިސްޓް އަދި ވެސް ދިގެވެ. މި ހުރިހާ ގޮންޖެހުންތައް އެއްކޮލައިގެން ވެލެންސިއާގެ ސީޒަން، ސިފަ ކުރަން އެ ޓީމުގެ ސްޕޯޓްސް ޑައިރެކްޓަރު އިސްމާއީލް އާސިފް (ކުޑަހީނާ) ބޭނުން ކުރީ މި އިބާރާތްތަކެވެ.

"މިއީ މުޅި ވެލެންސިއާގެ ތާރީހުގައި ވެސް މި ކްލަބުން ކުރިމަތިލި އެންމެ އާދަޔާ ހިލާފު ސީޒަން،" އެ ކްލަބަށް މި އަހަރުގެ ޕްރެޒިޑެންޓްސް ކަޕު ކާމިޔާބު ކޮށްދިން ކޯޗު ބުންޏެވެ.

ޗެރިޓީ ޝީލްޑް މެޗުގައި މާޒިޔާ އަތުން ތަފާތު ބޮޑުކޮށް ބަލި ވިޔަސް ޕްރެޒިޑެންޓްސް ކަޕުގައި ލީގު އުސޫލުން ކުޅުނު ގުރޫޕް ސްޓޭޖުގެ ބުރުގައި އެއްވަނަ ހޯދައިގެން ވެލެންސިއާ ފައިނަލަށް ދަތުރު ކުރި އެވެ. އެ މުބާރާތުގެ ފައިނަލުގައި ރ. އަލިފުށީގައި ކުޅުނު މެޗުގައި ސެންޓޭ އަށް އަނިޔާވެ، މެޗުގެ ބާކީ ބައި ފުރިހަމަ ނުކުރެވުނެވެ. އެކަމަކު އެކްސްޓްރާ ޓައިމްގައި މާޒިޔާ ބަލިކޮށް ޕްރެޒިޑެންޓްސް ކަޕުގެ ޗެމްޕިއަންކަން 14 އަހަރަށް ފަހު ވެލެންސިއާ އިން ހޯދި އެވެ.

އަޑުބަރޭ ޖަލަށް، ދެން އައީ ޑަކްސަންގެ ކުއްލި މަރުގެ ޚަބަރު

ދިވެހި ލީގަށް ޓީމު ކުޅެން ތައްޔާރުވިއިރު އަނިޔާ އާ ހެދި ޓީމުން ބާކީ ވާން ޖެހުނީ ސެންޓޭ އަށް އެކަންޏެއް ނޫނެވެ. ޕްރެޒިޑެންޓްސް ކަޕުގެ ފައިނަލުގައި މޮޅަށް ކުޅުނު ދެ ކުޅުންތެރިން ކަމަށްވާ، އަބްދުﷲ މިދުހަތު ފަހްމީ (ބިޗަޑް) އާއި އިސްމާއީލް އީސާ އަށް އަނިޔާވެގެން ދިވެހި ލީގުގެ ކުރީ ކޮޅު ނުކުޅެވުނެވެ. ޓީމުގެ ޕްރެކްޓިހުގައި މިދުހަތުގެ އަތް ބިންދައިގެން ދިޔައީ އެވެ.

އެކަމަކު ދެން ޓީމުން ބާކީވި ކުޅުންތެރިޔާ ބާކީ ވީ އަނިޔާ އަކުން ނޫނެވެ. މިޑްފީލްޑަ އަސްހަދު އަލީ (އަޑުބަރޭ) އެވެ. ޖިންސީ ފުރައްސާއިގެ ތުހުމަތާ ގުޅިގެން ކޯޓުން ބަންދު ކުރި، ކުރީގެ ޓޫރިޒަމް މިނިސްޓަރު އަލީ ވަހީދު ބޭސް ފަރުވާ އަށް ރާއްޖެ އިން ބޭރަށް ފުރުވާލުމުގައި ޖާމިނުވީ އަސްހަދެވެ. ކޯޓުން ދިން ވަގުތަށް އަލީ ރާއްޖެ ނުގެނެވުމުން ކޯޓު ހުރުމަތް ކަނޑަލިކަން އަސްހަދުގެ މައްޗަށް ސާބިތުވި އެވެ. އޭނާ 15 ދުވަހަށް ޖަލަށް ލުމަށް ކޯޓުން ހުކުމް ކުރި އެވެ. ރާއްޖެއިން ބޭރުގައި އުޅެފައި މާލެ އައި ގޮތަށް އޭނާ ޖެހުނީ ޖަލަށް ދާށެވެ. މި ކުޅުންތެރިން ނުލައި ވެލެންސިއާ އަށް ލީގުގެ ފެށުމުގައި ކުރިމަތިވީ ނާކާމިޔާބެވެ. ފުރަތަމަ ދެ މެޗުން އެ ޓީމު ވީ ބައްޔެވެ.

ހީނާ ބުނި ގޮތުގައި ތިންވަނަ މެޗުގައި ދަ ގްރާންޑޭ ސްޕޯޓްސް ކްލަބްގެ މައްޗަށް މޮޅެއް ހޯދައި ހަމަޖެހުމުގެ ނޭވާ އެއް ލެވުނު ވަގުތު ދެން ލިބުނީ ގަބޫލު ކުރަން ދަތި ހަބަރެކެވެ. ޑަކްސަން ދިރިއުޅޭ އެޕާޓްމެންޓްގައި ހުންނަ އޭނާގެ ކޮޓަރީގައި ދަން ޖެހިފައި މަރުވެފައި ހުއްޓާ ފެނުނު ހަބަރުން ވެލެންސިއާގެ ކުޅުންތެރިންނަށް ލިބުނީ ޝޮކެއް ކަމަށް ހީނާ ބުންޏެވެ. ގްރާންޑޭ މެޗުގައި އޭނާ އަށް އަރާމު ކުރަން ފުރުސަތު ދިނީ އޭގެ ކުރިން ގްރީން ސްޓްރީޓްސް އާ ދެކޮޅަށް ކުޅުނު މެޗުގައި ލިބުނު ކުޑަ އަނިޔާ އަކުން ރިކަވާ ވުމަށެވެ.

އަނިޔާގައި ތިބި ކުޅުންތެރިންގެ ތެރެއިން، އޭގެ ފަހުން ކުޅެން އޮތް ޓީސީގެ މެޗަށް އެންމެ އަވަހަށް ފިޓް ކުރެވޭނެ ކުޅުންތެރިޔަކަށް ހުރީ ވެސް ޑަކްސަން އެވެ.

"އަނިޔާއާ ގުޅިގެން ޑޮކްޓަރަށް ދެއްކީމަ އޭނަ ގާތު ބުނި ހަތަރު ދުވަސް ވަންދެން ރެސްޓް ކުރާށޭ. އޭނާ ވެސް ބުނި ކޯޗޭ ތިމަންނަ ވެސް ތިން ހަތަރު ދުވަސްތެރޭ ޕްރެކްޓިހަށް ނުކުންނާނަމޭ،" ކޯޗިން ޓީމާ އެންމެ ފަހުން ޑަކްސަން ކުރި މުއާމަލާތް ހީނާ ކިޔައިދިނެވެ.

"ވެލެންސިއާ ޓީމަށް ޝޮކެއް އަންނާނެ ވަރުގެ ކަމަކަށް އެކަންވީ. ރަނގަޅަށް ހެލްދީކޮށް ހުރި ކުޅުންތެރިޔަކު އެކަހަލަ ގޮތަކަށް ދިޔައީ ކުޅުންތެރިންނަށް ވެސް ގަބޫލެއް ނުކުރެވުނު."

މާލީ ގޮންޖެހުން، އޭފްސީ މެޗަށް ޓީމު ނުފުރުން، ޑިފެންޑަރު ހޯޒޭ ފިލައިގެން ދިއުން

އެފްއޭއެމުން ކަލްބްތަކަށް ދޭން ޖެހޭ ފައިސާ ބަރާބަރަށް ނުދެވުމުން މާލީ ގޮތުން އެންމެ ބޮޑު މައްސަލަތަކެއް ކުރިމަތިލާން ޖެހުނު އެއް ޓީމަކަށް ވެލެންސިއާ ވާނެ އެވެ. މުސާރަ ނުދެވޭތީ ސީނިއާ ބައެއް ކުޅުންތެރިން ޕްރެކްޓިހަށް ނުކުތުން ހުއްޓާލި އެވެ. މުސާރަ ނުދޭތީ ފުޓްބޯޅަ ކުޅުން ހުއްޓާލަން އުޅޭ ވާހަކަ ވެސް ވެލެންސިއާގެ ގޯލް ކީޕަރު މުހައްމަދު ފައިސަލް އިއުލާން ކުރި އެވެ.

ލީގުގެ ގިނަ މެޗުތަކުގައި ފައިސަލް ނުކުޅެ އެވެ. މުސާރާ ނުދޭތީ ޕްރެކްޓިހަށް ނުކުތުން ހުއްޓާލައިގެން އޭނާ ހުރީ ރަށުގަ އެވެ. އޭއެފްސީ ކަޕް ކޮލިފިކޭޝަން މެޗުގައި ބޫޓާންގެ ތިމްޕޫ ސިޓީ އާ ދެކޮޅަށް ކުޅުނު މެޗުގައި ވެސް އޭނާ ބެންޗުގައި ވެސް ނެތެވެ. އެ މެޗުން މޮޅުވެ ޕްރިލިމިނަރީ މަރުހަލާގެ ދެވަނަ ބުރުން ޖާގަ ހޯދި ނަމަވެސް ބަންގްލަދޭޝް އަށް ވެލެންސިއާގެ ޓީމު ދަތުރެއް ނުކުރި އެވެ.

ފަހު ވަގުތު ޓިކެޓް ހަމަޖެހުނު ނަމަވެސް ހޮޓަލްގެ ހަރަދުތަކަށް ހޭދަ ކުރާނެ ފައިސާއެއް އެ ކްލަބްގައި ނެތެވެ. ޔޫތު މިނިސްޓްރީން ފަހު ވަގުތު ނަގައިދިން ޓިކެޓްގައި ދަތުރު ނުކުރުމުން، އެ މިނިސްޓްރީން ވެލެންސިއާ އާދެކޮޅަށް އަޅަން ނިންމި ފިޔަވަޅަކީ، ދެން އެ ކްލަބަށް ފައިސާ ދޭއިރު ޓިކެޓަށް ކުރި ހަރަދު އުނި ކުރަން ނިންމުމެވެ. ޕްރެޒިޑެންޓްސް ކަޕުގެ ޗެމްޕިއަންކަން ހޯދައިގެން ލިބެން ޖެހޭ ފައިސާ ވެސް އެ މިނިސްޓްރީން ވެލެންސިއާ އަށް ނުދެ އެވެ. މީގެ ކުރިން މުބާރާތް ބޭއްވި އެހެން އަހަރުތަކުގައި ޗެމްޕިއަން ޓީމަށް ފައިސާގެ އިނާމު ސަރުކާރުން ދީފައި ވެސް އެބަހުއްޓެވެ.

މުސާރަ ނުދޭތީ ކްލަބްގެ ޑިފެންޑަރު ސްޕެއިންގެ ހޯޒޭ އެންޓޯނިއޯ ރާއްޖެ ދޫކޮށް ފުރައިގެން ދިޔައީ ޓީމުގެ މެނޭޖުމެންޓަށް އެއްވެސް އެއްޗެއް އެންގުމަކާ ނުލަ އެވެ. މުސާރައިގެ މައްސަލަ ފީފާ އަށް ހުށަހަޅާނެކަން ފަހުން ކްލަބަށް އޭނާ އެންގި ކަމަށް ކުޑަ ހީނާ ބުންޏެވެ.

ލަދުވެތި ރެކޯޑް ނަތީޖާތަކެއް

ސީޒަން ހުޅުވުމުގެ ގޮތުން ކުޅުނު ޗެރިޓީ ޝީލްޑް މެޗުގައި މާޒިޔާ އަތުން ވެލެންސިއާ ބަލިވީ 5-0 ންނެވެ. އެއީ 2009 ގައި ޗެރިޓީ ޝީލްޑްގެ ނަމުގައި ސީޒަން ހުޅުވަން ވަކި މެޗެއް ހާއްސަ ކުރި ފަހުން އެ މެޗުގެ ތާރީހުގައި މިހާތަނަށް ނެރުނު އެންމެ ތަފާތު ބޮޑު ނަތީޖާ އެވެ. ވެލެންސިއާ އަށް ލަދުވެތި ރެކޯޑެކެވެ. މާޒިޔާ އަށް ފުރިހަމަ ރެކޯޑެކެވެ.

ލީގުގެ ދެ ވަނަ ބުރުގައި މާޒިޔާ އަތުން 13-0 ން ވެލެންސިއާ ބަލިވި އެވެ. އެ މެޗުގެ ނަތީޖާ ވީ ރެކޯޑަކަށެވެ. ދިވެހި ލީގުގެ ޗެމްޕިއަންކަން ހޯދި ޓީމެއްގެ ކޮޅަށް ނެރެނު އެންމެ ތަފާތު ބޮޑު ނަތީޖާ އަށް ވެލެންސިއާގެ މި ބަލި ވި އެވެ. އޭގެ ކުރިން އެ ރެކޯޑް އޮންނަނީ ދިވެހި ލީގުގެ ޗެމްޕިއަންކަން ތިން ފަހަރު ހޯދި ވީބީ އައްޑޫ އެފްސީގެ މައްޗަށް 2013 ގައި ނިއު ރޭޑިއަންޓް ސްޕޯޓްސް ކްލަބުން 10-1 ން މޮޅުވި މެޗުގަ އެވެ.

ލީގުގެ ދެ ވަނަ ބުރުގައި ރެލިގޭޝަން ޒޯނަށް ވެލެންސިއާ ވެއްޓިދާނެ ކަމުގެ ބިރު ވެސް ހީވި އެވެ. އެ ޓީމުން ނަތީޖާ ބަދަލު ކުރީ ތިން ވަނަ ބުރުގަ އެވެ. މާޒިޔާގެ ފޯވާޑް މުހައްމަދު އުމޭރު ވެލެންސިއާ އަށް ބަދަލު ވުމާއި ސުޕަ ޔުނައިޓެޑް ސްޕޯޓްސް (ސަސް) ގެ ޑިފެންޑަރު އަބްދުﷲ ހަނީފް (ބެންޖޯ) އާއި ގްރީން ސްޓްރީޓްސްއިން ގެނައި ޑިފެންޑަރު އަލީ ޝާމިސް (ތޮއްޕެ) ގެނެސް ވެލެންސިއާގެ ޓީމުގައި ފޫބައްދަން ޖެހޭ ބާގަނޑުތައް ބަންދު ކުރި އެވެ.

އެ ކުޅުންތެރިންގެ ޓްރާންސްފާ ވީ ސެންޓޭ އާއި ޑަކްސަން އަދި ހޯޒޭގެ މަގާމު ފޫބައްދަން ވެލެންސިއާ އަށް އެޅުނު ފިޔަވަޅަކަށެވެ. އެކަމަކު އޭގެ ފަހުން ބޯހަސް ކުރު ޗުއްޓީއެއްގައި ސްޕެއިން އަށް ދިޔަ ގޮތަށް ނާދެ އެވެ. ފަހު މެޗުތަކުގައި އޭނާ ނެތި ވެސް ލީގު އެ ޓީމުން ނިންމާލީ ތިން ވަނައިގައި އޮވެގެންނެވެ.

އެފްއޭ ކަޕު؛ ސީޒަންގެ ދެ ވަނަ ތައްޓާ ދިމާލަށް

ކުޑަހީނާ ބުނި ގޮތުގައި އެފްއޭ ކަޕު ފައިނަލުގައި މިރޭ މާޒިޔާ އާ ދެކޮޅަށް ކުޅެން ވެލެންސިއާ ކުރި ދަތުރަކީ އުނދަގޫ ދަތުރެކެވެ. ލީގު ނިމުނު ފަހުން ކީޕަރު ފައިސަލް އަނެއްކާ ވެސް ޓީމާ ދުރުވި އެވެ. އޭނާ އަލުން ޓީމަށް އައީ އެފްއޭކަޕްގެ ފުރަތަމަ މެޗު އޮތް ދުވަހު އެވެ. އޭނާގެ ބަދަލުގައި ހުރީ ތަޖުރިބާ މަދު ޒުވާން ކީޕަރު އާދަމް އިމްއާން (އިންމި) އެވެ.

ނޮކައުޓް މުބާރާތެއްގައި ޒުވާން ކީޕަރަކަށް އިތުބާރުކޮށް އެ ފުރުސަތު އިމްއާން އަށް ދިނީ ޓީމާ ލަހުން ގުޅުނު އެއް ވަނަ ކީޕަރު ފައިސަލް ބެންޗުގައި ބެހެއްޓުމަށް ފަހު އެވެ. ޓީސީގައި ސީޒަން ފެށި އިމްއާން ވެލެންސިއާ އަށް ބަދަލުވީ ޓީސީގައި ކުޅެން ފުރުސަތު ލިބެން ނެތުމުންނެވެ.

އެކަމަކު އެފްއޭ ކަޕުގައި މިހާތަނަށް އިމްއާން ދައްކަމުން ދިޔައީ ތަފާތު މޮޅު ކުޅުމެއް ކަމަށް ކުޑަހީނާ ބުންޏެވެ. އޭނާ ބުނި ގޮތިުގައި އެފްއޭ ކަޕު ފައިނަލާ ހަމައަށް ކުރި ދަތުރުގައި ވެލެންސިއާގެ ޓީމުން އެންމެ މޮޅު ކުޅުމެއް ދެއްކި ކުޅުންތެރިޔަކީ ރާއްޖޭގެ ލެޖެންޑްރީ ކީޕަރު އިމްރާން މުހައްމަދުގެ ކޮއްކޮ، އިމްއާން އެވެ.

މިރޭގެ މެޗުގައި މާޒިޔާ އާ ދެކޮޅަށް އުމޭރު ކުޅެވޭކަށް ނެތެވެ. މާޒިޔާއިން އޭނާ ވެލެންސިއާ އަށް ދޫކުރީ މާޒިޔާ އާ ދެކޮޅަށް ކުޅޭ މެޗުތަކުގައި އޭނާ ލައްވައި ނުކުޅުވަން ޝަރުތު ކުރުމަށް ފަހު އެވެ. އަދި ޕްރެޒިޑެންޓްސް ކަޕު ކާމިޔާބު ކޮށްދިނުމުގައި އެންމެ މުހިންމު ދައުރެއް އަދާކުރި ފޯވާޑް ބޯހަސް ވެސް ޓީމުގައި ނެތެވެ. ސެންޓޭގެ ކަކުލުގެ އޮޕަރޭޝަން ދާދި ފަހު ޓްރީ ޓޮޕްގައި ކުރި އެވެ. ކުޅުމާ ދުރުގައި އިތުރު މުއްދަތެއް އޭނާ ހޭދަކުރަން ޖެހޭނެ އެވެ.

އެކަމަކު ވެލެންސިއާއިން މެޗުގައި ކުޅެން އަރަންތިބި ކުޅުންތެރިންނަށް އިތުރބާރު އެބަ އޮތްކަމަށް ހީނާ ބުންޏެވެ.

އެފްއޭ ކަޕުގެ ފައިނަލަށް މިރޭ ނުކުންނައިރު ތިން މުބާރާތުގައި ވެސް ވެލެންސިއާ އޮތީ ރަނގަޅު މަގާމެއްގަ އެވެ. ޕްރެޒިޑެންޓްސް ކަޕުގެ ކާމިޔާބާއި ލީގުގެ ތިންވަނައިގައި ނިންމާލުމަކީ އެފްއޭ ކަޕު ފައިނަލާ ކުރިމަތިލާއިރު ބޮޑު ހިތްވަރެއް ކަމަށް ހީނާ ބުންޏެވެ. އޭނާގެ ތައުރީފު އޮތީ ވެލެންސިއާގެ ކުޅުންތެރިންނަށާއި ކޯޗިން ޓީމަށެވެ.

"މުޅި ސީޒަންގައި ވެސް މިވަރުގެ ގޮންޖެހުންތަކެއް ކަޑަތުކޮށް ތިން މުބާރާތުގައި ވެސް ރަނގަޅު މަގާމެއްގައި އޮވެވުނީމަ އެބަ އެނގޭ މި ކޯޗިން ޓީމާއި މީގަ މިތިބަ ކުޅުންތެރިން ކޮށްފައި އޮތް މަސައްކަތް. މިރޭގެ މެޗަށް ވެސް ވެލެންސިއާ ބުރަކޮށް މަސައްކަތް ކުރާނެ،" އުނދަގޫ ހާލަތެއްގައި ވަނިކޮށް 2016 ގެ އެފްއޭ ކަޕު ވެސް ވެލެންސިއާ އަށް ކާމިޔާބު ކޮށްދިން ހިނާ ބުންޏެވެ.

ގައުމީ ފުޓްބޯޅަ ދަނޑުގައި މިރޭ ކުޅޭ މެޗު ފަށާނީ 9 ޖަހާއިރު އެވެ.