ދޮޅު އަހަރުގެ ސަސްޕެންޝަނަށް ފަހު ސާޖެންޓް އެޓް އާމްސް މަގާމުން ވަކިކޮށްފި

މީގެ ދޮޅު އަހަރުކުރިން ސަސްޕެންޑްކުރި ރައްޔިތުންގެ މަޖިލީހުގެ ސާޖެންޓް އެޓް އާމްސް މުހައްމަދު ހަލީމް، މަގާމުން ވަކިކޮށްފި އެވެ.

މަޖިލިސް އިދާރާގެ އޮނިގަނޑު ރާވާފައިވާ ގޮތުން ސާޖެންޓް އެޓް އާމްސްއަކީ މަޖިލީހުގެ އަމީންއާންމުގެ މަގާމާ ޖެހިގެން ދެވަނައަށް އެންމެ އިސްވެރިޔާ އެވެ.

ސާޖެންޓް އެޓް އާމްސްގެ މަގާމު އޮކްޓޫބަރު 31، 2013 ގައި އުފެއްދީއްސުރެ މިއަދާ ހަމައަށް ވެސް އެ މަގާމުގައި ހުންނެވީ ހަލީމެވެ. އެކަމަކު އޭނާގެ މައްސަލައެއް ބަލަމުންދާ ކަމަށް ބުނެ، މަޖިލީހުން އޭނާ ސަސްޕެންޑްކުރީ މިދިޔަ އަހަރުގެ ޖެނުއަރީ 26 ގަ އެވެ. އޭނާ ސަސްޕެންޑްކުރި ސަބަބު މަޖިލީހުން ހާމައެއް ނުކުރެ އެވެ.

މަޖިލީހުގެ އާންމު ކޮމިޓީން ސިއްރުކޮށް ކުރިއަށް ގެންދިޔަ އެ މައްސަލައާ ގުޅޭ ގޮތުން މިއަދު ބޭއްވި މަޖިލީހުގެ ޖަލްސާގައި ހަލީމް ވަކިކުރަން ނިންމާފައި ވަނީ 25 މެމްބަރުންގެ ވޯޓުންނެވެ.

ހަލީމަކީ މަޖިލިސް އިދާރާގައި މަސައްކަތްކުރައްވަން ފެއްޓެވުމުގެ ކުރިން އެމްއެންޑީއެފްގައި ވަރަށް ޒަމާންވަންދެން ހިދުމަތްކުރެއްވި ބޭފުޅެކެވެ.