ނިއުކްލިއާ މުއާހަދާ އަށް އެމެރިކާ ދިން ޖަވާބު އީރާނަށް

އީރާންގެ ނިއުކްލިއާ މަޝްރޫއާ ގުޅޭ ގޮތުން ވިލާތުގެ ގައުމުތަކާއި އެމެރިކާ އިން އީރާނާ އެކުގައި ގާއިމުކުރާ މުއާހަދާގެ އެންމެ ފަހު ދެލިކޮޕީއަށް އެމެރިކާ އިން ދީފައިވާ ޖަވާބު، ވިލާތުގެ އިއްތިހާދު މެދުވެރިކޮށް އިއްޔެ ލިބިފައިވާ ކަމަށް އީރާނުން ބުނެފި އެވެ.

އީރާންގެ ޚާރިޖިއްޔާގެ ތަރުޖަމާނު ނާސިރު ކަންއާނީ އިއްޔެ ވިދާޅުވީ ނިއުކްލިއާ މުއާހަދާގެ އެންމެ ފަހު ދެލިކޮޕީއާ ބެހޭ ގޮތުން އެމެރިކާ އިން ދީފައިވާ ޖަވާބާއި ޚިޔާލުތައް އީރާނުން މުރާޖައާ ކުރަން ފަށާފައިވާ ކަމަށެވެ. އަދި އެ ޖަވާބާއި ޚިޔާލުތައް ވަރަށް ފަރުވާތެރިކަމާ އެކު އީރާނުން ދިރާސާ ކުރުމަށް ފަހު، އީރާނުން ދެކޭ ގޮތުން ވިލާތުގެ އިއްތިހާދާ އެކުގައި ވަރަށް އަވަހަށް ހިއްސާ ކުރާނެ ކަމަށް ވެސް އޭނާ ވިދާޅުވި އެވެ.

އެމެރިކާގެ ޚާރިޖިއްޔާގެ ތަރުޖަމާނު ނެޑް ޕްރައިސް އިއްޔެ ވިދާޅުވީ، އެންމެ ފަހުގެ ދެލިކޮޕީ އަށް އީރާނުން ހުށަހެޅި ޚިޔާލުތައް އެމެރިކާ ސަރުކާރުން މުރާޖައާކޮށް ނިންމުމަށް ފަހު، ވިލާތުގެ އިއްތިހާދަށް މިހާރު ފޮނުވާފައިވާނެ ކަމަށެވެ.

ވިލާތުގެ އިއްތިހާދުގެ ޚާރިޖީ ސިޔާސަތާ ބެހޭ އެންމެ އިސް ވެރިޔާ ޖޯސެފް ބޮރެލް އިއްޔެ ވިދާޅުވި ގޮތުގައި އަހަރަކަށް ވުރެ ގިނަ ދުވަހު މަޝްވަރާކޮށްގެން އެކުލަވައިލި ދެލިކޮޕީ އަށް ކުދިކުދި ބަދަލުތައް ގެންނަން އީރާން އަދިވެސް ބޭނުންވެ އެވެ. އެ ދެލިކޮޕީ އެކުލަވައިލީ އިނގިރޭސި ވިލާތާއި އެމެރިކާ އާއި ފަރަންސޭސި ވިލާތާއި ޖަރުމަން ވިލާތާއި ޗައިނާ އަދި އީރާންގެ މަންދޫބުން ބައިވެރިވެގެން އެތައް ފަހަރެއްގެ މަތިން ކުރި މަޝްވަރާތަކަށް ފަހު އެވެ.

އީރާންގެ ނިއުކްލިއާ މުއާހަދާގެ މައިގަނޑު ބޭނުމަކީ، ނިއުކްލިއާ ހަތިޔާރު އުފެއްދޭ މިންވަރަށް އީރާނުގައި ޔޫރޭނިއަމް ފައްކާކޮށް ތަރައްގީކުރުން ހުއްޓުވުމެވެ. އޭގެ އިތުރުން، އީރާންގައި ހުރި ނިއުކްލިއާ ރިއެކްޓަރުތަކުގެ ހުރިހާ ހަރަކާތްތަކެއް، އެޓޮމިކް ހަކަތައާ ބެހޭ އދ.ގެ އިދާރާ އިން ބަލައި ފާރަލަމުން ގެންދިއުމެވެ.

ވިލާތުގެ ގައުމުތަކާއި އެމެރިކާ އިން އީރާނާ އެކުގައި ނިއުކްލިއާ މުއާހަދާގައި ސޮއިކުރީ، އެމެރިކާގެ ކުރީގެ ރައީސް ބަރަކް އޮބާމާގެ ވެރިކަމުގައި 2015 ވަނަ އަހަރުގެ ތެރޭގަ އެވެ. ނަމަވެސް، އެމެރިކާގެ ކުރީގެ ރައީސް ޑޮނަލްޑް ޓްރަމްޕުގެ ވެރިކަމުގައި 2018 ވަނަ އަހަރު، އެމެރިކާ އެ މުއާހަދާ އިން ވަކިވެ، އިގްތިސާދީ ގޮތުންނާއި އަސްކަރީ ގޮތުން އީރާނަށް ދަތިކުރުމުގެ ފިޔަވަޅުތަކެއް އެޅި އެވެ.

އެ މުއާހަދާ އަށް އަލުން އަމަލުކުރަން ފެށުމަށް އެމެރިކާ އިން ނިންމީ، ޖެނުއަރީ 20، 2021 ގައި އެމެރިކާގެ ވެރިކަމާ ހަވާލުވެވަޑައިގަތުމަށް ފަހު، މިހާރުގެ ރައީސް ޖޯ ބައިޑެން އެވެ.