މަހްލޫފް ރައީސްގެ އަރިހުގައި، ރިޝްވަތުގެ ޝަރީއަތް މާދަމާ

ޔޫތު މިނިސްޓަރު އަހުމަދު މަހްލޫފްގެ މައްޗަށް ކުރެވޭ ރިޝްވަތުގެ ދައުވާގެ ޝަރީއަތް މާދަމާ އަލުން ފެށުމަށް ކްރިމިނަލް ކޯޓުން މިއަދު ތާވަލުކޮށްފި އެވެ.

ކްރިމިނަލް ކޯޓުގައި އެ މައްސަލަ ތާވަލުކޮށްފައި ވަނީ މާދަމާ ހެނދުނު ނުވައެއް ޖަހާއިރަށެވެ. އެ އަޑުއެހުން ކުރިއަށް ގެންދަން ނިންމައިފައި ވަނީ އޮންލައިންކޮށެވެ.

އޮންލައިންކޮށް ޝަރީއަތް ކުރިއަށް ގެންދަން ނިންމިއިރު، މަހްލޫފް މިވަގުތު ހުންނެވީ ރައީސް އިބްރާހިމް މުހައްމަދު ސޯލިހު، މ. އަތޮޅުގެ ފަސް ރަށަކަށް ކުރައްވަމުން ގެންދަވާ ދަތުރުފުޅުގައި އެމަނިކުފާނުގެ އަރިހުގަ އެވެ. މިއަދު ހަވީރު މ. ދިއްގަރުގައި ބޭއްވި އެކުވެރިކަމުގެ ވޮލީ މެޗެއްގައި ވެސް އެ ދެ ބޭފުޅުން އެއް ޓީމަކަށް ކުޅުއްވި އެވެ.

މަހްލޫފްގެ ޝަރީއަތްތަށް ކުރިއަށް ދަނިކޮށް، މީގެ ކުރިން ވެސް ރައީސްއާ އެކު އެކި ހަފުލާތަކުގައި އޭނާ ބައިވެރިވެވަޑައިގަންނަވާތީ ފާޑުކިޔުން އަމާޒުވެފައިވެ އެވެ.

މަހްލޫފްގެ މައްޗަށް ރިޝްވަތުގެ ދައުވާކުރީ އޭނާ ރައްޔިތުންގެ މަޖިލީހުގެ މެމްބަރަކަށް ހުންނެވިއިރު އެސްއީޒެޑް ބިލަށް ވޯޓުު ދިނުމަށްޓަކައި 33،000 ޑޮލަރު ކުރީގެ ނައިބު ރައީސް އަހުމަދު އަދީބުގެ އަތުން ނެންގެވި ކަމަށް ބުނެ އެވެ. އޭނާގެ މައްޗަށް ދައުލަތުން އުފުލާފައިވާ ރިޝްވަތު ހިފުމުގެ އެ ދައުވާ ކްރިމިނަލް ކޯޓުން ވަނީ ބޭރުކޮށްލައިފަ އެވެ. އެއީ މަދަނީ މިންގަނޑުން ބަލާއިރު އެ މައްސަލަ ކުރިއަށް ގެންދެވޭނެ މިންވަރުގެ ހެކި ނެތް ކަމަށް ބުނެ އެވެ.

ދައުވާ ކުރިއަށް ނުގެންދެވޭނެ ކަމަށް ކްރިމިނަލް ކޯޓުން ނިންމީ ގޯސް ކަމަށާއި އެ މައްސަލަ އަލުން އެ ކޯޓުން ބަލަން ހައި ކޯޓުން ހުކުމްކުރި އެވެ.

ކްރިމިނަލް ކޯޓުން މައްސަލަ ބެއްލެވި ގާޒީ މުހައްމަދު މިސްބާހު ވިދާޅުވީ މަހްލޫފަށް 33،000 ޑޮލަރު ލިބުނުކަން ސާބިތު ކުރެވެން އޮތަސް، އެ ފައިސާ އަކީ އެސްއީޒެޑް ބިލަށް ވޯޓު ދިނުމުން ރިޝްވަތުގެ ގޮތުގައި ދިން ފައިސާއެއް ކަން ސާބިތުކޮށްދެވޭނެ ކަމަށް ނުފެންނަ ކަމަށެވެ. އެހެންވެ، ޝަރީއަތުގެ މަރުހަލާ ކުރިއަށް ގެންގޮސް ހެކިބަސް ނެގިޔަސް އެ ދައުވާ ސާބިތު ކުރެވޭނެ ކަމަށް ނުފެންނާތީ އެ ދައުވާ ކުރިއަށް ނުގެންދަން ނިންމައި، ދައުވާ ބާތިލްކުރީ ކަމަށެވެ.

އެ މައްސަލަ ކުރިއަށް ގެންދަންޖެހޭ މިންވަރުގެ ހެއްކެއް ނެތް ކަމަށް ނިންމުމުގައި އެންމެ ބޮޑަށް ގާޒީ ފާހަގަކުރެއްވީ އެއީ ރިޝްވަތުގެ ފައިސާކަން ސާބިތު ކުރަން ދައުލަތުން ހުށަހެޅި ކުރީގެ ނައިބު ރައީސް އަހުމަދު އަދީބުގެ ބަޔާނާ ގުޅޭ މައްސަލަ އެވެ. އޭނާ އަކީ ކުށް ސާބިތުވެ، ހުކުމް ތަންފީޒުކުރާ މީހަކަށް ވާތީ އޭނާގެ ހެކިބަސް ބަލައިނުގަނެވޭނެ ކަމަށް މަހްލޫފްގެ ފަރާތުން ބުނެފައިވެ އެވެ.

މި އަހަރު ފެބްރުއަރީ މަހުގައި އެ މައްސަލައިގެ ޝަރީއަތް ފެށިއިރު، މަހުލޫފް އަންނަނީ އެ ދައުވާ އަށް އިންކާރުކުރައްވަމުންނެވެ.