ޝިޔާމްގެ މައްޗަށް ކުރާ ދައުވާ ކޯޓުން ބޭރެއް ނުކުރި

ކުރީގެ ޗީފް އޮފް ޑިފެންސް ފޯސް އަހުމަދު ޝިޔާމްގެ މައްޗަށް ކުރާ ދައުވާ ކުރިއަށް ގެންދަން ހުރަހެއް ނެތް ކަމަށް ކްރިމިނަލް ކޯޓުން ނިންމައިފި އެވެ.

ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ދައުލަތުން ކުރަނީ އޭނާ ޗީފް އޮފް ޑިފެންސް ފޯސްގެ މަގާމުގައި ހުންނެވިއިރު، ވިލިމާލޭގައި ހުންނަ އެމްއެންޑީއެފްގެ އިމާރާތެއްގެ ވީއައިޕީގެ ތަނެއްގައި އޭނާގެ ބައްޕަ ބަހައްޓަވައި، އަދި ދަތުރުފަތުރާއި އެހެނިހެން ކަންކަން އެމްއެންޑީއެފުން ކޮށްފައިވާ ކަމަށް ބުނެ އެވެ.

އެ މައްސަލާގައި ޝިޔާމްގެ ފަރާތުން ޝަރީއަތުގެ ކުރީގެ ހުށަހެޅުންތަކެއް ހުށަހެޅީ ދައުވާ ކުރުމަށް ހުރަހަކަށް ވެދާނެ ދިފާއެއް އޮތް ކަމަށަ ބުނެ އާއި އެ ދައުވާގައި ކުށުގެ އުންސުރުތައް ފުރިހަމަ ނުވާ ކަމަށް ބުނުމުގެ އިތުރުން އެއް ހެކިވެރިއަކު ބަލައިނުގަތުމަށާއި ބައެއް ލިޔުންތައް ހޯދުމަށް އެދި އެވެ.

ކުށުގެ އުންސުރުތަކާ ގުޅޭ ހުށަހެޅުމާ ގުޅިގެން ކްރިމިނަލް ކޯޓުން އިއްޔެ ނިންމީ އެކަމާ މެދު ގޮތެއް ނިންމޭނީ ހެކި ވަޒަންކުރުމަށް ފަހު ކަމަށް ވާތީ މި މަރުހަލާގައި އެކަމާ މެދު ގޮތެއް ނުނިންމޭނެ ކަމަށެވެ.

ދައުވާ ކުރުމަށް ހުރަހަކަށް ވެދާނެ ދިފާއެއް އޮތް ކަމަށް ބުނެ ހުށަހެޅީ ސިފައިންނަށް ބައެއް ކަހަލަ އިމްތިޔާޒްތަކެއް އޮންނަ ކަމަށް ބުނެ އެވެ. ސިފައިންގެ އާއިލާތަކަށް ވެސް ބައެއް ކަހަލަ ކަންކަން ސިފައިން ފަހިކޮށްދޭ ކަމަށާއި އެހެންވެ، އެއީ ސިފައިންގެ ގާނޫނުގެ ދަށުން އިމްތިޔާޒު ލިބިގެންވާ ކަމެއް ކަމަށް ޝިޔާމްގެ ފަރާތުން އެ ހުށަހެޅުމުގައި ފާހަގަ ކޮށްފައިވެ އެވެ.

އެ ހުށަހެޅުމާ ގުޅިގެން ކޯޓުގެ ނިންމުމުގައި ވަނީ ދައުވާ ކުރުމަކަށް ހުރަހަކަށް ވެދާނެ ދިފާއުތައް ގާނޫނުލްއުގޫބާތުގައި ބަޔާން ކޮށްފައިވާއިރު، އޭގެ ތެރޭގައި ޝިޔާމްގެ ފަރާތުން ފާހަގަކުރި ފަދަ ކަންކަން ހިމެނިފައި ނެތް ކަމަށެވެ. އެހެންވެ، އެ ހުށަހެޅުން ބަލައިނުގަތުމަށް ނިންމީ ކަމަށް އެ ނިންމުމުގައިވެ އެވެ.

ޝިޔާމްގެ ފަރާތުން ދެން ހުށަހެޅުއްވީ އެންޓި ކޮރަޕްޝަން ކޮމިޝަން (އޭސީސީ) އަށް މައްސަލަ ހުށަހެޅި މީހާ ދައުލަތުގެ ހެއްކެއްގެ ގޮތުގައި ބަލައިނުގަތުމަށެވެ. އެކަމާ މެދު ކޯޓުން ނިންމީ މައްސަލަ ހުށަހެޅި މީހަކީ ކާކުކަން އެނގޭނެ ގޮތަކަށް ދައުލަތުން ހެކި ހުށަހަޅާފައި ނުވާތީ ހެކިންގެ ތެރޭގައި އެ މީހާ ހިމެނޭކަން އެނގެން ނެތް ކަމަށެވެ. އަދި އެ ހުށަހެޅުން ބިނާކުރި އަސާސެއް ނެތް ކަމަށް ނިންމައި، ކޯޓުން ނިންމީ އެ ހުށަހެޅުން ވެސް ބަލައިނުގަތުމަށެވެ.

އިތުރު ބައެއް ލިޔުންތައް ހާމަކުރުމަށް ހުށަހެޅިޔަސް، ކޯޓުން ނިންމީ އެ ލިޔުންތައް ހާމަކުރަންޖެހޭ އެންގޭނެ ސަބަބެއް ނެތް ކަމަށެވެ.