ކަޒަކިސްތާނުން މިހާރު ދިވެހިންނަށް އޮން އެރައިވަލް ވިސާ ލިބޭނެ

ކަޒަކިސްތާނަށް ދަތުރުކުރާ ދިވެހިންނަށް 30 ދުވަހުގެ އޮން އެރައިވަލް ވިސާ ދޭން ފަށައިފި އެވެ.

ފޮރިން މިނިސްޓްރީން ބުނީ ކަޒަކިސްތާނުން ދިވެހިންނަށް އޮންއެރައިވަލް ވިސާ ދޭން މިދިޔަ ބުދަ ދުވަހު ފެށީ މިދިޔަ މެއި މަހު ދެ ގައުމުގެ ދެމެދުގައި ސޮއިކުރި އެއްބަސްވުމުގެ ދަށުން ކަމަށެވެ.

އެ އެއްބަސްވުމުގެ ދަށުން، 30 ދުވަހަށް އޮން އެރައިވަލް ވިސާ ލިބުނަސް އެއަށް ވުރެ ދިގު މުއްދަތަކަށް މަޑުކުރާ ނަމަ ނުވަތަ ތައުލީމީ ނުވަތަ މެޑިކަލް ނުވަތަ ވިޔަފާރި ބޭނުމެއްގައި ދަތުރުކުރާ ނަމަ، ފުރުމުގެ ކުރިން ދުރާލާ ވިސާ ހޯދަން ޖެހެ އެވެ.

ފޮރިން މިނިސްޓްރީން ބުނީ ވިސާއަށް ލުއި ދިނުމަކީ ދެ ގައުމުގެ ގުޅުން އިތުރަށް ބަދަހިވަމުން އަންނަކަން ހާމަކޮށްދޭ ކަމެއް ކަމަށެވެ.

ވަރަށް ގިނަ ގައުމުތަކުން ދިވެހި ޕާސްޕޯޓަށް އޮންއެރައިވަލް ވިސާ ދެ އެވެ. އެހެންވެ، ދެކުނު އޭޝިއާގެ ގައުމުތަކުގެ ތެރެއިން އެންމެ ބާރުގަދަ ޕާސްޕޯޓްގެ ދަރަޖަ ކޮންމެ އަހަރަކު ރާއްޖެއިން ގެންދަނީ ދިފާއު ކުރަމުންނެވެ.