އެއް ޖިންސުން ގުޅުން ހިންގުމުގެ ދައުވާއަށް ފުލުސް މީހާ ވެސް އެއްބަސްވެއްޖެ

ބަންގްލަދޭޝް މީހެއް ކަމަށްވާ އަލަމްގީރާ އެކު އެއް ޖިންސުން ގުޅުން ހިންގި ކަމަށް ބުނެ ދައުލަތުން ދައުވާކުރި ފުލުހެއް ކަމަށްވާ އަބްދުއްރަހުމާން ރަފީއު ކޯޓުގައި މިއަދު ދައުވާއަށް އެއްބަސްވެއްޖެ އެވެ.

ފުލުހުންގެ ޑްރަގް އެންފޯސްމަންޓް ޑިޕާޓްމެންޓް (ޑީއީޑީ) ގައި މަސައްކަތްކުރާ އެ ފުލުސް މީހާގެ މައްޗަށް ކުރާ އެއް ޖިންސުން ގުޅުން ހިންގުމުގެ ދައުވާގެ ޝަރީއަތް ކްރިމިނަލް ކޯޓުގައި މިއަދު ފެށުމާ އެކު، އޭނާ ކުށަށް އިއުތިރާފްވެފައިވާ ކަމަށް ޕްރޮސެކިއުޓާ ޖެނެރަލްގެ އޮފީހުން ބުންޏެވެ.

އޭނާ ކުށަށް އިއުތިރާފްވުމާ އެކު، އަވަސް ނިޔާގެ އަޑުއެހުމެއްގައި އަންނަ ބުރާސްފަތި ދުވަހު ހުކުމް އިއްވަން ވަނީ ހަމަޖައްސައިފަ އެވެ.

ގާނޫނުލް އުގޫބާތުގެ ދަށުން ކުރާ އެ ދައުވާ ސާބިތުވެއްޖެ ނަމަ، އަސާސީ އަދަބަކީ ނުވަ މަހާއި 18 ދުވަހަށް ޖަލަށްލުމެވެ. އެކަމަކު ކުށަށް އިއުތިރާފްވެއްޖެ ނަމަ، އަދަބު އެއަށް ވުރެ ލުއިވާނެ އެވެ.

އެއް ޖިންސުން ގުޅުން ހިންގި މައްސަލާގައި އަލަމްގިރިގެ މައްޗަށް ހަތް މަހުގެ ޖަލު ހުކުމެއް ވަނީ އިއްވައިފަ އެވެ. އަދި އެ މައްސަލާގައި ވަކީލް ނާޒިމް ސައްތާރުގެ މައްޗަށް ވެސް ތިން މަހާއި 26 ދުވަހުގެ ގޭ ބަންދުގެ ހުކުމެއް ވަނީ އިއްވައިފަ އެވެ. އެ ދެ މީހުން ވެސް ކޯޓުގައި ކުށަށް އިއުތިރާފްވި އެވެ.