ހުޅުމާލެ ހޮސްޕިޓަލުގައި މެންޓަލް ހެލްތު ސެންޓަރެއް ހަދަނީ

ނަފްސާނީ މައްސަލަތަކަށް ފަރުވާ ދިނުމަށް ހުޅުމާލެ ހޮސްޕިޓަލުގައި ވަކި ސެންޓަރެއް ހުޅުވަން ތައްޔާރުވެއްޖެ އެވެ.

އެ ހޮސްޕިޓަލްގެ ފްރޮންޓް އޮފިސް އަދި ޕަބްލިކް ރިލޭޝަންސް މެނޭޖަރު އަބްދުﷲ މައުރޫފް މިއަދު ވިދާޅުވީ، އަންނަ މަހުގެ 10 ގައި ފާހަގަކުރާ ނަފްސާނީ ސިއްހަތުގެ ދުވަހު އެ ތަން ހުޅުވަން މަސައްކަތް ކުރަމުން އަންނަ ކަމަށެވެ.

ނައިބު ރައީސް ފައިސަލް ނަސީމް ވަނީ އިއްޔެ އެ ހޮސްޕިޓަލަށް ވަޑައިގެން، މެންޓަލް ހެލްތު ސެންޓަރުގެ މަސައްކަތް ކުރިއަށްދާ ގޮތް ބައްލަވާލައްވައިފަ އެވެ.

ހުޅުމާލެ ދެ ވަނަ ފިޔަވަހީގައި މީހުން އާބާދުވާން ފެށުމާއެކު އެންމެ ބާރުބޮޑުވި އެއް ތަނަކީ ހުޅުމާލެ ހޮސްޕިޓަލެވެ. އެހެންވެ، އެ ތަނުން ވެސް އަންނަނީ ހޮސްޕިޓަލްގެ ޖާގަ އިތުރުކޮށް، އާ ހިދުމަތްތައް ތައާރަފްކުރަމުންނެވެ.

މައުރޫފް ވިދާޅުވީ ސައިކޭޓްރިސްޓަކާ އެކު، ނަފްސާނީ ބައްޔަށް ފަރުވާ ދޭން ފެށީ މީގެ ދެ މަހެއް ކުރިން ކަމަށެވެ. އެކަމަށް ފަރުވާ ހޯދަން ގިނަ ބަޔަކު ނަން ނޯޓު ކޮށްފައިވިއަސް، މި ވަގުތު ދިމާވާ އެންމެ ބޮޑު ދައްޗަކީ އެންމެ ސައިކޭޓްރިސްޓެއް ހުރުމެވެ.

ނަމަވެސް މެންޓަލް ހެލްތު ސެންޓަރު ހުޅުވާނީ އިތުރު ސައިކޭޓްރިސްޓުންނާއި ސައިކޮލޮޖިސްޓުންނާ އެކު ކަމަށް މައުރޫފް ވިދާޅުވި އެވެ.

ނަފްސާނީ ބަލިތަކަށް ފަރުވާ ދިނުމަށް މި ވަގުތު ވަކި ސެންޓަރެއް ހިންގަނީ އައިޖީއެމްއެޗްގައި އެކަންޏެވެ. އެކަމަކު އެ ސެންޓަރުން ފަރުވާ ހޯދުމަށް ވެސް އެވްރެޖުކޮށް އަހަރެއް ވަންދެން މަޑުކުރަން ޖެހެ އެވެ.