އައްޑު އާއި ފުވައްމުލަކުގެ ބޭރުގައި ކަނޑުގެ ސާވޭކުރާތީ އުޅަނދުތައް ސަމާލުވާން އަންގައިފި

ރާއްޖޭގެ ކަނޑުތަކުގެ ބޮޑު ދިރާސާއެއް ކުރާ ބޯޓު އައްޑު އާއި ފުވައްމުލަކުގެ ބޭރުގައި ސާވޭކުރުމުގެ މަސައްކަތް މި ދުވަސްވަރު ކުރަމުން އަންނާތީ އެ ސަރަހައްދުތަކުން ދަތުރުކުރާ ކަނޑު އުޅަނދުފަހަރު ސަމާލުވުމަށް އިއްޔެ އަންގައިފި އެވެ.

މޯލްޑިވްސް މެރިން ރިސާޗު އިންސްޓިޓިއުޓް (އެމްއެމްއާރްއައި) ކުރި ޓުވީޓެއްގައި ބުނީ އެ ދިރާސާގެ މަސައްކަތް ކުރާ ބޯޓު "އާރްވީ އޮޑެސީ" ކުރިއަށް އޮތް ދެ ހަފުތާގައި ވެސް އައްޑު އާއި ފުވައްމުލަކުގެ ކަނޑުގެ ސަރަހައްދުގައި ސާވޭގެ މަސައްކަތް ކުރާނެ ކަމަށެވެ.

"އެހެންވެ، ކަނޑު އުޅަނދުފަހަރުތަކުން އެ ބޯޓާ 500 މީޓަރު ދުރުން ދަތުރުކުރުމަށް އިލްތިމާސްކުރަން،" އެމްއެމްއާރްއައި އިން ބުންޏެވެ.

މޫސުމީ ބަދަލުތަކުގެ ސަބަބުން ރާއްޖެއަށް ލިބޭ ގެއްލުންތައް ކުޑަކުރާނެ ގޮތްތައް ދެނެގަތުމަށް، ދިވެހި ސަރުކާރާއި އިނގިރޭސިވިލާތުގެ ރިސާޗު ފައުންޑޭޝަން "ނެކްޓަން" ގުޅިގެން ކުރާ، "ނެކްޓަން މޯލްޑިވްސް މިޝަން"ގެ ދިރާސާގެ އަމަލީ މަސައްކަތް ފެށީ މި މަހު ހަތަރެއްގަ އެވެ. އެ ދިރާސާގައި ވ. އަތޮޅުން ފެށިގެން އައްޑޫގެ ކަނޑުގެ ސަރަހައްދު އަންނަނީ ސާވޭކުރަމުންނެވެ. އެ ސާވޭގެ މަސައްކަތްތައް އަންނަ މަހު ހަތެއްގެ ނިޔަލަށް ކުރިއަށް ގެންދާނެ އެވެ.

އެ ދިރާސާގެ މިޝަންގައި ރާއްޖެ ހިމެނޭ ގޮތަށް އެކި ގައުމުތަކުގެ ސައިންސްވެރިންނާއި ތަޖުރިބާކާރުންގެ ޓީމެއް، ކަނޑުތަކުގެ އެންމެ މަތީ ފަށަލައިގެން ފެށިގެން، 1،000 މީޓަރު އަޑި އަށް ސާވޭ ކުރާ ގޮތަށް ހަމަޖެހިފައިވެ އެވެ.

ކަނޑުގެ ސަތަހައިން ފެށިގެން 1،000 މީޓަރާ ހަމަ އަށް ސާވޭ ކުރާ އެ ދިރާސާގައި، ކަނޑުގެ އަޑީގެ ދިރުންތަކުގެ ސިއްހަތު ދެނެގަނެ، ކަނޑުތައް ހިމާޔަތްކުރެވޭނެ ގޮތަށް ސަރުކާރުގެ ސިޔާސަތުތައް ކަނޑައެޅުމުގައި ބޭނުންވާނެ މައުލޫމާތު ހޯދާނެ އެވެ. އަދި ފުރަތަމަ ފަހަރަށް ރާއްޖޭގެ ކަނޑުގެ ފުނުގައި ދިރުންތައް އަލާވެފައިވާ މިންވަރު ދެނެގަނެވޭނެ އެވެ.