ކްރައުން އެންޑް ޗަމްޕާ ރިސޯޓްސްގެ ސީއޯއޯ އަކަށް ސޮލާހު

ރާއްޖޭގައި ރިސޯޓް ހިންގާ އެންމެ ބޮޑު އެއް ކުންފުނި، ކްރައުން އެންޑް ޗަމްޕާ ރިސޯޓްސްގެ ޗީފް އޮޕަރޭޓިން އޮފިސަރުގެ މަގާމަށް މުހަންމަދު ސޮލާހު ހަމަޖައްސައިފި އެވެ. މިއީ ރާއްޖޭގެ ޓޫރިޒަމް ދާއިރާގައި މިވަރުގެ ވަޒީފާއަކަށް ދިވެއްސަކު ވަޑައިގަތް ފުރަތަމަ ފަހަރެވެ.

ނުވަ ރިސޯޓާއި ސިޓީ ހޮޓަލެއް ހިންގާ ރާއްޖޭގެ މުއްސަނދި ކުންފުނި، ކްރައުން އެންޑް ޗަމްޕާ ރިސޯޓްސްގެ ސީއޯއޯ އަކީ ކުންފުނީގެ ރިސޯޓްތައް ހިންގުމުގައި އެންމެ ބޮޑު ޒިންމާއެއް އަދާކުރަން ޖެހޭ ބޭފުޅާ އެވެ. އެ ކުންފުނިން ޅ. އަތޮޅުގައި ފަސް ރިސޯޓް، މާލެ އަތޮޅުގައި ދެ ރިސޯޓް އަދި އއ. އާއި އދ. ގައި ދެ ރިސޯޓް ހިންގާ އިރު ޅ. އަތޮޅުގައި އިތުރު ދެ ރިސޯޓެއް އަންނަނީ ތަރައްގީ ކުރަމުންނެވެ.

ޓޫރިޒަމް ދާއިރާގައި އެންމެ ދުވަސްވީ، އަދި ރާއްޖޭގެ ޓޫރިޒަމް ފެށުމުގައި ވެސް އިސްކޮށް ހަރަކާތްތެރިވެ ވަޑައިގަންނަވާ ބައެއް ބޭފުޅުންގެ ހިއްސާ އޮތް ކުންފުނީގެ ސީއޯއޯގެ މަގާމު މީގެ ކުރިން އަބަދު ވެސް ފުރުއްވަމުން ގެންދެވީ ބޭރު މީހުންނެވެ.

ސޮލާހަކީ ކޮން ބޭފުޅެއް؟

އުމުރުން 21 އަހަރުގައި ޓޫރިޒަމް ދާއިރާ އަށް ވެދެވަޑައިގަތް، ހއ. ދިއްދު އަށް އުފަން ސޮލާހަކީ ވޭތުވެދިޔަ 20 އަހަރު ޓޫރިޒަމް ދާއިރާގެ އެންމެ އާދައިގެ ވަޒީފާތަކުން މި ހިސާބަށް ވަޑައިގަތް ބޭފުޅެކެވެ. އޭނާ ސްކޫލު ނިންމާލެއްވުމަށް ފަހު އެންމެ ފުރަތަމަ އަދާކުރެއްވި ވަޒީފާއަކީ މީރުފެންފުށި ރިސޯޓްގެ ޓެލެފޯން އޮޕަރޭޓަރެއްގެ ވަޒީފާ އެވެ. އޭގެ ފަހުން އެކި ފަންތިތަކުގައި ވަޒީފާ އަދާކުރައްވައި، އަދި ލިބިވަޑައިގަންނަވާ ފުރުސަތުތަކުގައި ރާއްޖެ އިން ބޭރުން ކިޔަވާ ވިދާޅުވާން ވަޑައިގަންނަވަ އެވެ. އޭނާ އަކީ މިހާރު ޓޫރިޒަމްގައި އެންމެ ތަފާތު ވަޒީފާތައް އަދާކުރެއްވި އެއް ބޭފުޅާ ވެސް މެ އެވެ. އޭނާ ވަނީ މި ދާއިރާ އިން މަތީ ތައުލީމު ހާސިލް ކުރައްވައިފަ އެވެ.

ސޮލާހުގެ ބައެއް ހިދުމަތްތައް ކުރުކޮށް:

- 2021- ދުބާއީގެ ޒާޔާ އަލް ބަރާރީގެ ކްލަސްޓާގެ ޖެނެރަލް މެނޭޖަރުކަން

- 2018- ކޮމަންޑޫ ރިސޯޓްގެ ޖެނެރަލް މެނޭޖަރުކަން

- 2018- ކުޑަދޫ ރިސޯޓްގެ މެނޭޖަރުކަން

- 2017- ހުރަވަޅި ރިސޯޓްގެ ޑިރެކްޓަ އޮޕަރޭޝަންސް

- 2015- ޒާޔާ ނުރާއި އައިލެންޑް (ދުބާއީ)ގެ ރޫމް އޮޕަރޭޝަންސް މެނޭޖަރު

- 2014- އަމިއްލަފުށި ރިސޯޓްގެ ފްރޮންޓް އޮފީސް މެނޭޖަރު

- 2013- ވިލަމެންދޫ ރިސޯޓްގެ ޑިރެކްޓަ އޮޕަރޭޝަންސް

- 2002- މީރު އައިލެންޑް ރިސޯޓްގެ ރިސެޕްޝަނުން ފެށިގެން ގޮސް ރޫމް ޑިވިޝަން މެނޭޖަރާ ހަމައަށް

ސޮލާހު މަގާމުގެ މަސްއޫލިއްޔަތު އަދާކުރައްވާނީ ކްރައުން އެންޑް ޗަމްޕާ ރިސޯޓްސްގެ ކުރެއްދޫ ރިސޯޓްގައި ހުންނަވައިގެންނެވެ. އެކަމަކު އެ ކުންފުނީގެ ހުރިހާ ރިސޯޓްތަކަށް އޭނާ ދަތުރުކުރައްވަން ޖެހިވަޑައިގަންނަވާނެ އެވެ.

އަޒުމަކީ ކުންފުނި އިތުރު ހަރުފަތަކަށް ގެންދިއުން: ސޮލާހު

ސޮލާހު ވިދާޅުވި ގޮތުގައި އޭނާ އަށް މި ލިބިވަޑައިގަތީ ކެރިއާގައި ވަރަށް ބޮޑު ޒިންމާއެއް އަދާކުރައްވަން ޖެހިވަޑައިގަންނަވާނެ ވަޒީފާ އެކެވެ. އަދި އެއީ ވަރަށް ބޮޑު ޗެލެންޖެއްގެ ގޮތުގައި ސިފަ ކުރައްވައި ވިދާޅުވީ، އެ ފުރުސަތަށް ޝުކުރުވެރިވާ ކަމަށެވެ.

"އަޅުގަނޑުގެ ޒިންމާއަކަށް ވާނީ ކުންފުނި އިތުރު ހަރުފަތަކަށް ގެންދިއުން،" އަންނަ މަހު 1 ގައި ވަޒީފާއާ ގުޅިވަޑައިގަންނަވާ ސޮލާހު ވިދާޅުވި އެވެ.

"ޓޫރިޒަމް ދާއިރާގެ ރާއްޖޭގެ އެންމެ ބޮޑު ކުންފުނި މިއީ. އެތައް ހާސް މުވައްޒަފުންނެއް އެބަ މަސައްކަތް ކުރޭ އެކި ރިސޯޓްތަކުގައި. އެތައް ބައިވަރު ގައުމެއްގެ މީހުން އެބަ މަސައްކަތް ކުރޭ."

"މިއީ ވަރަށް ބޮޑު ހަރުފަތެއް ކެރިއާގައި ލިބުނު. ވަރަށް ބޮޑު އުފަލެއް. ހާޑް ވޯކަށް ލިބުނު ރިވޯޑެއް."

އޭނާ ވިދާޅުވީ، މިއިން ދައްކައިދެނީ ޓޫރިޒަމް ދާއިރާގައި ދިވެހިންނަށް ފުރުސަތުތައް އޮތް ކަން ކަމަށެވެ. އަދި ވިދާޅުވީ، ހުރިހާ ވެސް ކާމިޔާބަކީ އެ މީހަކު އަދާކުރާ ތަޖުރިބާ ކަމަށެވެ.

"އަޅުގަނޑު ގަބޫލުކުރަނީ ތަޖުރިބާ އަކީ ވަރަށް މުހިންމު އެއްޗެއް ކަމަށް. އަޅުގަނޑު ވެސް ވަރަށް ގިނަ ތަޖުރިބާކޮށްފިން މި ދާއިރާގައި. އެއީ ކުރިއެރުމެއް ކަމަށް އަޅުގަނޑު ގަބޫލުކުރަނީ. އަޅުގަނޑަށް މިކަން ސިފަވީ މި ދާއިރާ އިން ކުރިއަށް ދާން ބޭނުންވާ މީހުން ޖޫނިއާ ވަޒީފާއެއް ކަމަށް ގަބޫލުކޮށްގެން ނުތިބުން. ފުރުސަތު އެބައޮތް،" އޭނާ ވިދާޅުވި އެވެ.

"އަޅުގަނޑަށް ދުބާއީން ވެސް މި ދޮޅު އަހަރެއްހާ ދުވަހުގެ ތެރޭގައި ދަސްވި އެއްޗަކީ އެވްރީތިން އިޒް ޕޮސިބަލް ކަން. ނުވާނެ ކަމެއް ނޯންނާނެކަން."