ފަރުތަކުގެ ސިއްހަތު ދެނެގަތުމަށް ބާއްވާ ފޮޓޯ މުބާރާތް ފަސްކޮށްފި

ރާއްޖޭގެ ފަރުތަކުގެ ސިއްހަތު ދެނެގަތުމަށް ހާއްސަކޮށްގެން މާދަމާ ބާއްވަން ހަމަޖެހިފައި އޮތް ފޮޓޯ މުބާރާތް އަންނަ މަހަށް ފަސްކޮށްފި އެވެ.

ރާއްޖޭގެ ޓޫރިޒަމް 50 އަހަރު ފުރުން ފާހަގަކުރުމަށް ބާއްވާ ހަރަކާތްތަކުގައި ހިމެނޭ އެ ހަރަކާތަކީ ޓޫރިޒަމް މިނިސްޓްރީން، އޯޝަން ޖިއޯގްރަފިކް ސޮސައިޓީ އަދި މޯލްޑިވްސް އެލައެންސް އޮފް ޑައިވް އޮޕަރޭޓާސް (މަޑޯ) އާ ގުޅިގެން ބާއްވާ ހަރަކާތެކެވެ.

ޓޫރިޒަމް މިނިސްޓްރީން ބުނިގޮތުގައި، އެއް ދުވަހަށް ކުރިއަށް ދާ އެ މުބާރާތް ފަސްކޮށްފައި ވަނީ އަންނަ މަހުގެ 21 ވަނަ ދުވަހަށެވެ. މުބާރާތް ލަސްވި ސަބަބެއް މިނިސްޓްރީން ހާމައެއް ނުކުރެ އެވެ.

އެ މުބާރާތުގައި ޓޫރިޒަމް މިނިސްޓްރީން މި މަހު ކުރީކޮޅު އިފްތިތާހު ކުރި ވެބްސައިޓުގައި ހިމެނޭ ރާއްޖޭގެ 50 ޑައިވްސައިޓްގެ ފޮޓޯ ނެގުމަށްފަހު ހުށަހަޅާނެ އެވެ.

އެ މުބާރާތުގެ މަގްސަދަކީ އެ 50 ޑައިވްސައިޓްގެ ފޮޓޯ ހުށަހެޅުމުން، އެއް އަހަރުން އަނެއް އަހަރަށްް އެ ތަންތަނަށް އައިސް ހުރި ބަދަލު ދެނެގަތުމެވެ.

ހާއްސަކޮށް ރިސޯޓުތަކާއި ޑައިވް ސެންޓަރުތަކާއި ޑައިވް ސްކޫލްތައް އަދި ސަފާރީތައް އެ މުބާރާތުގައި ބައިވެރިވުމަށް މުބާރާތް އިންތިޒާމުކުރާ ފަރާތުން ބާރުއަޅަ އެވެ.

ޓޫރިސްޓުން އާންމުންނަށް ވެސް ފޮޓޯ މުބާރާތުގައި ބައިވެރިވެވޭނެ އެވެ. ބައިވެރިވާން 10 ޑޮލަރު ދައްކަން ޖެހޭ ނަމަވެސް، ދިވެހިންނަށް އެ މުބާރާތުގައި ހިލޭ ބައިވެރިވެވޭނެ އެވެ.

އެއް އަހަރުން އަނެއް އަހަރަށް ފަރުތަކުގެ ސިއްހަތަަށް އަންނަ ބަދަލުތައް ދެނެގަތުމުގެ މަސައްކަތް ކުރިއަށް ގެންދިއުމަށް ހަމަޖެހިފައި ވަނީ ދިރާގާ ގުޅިގެން ކަމަށް ޓޫރިޒަމް މިނިސްޓްރީން ބުންޏެވެ.