ރާއްޖޭން ޑައިވިންގެ ދުނިޔޭގެ ރެކޯޑު މުގުރާލައިފި

ފްރީ ޑައިވިން އިން އިޓަލީން ހަދާފައިވާ ދުނިޔޭގެ ރެކޯޑު ރާއްޖޭން މިއަދު މުގުރާލައިފި އެވެ.

ރާއްޖެ އިން އެންމެ ގިނަ ޑައިވަރުން އެއް ފަހަރާ ފްރީޑައިވް ކުރުމުގެ ރެކޯޑް ހެދީ 521 ޑައިވަރުންނާ އެކު އެކު ޑައިވްކޮށްގެންނެވެ. އިޓަލީން މި ރެކޯޑް 2009 ވަނަ އަހަރު ހަދާފައި ވަނީ 280 މީހުންނާ އެކު އެވެ. މި ރެކޯޑް މުގުރާލުމަށް ޑައިވަރުން 30 ސިކުންތު ވަންދެން މޫދު އަޑީގައި ތިބެން ޖެހެ އެވެ.

ދުނިޔޭގެ ޓޫރިޒަމް ދުވަހާ ގުޅިގެން ބަރޮސް މޯލްޑިވްސްގައި ކުރިއަށްގެންދިޔަ މި ހަރަކާތުގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވެސް ޑައިވް ކުރެއްވި އެވެ. އެ މަނިކުފާނުގެ އިތުރުން ޓޫރިޒަމް މިނިސްޓަރު އަލީ ވަހީދު އާއި ފްރީޑައިވިން އިން ދެ ފަހަރު ދުނިޔޭގެ އެއްވަނަ ހޯދާފައިވާ ވިލިއަމް ޓްރޫ ބްރިޖް ވެސް މި އިވެންޓުގައި ބައިވެރި ވިއެވެ. ނަމަވެސް މިނިސްޓަރު އަލީ ވަހީދު މި ރެކޯޑް ހެދުމުގެ ޑައިވްގައި ޑައިވް ކުރައްވައިފައެއް ނުވެ އެވެ.

މި ރެކޯޑް މުގުރާލުމުގެ އިވެންޓަށް ގިނިސް ވޯލްޑް ރެކޯޑުގެ އޮފިޝަލުން ވަޑައިގެން ވަނީ ޖަޖު ކޮށްފަ އެވެ.

މިނިސްޓަރު އަލީ ވަހީދު ވިދާޅުވީ މިއަދަކީ ރާއްޖޭގެ ތާރީހުގައި ވަރަށް މުހިންމު ދުވަހެއް ކަމަށެވެ. އަދި ފުރަތަމަ ފަހަރަށް ރާއްޖޭގެ ރައީސަކު މިފަދަ ހަރަކާތެއްގައި ބައިވެރިވުމަކީ ކާމިޔާބީގެ އުފާވެރިކަން އިތުރުވެގެންދާކަމެއް ކަމަށް ވެސް މިނިސްޓަރު ވިދާޅުވި އެވެ.

މިއަދު ހަވީރު ބަރޮސް މޯލްޑިވްސްގެ ފަޅުގައި ކުރިއަށްގެންދިޔަ މި ހަރަކާތުގައި ދައުލަތުގެ ވަޒީރުންނާއި ބައެއް އިސް ފަރާތްތަކުގެ އިތުރުން ދުނިޔޭގެ ނަން މަޝްހޫރު ފްރީ ޑައިވަރުން ބައިވެރިވި އެވެ.