ޕާކިސްތާނަށް އެހީވާ ޓެލެތޯނުން ލިބުނު 3.8 މިލިއަން ރުފިޔާ ހަވާލުކޮށްފި

ވިއްސާރައިގެ ސަބަބުން ޕާކިސްތާނުގައި ހާލުގައި ޖެހުނު މީހުންނަށް އެހީވާން ބޭއްވި ޓެލެތޯނުން ލިބުނު 3.8 މިލިއަން ރުފިޔާ ރޭ ހަވާލުކޮށްފި އެވެ.

"ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަން" އިން އިސް ނަގައިގެން ރާއްޖޭގެ ބައެއް މީޑިއާތަކާ ގުޅިގެން ޓެލެތޯން ބޭއްވީ މި މަހުގެ 1 ވަނަ ދުވަހު އެވެ.

އެ ދުވަހުގެ ހެނދުނު 8:00 ގައި އެ ހަރަކާތް ފަށައި ރޭގަނޑު 12:00 ހާއިރު ޓެލެތޯން ނިންމާލިއިރު، ޕާކިސްތާނަށް އެހީވާން ހުޅުވާފައިވާ އެކައުންޓަށް އެކަނި ވެސް މިލިއަނަކަށް ވުރެ ގިނަ ރުފިޔާ ލިބުނެވެ. މާލޭގެ އެކި ސަރަހައްދުތަކާއި ބައެއް ރަށްރަށުގައި ވަނީ ފަންޑަށް އެހީވާން ފޮށިތައް ބަހައްޓައިފަ އެވެ.

ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަންގެ ނައިބު ރައީސް ހަމްދޫން ރަޝީދު މިއަދު ވިދާޅުވީ ފަންޑު ފޮށިތަކާއި ދިރާގު ޕޭ އަދި އުރީދޫ އެމްފައިސާގެ އިތުރުން އެކި އިދާރާތަކުން ހަދިޔާކުރި ފައިސާއާއެކު، އެ ހަރަކާތުން 3.8 މިލިއަން ރުފިޔާ ލިބުނު ކަމަށެވެ.

ޓެލެތޯނުން ލިބުނު ހުރިހާ ފައިސާއެއް ވަނީ، ޕާކިސްތާނުން ރާއްޖެ ކަނޑައަޅާފައި ހުންނަވާ ސަފީރު އަތަރު މުހުތަރު އަށް، ދިވެހިރާއްޖޭގެ އަޑުގައި ބޭއްވި ހަފުލާއެއްގައި ރޭ ހަވާލުކޮށްފަ އެވެ.

އެ ހަރަކާތަށް އެހީތެރިވި ފަރާތްތަކަށް ވެސް ޕާކިސްތާނު މޯލްޑިވްސް ފްރެންޑްޝިޕް އެސޯސިއޭޝަނުން ސެޓްފިކެޓް ހަވާލުކުރި އެވެ. އޭގެ ތެރޭގައި ވޮލެންޓިއަރު ހަ ފަރާތަކާއި ނުވަ މީޑިއާއެއް ހިމެނެ އެވެ.

މިދިޔަ ޖޫން މަހުން ފެށިގެން ޕާކިސްތާނަށް ކުރަމުންދާ ގަދަ ވިއްސާރައިގައި، އެ ގައުމުގެ ތިން ބައިކުޅަ އެއްބަޔަށް ވުރެ ބޮޑު ސަރަހައްދެއްގައި ވަނީ ފެންބޮޑުވެފަ އެވެ. ފެން ބޮޑުވުމުގެ އިތުރުން ބިންގަނޑު ކަނޑައިގެން ދިއުމާއި ކިސަޑު ފޭބުމުގެ ހާދިސާތައް މެދުވެރިގެން 1،700 އެއްހާ މީހުން މިހާތަނަށް މަރުވެ، 33 މިލިއަނަށް ވުރެ ގިނަ މީހުން ވަނީ ހާލުގައި ޖެހިފަ އެވެ.