ތާލިބާންގެ މަންދޫބާ ބައްދަލުކުރި މައްސަލާގައި ތޯހާ އަނބުރާ ރާއްޖެ ގެންނަނީ

އަފްޣާނިސްތާނުގެ ސަރުކާރު ވައްޓައިލުމަށްފަހު، އެ ގައުމުގައި ވެރިކަންކުރަމުންދާ ހަނގުރާމެރި ޖަމާއަތް، ތާލިބާނުން ޕާކިސްތާނަށް އައްޔަނުކޮށްފައި ހުރި މަންދޫބާ، ރާއްޖެ އިން ޕާކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ތޯހާ މިދިޔަ ހަފުތާގައި ބައްދަލުކުރެއްވި މައްސަލާގައި އޭނާ އަނބުރާ ރާއްޖެ ގެންނަން ދިވެހި ސަރުކާރުން ނިންމައިފި އެވެ.

ތޯހާ ވަނީ އަފްޣާނިސްތާނުން ޕާކިސްތާނަށް ހަމަޖައްސާފައިވާ ސަފީރު ސަރުދާރު އަހުމަދު ޝަކީބުއާ ޕާކިސްތާނުގެ ވެރިރަށް، އިސްލާމްއާބާދުގައި މިދިޔަ ހުކުރު ދުވަހު ބައްދަލުކުރައްވައިފަ އެވެ. އެއާ އެކު، ތާލިބާން ޖަމާއަތުން އަފްޣާނިސްތާނުގައި ހިންގާ ވެރިކަން ރާއްޖޭން ބަލައިގަތީ ތޯ ގިނަ ބަޔަކު ވަނީ ސުވާލު އުފައްދައިފަ އެވެ. އެކަމާ ގުޅިގެން، ފޮރިން މިނިސްޓްރީން އިއްޔެ ނެރުނު ބަޔާނެއްގައި ބުނީ އަފްޣާނިސްތާނުގެ މަންދޫބާ، ތޯހާ ބައްދަލުކުރެއްވީ ދިވެހި ސަރުކާރުގެ ހުއްދަ ނެތި ކަމަށާއި އެކަމުގައި އޭނާ އަށް ފިޔަވަޅު އަޅާފައިވާ ކަމަށެވެ.

އެނގިފައިވާ ގޮތުގައި، ސަރުކާރުން ވަނީ ތޯހާ އަނބުރާ ގެންނަން ނިންމައި، އެކަން އޭނާ އަށް އަންގައިފަ އެވެ. ނަމަވެސް، މިކަމުގައި ފޮރިން މިނިސްޓްރީން ރަސްމީކޮށް އަދި އެއްޗެއް ނުބުނެ އެވެ.

އެ މިނިސްޓްރީން އިއްޔެ ނެރުނު ބަޔާނުގައި ބުނީ ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލު އުފެދޭ ހާލަތެއްގައި އަބަދު ވެސް ބަލަނީ އދ. އިން ކަނޑައަޅާފައިވާ މިންގަނޑުތަކާ އުސޫލުތަކަށް ކަމަށެވެ. އެ އުސޫލާ އެއްގޮތަށް، އދ. ގައި އަފްޣާނިސްތާނު ތަމްސީލުކުރާ ފަރާތަކީ، އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ވެސް ބަލައިގަންނަ ފަރާތް ކަމަށް ބުންޏެވެ.

އެމެރިކާ އާއި އިނގިރޭސި ސިފައިން 20 އަހަރު ވަންދެން އަފްޣާނިސްތާނު އަޅުވެތިކޮށް ތިބުމަށް ފަހު، އޮގަސްޓް 2021 ގައި އެ ގައުމުން ފޭބުމާ އެކު، ތާލިބާނުންގެ ހަނގުރާމަވެރިން ވަނީ އެ ގައުމުގައި އޮތް ސަރުކާރު ވައްޓާލައި، ވެރިކަމަށް އަރައިފަ އެވެ.

ތާލިބާނުން އަފްޣާނިސްތާނުގެ ވެރިކަމާ ހަވާލުވިތާ ތިން އަހަރު ވެގެން ދިޔައިރު ވެސް ގިނަ ގައުމަކުން އަދި ބައިނަލްއަގުވާމީ ޖަމާއަތަކުން ވެސް ތާލިބާނުންގެ ސަރުކާރު ގަބޫލެއް ނުކުރެ އެވެ.

ޕާކިސްތާނުގައި ހުންނަވާ ދިވެހި ސަފީރަކަށް ނ. ހޮޅުދޫ އުފަންވެލި، ތޯހާ މުހައްމަދު ހަމަޖެއްސެވުމުގެ ކުރިން އޭނާ ފުރަތަމަ ކަނޑައެޅީ ސައޫދީ އަރަބިއްޔާގެ ސަފީރަކަށެވެ. ސައޫދީ ސަފީރަކަށް ތޯހާ އައްޔަން ކުރަން ފެންނަ ކަމަށް ރައްޔިތުންގެ މަޖިލިހުން ރުހުން ވެސް ދީފައި ވަނިކޮށް، އޭނާ ޕާކިސްތާނަށް ބަދަލުކުރަން ދިވެހި ސަރުކާރުން ނިންމީ އެވެ. އެކަމަކު، އޭގެ ސަބަބެއް ނުބުނެ އެވެ.

ތޯހާ، އޭނާގެ ސަފީރުކަމުގެ ފަތްކޮޅު ޕާކިސްތާނުގެ ރައީސް އާސިފް އަލީ ޒަރްދާރީ އަށް އެރުވީ މިދިޔަ އޯގަސްޓު މަހުގެ 14 ވަނަ ދުވަހު އެވެ.