ބައި ކިލޯ ޑްރަގް މައްސަލައެއް، އުމުރު ދުވަހުގެ އަދަބު 12 އަހަރަށް ކުޑަކޮށްފި

ބައި ކިލޯއެއްހާ ޑްރަގް ގެންގުޅުނު މީހަކާ އެކު ދައުލަތުން ހެދި އިއުތިރާފްގެ އެއްބަސްވުމެއްގެ ދަށުން، އުމުރު ދުވަހުގެ ޖަލު ހުކުމުގެ އަދަބު 12 އަހަރުގެ ޖަލު ހުކުމަކަށް ކުޑަކޮށްފި އެވެ.

މަސްތުވާތަކެތި ޓްރެފިކް ކުރުމުގެ ކުށަށް ގާނޫނުގައި އޮންނަ އެންމެ ލުއި އަދަބަކީ ވެސް އުމުރަށް ޖަލަށްލުމާ އެކު 100،000ރ. އިން ޖޫރިމަނާ ކުރުމެވެ.

މާލޭގެ އެޕާޓްމެންޓަކުން އޮކްޓޫބަރު، 2020 ގައި ބައި ކިލޯއެއްހާ ޑްރަގާ އެކު އަތުލައިގަތް އާދަމް ސަމޫހަށް އަދަބު އެއަށް ވުރެ ލުއިވީ އޭނާ ކުށަށް އިއުތިރާފްވުމުން އޭނާގެ އަދަބު 12 އަހަރަށް ލުއިކުރަން ދައުލަތުން އެއްބަސްވުމެއް ހެދުމުންނެވެ. އަދި އެއްބަސްވުމާ އެއްގޮތަށް ކޯޓުގައި ކުށަށް އިއުތިރާފްވި އެވެ.

އެއްބަސްވުމުގައިވާ ގޮތަށް މިދިޔަ ހޯމަ ދުވަހު ކްރިމިނަލް ކޯޓުން ހުކުމްކުރީ އޭނާ 12 އަހަރާއި ހަ މަހަށް ޖަލަށްލުމެވެ. އެކަމަކު އޭނާ އެއް އަހަރާއި 11 މަސް ބަންދުގައި ހޭދަކޮށްފައިވާތީ އޭނާ ތަންފީޒު ކުރަން ޖެހެނީ 10 އަހަރުގެ ޖަލު ހުކުމެކެވެ.

ޖަލު ހުކުމުގެ އަދަބު ކުޑަކުރިޔަސް، ޖޫރިމަނާގެ އަދަބު ލުޔެއް ނުކުރެ އެވެ. އެހެންވެ، ގާނޫނުގައި އޮންނަ 100،000ރ. އިން އޭނާ ވަނީ ޖޫރިމަނާކޮށްފަ އެވެ.