ފަރުވާ ހޯދާ މީހުންނަށް ޑްރަގް ދީގެން ޖިންސީ ގުޅުން ހިންގުމުގެ ތުހުމަތުގައި ހައްޔަރުކުރި މީހާ 15 ދުވަހަށް ބަންދު

ފަރުވާ ހޯދަން ދާ ކްލަޔަންޓުންނަށް މަސްތުވާތަކެތި ދީގެން، ޖިންސީ ގުޅުން ހިންގާ ކަމަށް ތުހުމަތު ކުރެވޭ މައްސަލާގައި ހައްޔަރުކުރި އެންޑީއޭގެ މުވައްޒަފު ތަހުގީގުގެ ބޭނުމަށް 15 ދުވަހުގެ މުއްދަތަށް ބަންދުގައި ބަހައްޓަން ކޯޓުން މިއަދު އަމުރުކޮށްފި އެވެ.

މަސްތުން ސަލާމަތްވުމުގެ ފަރުވާ އަށް އެންޑީއޭ އަށް ދާ މީހުންނަށް، މަސްތުވާތަކެތި ދީގެން ނަހަމަ ގުޅުން ބާއްވާ ކަމަށް ތުހުމަތު ކުރެވޭ މައްސަލަ އެ އިދާރާ އިން މި މަހުގެ 4 ވަނަ ދުވަހު ވަނީ ފުލުހުންނަށް ހުށަހަޅައިފަ އެވެ.

އެ މައްސަލައާ ގުޅިގެން، އެންޑީއޭގައި ޕިއާ މެންޓާއަކަށް މަސައްކަތް ކުރަމުން އައި އައްޑޫ ފޭދޫ، މުހައްމަދު ފަސީހު، 51، ކޯޓު އަމުރެއްގެ ދަށުން ހައްޔަރުކުރީ އިއްޔެ އެވެ.

ފުލުހުންގެ މީޑިއާ އޮފިޝަލް މިރޭ ވިދާޅުވީ ފަސީހުގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ތަހުގީގުގެ ބޭނުމަށް 15 ދުވަހަށް ބަންދުކުރަން އަމުރު ކޮށްފައިވާ ކަމަށެވެ.

ފަރުވާ ހޯދަން ދާ މީހުންނަށް މަސްތުވާތަކެތި ދޭ މައްސަލަ މީގެ ދުވަސްކޮޅެއް ކުރިން ސޯޝަލް މީޑިއާގައި ފެންމަތިކޮށްފައި ވެ އެވެ. ސަފީހު އަށް ތުހުމަތު ކޮށްފައި ވަނީ ޖިންސީ ގޯނާކޮށް ކްލަޔަންޓުންގެ ބަރަހަނާ މަންޒަރު ވީޑިއޯ ކުރާ ކަމަށެވެ.