ކުއްޔަށް އުޅޭ މީހުންގެ ނަމުގައި ފެނާއި ކަރަންޓް ބިލުކުރެވޭ ގޮތް ހަދަން ފާސްކޮށްފި

ކުއްޔަށް ދީފައިވާ ތަންތަނުގެ ފެނާއި ކަރަންޓަށް ބިލުކުރާއިރު، ގޭގެ ވެރި މީހާގެ ބަދަލުގައި އެ ތަންތަން ކުއްޔަށް ހިފައިގެން އުޅޭ މީހާގެ ނަމުގައި ބިލުކުރެވޭ ގޮތަށް ހަދަން ޔުޓިލިޓީ ރެގިއުލޭޓަރީ އޮތޯރިޓީގެ ގާނޫނަށް ހުށަހެޅި އިސްލާހު ރައްޔިތުންގެ މަޖިލީހުން މިއަދު ފާސްކޮށްފި އެވެ.

ސަރުކާރުގެ ފަރާތުން މަޖިލީހަށް އެ ބިލު ހުށަހެޅުއްވީ ކެލާ ދާއިރާގެ މެމްބަރު އިބްރާހީމް ޝަރީފެވެ. އޭނާ އެ ބިލު ހުށަހެޅުއްވީ ފެނާއި ކަރަންޓުގެ ހިދުމަތް ހޯދާ ފަރާތްތަކަށް ބިލުކުރާ މުއްދަތު ތަފާތުވުމުގެ ސަބަބުން ބިލު ދެއްކުމުގައި ދިމާވާ ދަތިތަކަށް ހައްލެއް ހޯދައި ދިނުމުގެ މަގުސަދުގަ އެވެ.

ވެރި މީހާ އާއި ކުއްޔަށް ހިފާ މީހާގެ ހައްގުތައް ހިމާޔަތްކޮށްދީ، ބިލަށް ފައިސާ ދެއްކުމުގައި މަދުވެގެން ދޭން ޖެހޭނެ މުއްދަތު ކަނޑައެޅުމާ ބެހޭ އުސޫލެއް ހަދައި އަދި ބިލު ދެއްކުމުގައި ލުއިތައް ދޭނެ އުސޫލުތަކެއް ހެދުމަކީ ވެސް އެ އިސްލާހުގެ ބޭނުމެއް ކަމަށް ބުނެފައިވެ އެވެ.

އެ އިސްލާހުގައި ބުނީ ފެނާއި ކަރަންޓް ފަދަ އަސާސީ ހިދުމަތްތަކުގެ ތެރެއިން މީޓަރު މެދުވެރިކޮށް ދޭ ހިދުމަތްތަކުގައި މީޓަރު ރަޖިސްޓްރީކޮށްފައި ހުންނަން ވާނީ އިމާރާތުގެ ވެރި މީހާގެ ނަމުގައި ކަމަށްވީ ވިޔަސް، އެ ހިދުމަތް ހޯދަނީ އެހެން މީހަކު ނަމަ، އެ މީހެއްގެ ނަމުގައި ރަޖިސްޓްރީ ކުރެވޭނެ ކަމަށެވެ. އަދި އެކަން ކުރުމަށް އުސޫލެއް ހަދަން ވެސް އެ އިސްލާހުގައި ބުންޏެވެ.

އެ ބިލު ދިރާސާކުރި މަޖިލީހުގެ އެންވަޔަރުމެންޓް އެންޑް ކްލައިމެޓް ޗޭންޖު ކޮމިޓީން ވަނީ ޔުޓިލިޓީ ހިދުމަތްދޭ ކުންފުނިތަކުގެ އިތުރުން ކަމާ ގުޅޭ އެހެން އިދާރާތަކާ ބައްދަލުކޮށް ލަފާ ވެސް ހޯދައިފަ އެވެ.

އެ ކޮމެޓީގައި ބައެއް މެމްބަރުން ވިދާޅުވެފައިވާ ގޮތުގައި، ހާއްސަކޮށް މާލޭގައި ގިނަ ބަޔަކު ދިރިއުޅެނީ ކުއްޔަށް ކަމަށްވެފައި، އެ ތަންތަން ދޫކޮށް ދާއިރު ބިލު ނުދެއްކުމާއި އަދި ކުއްޔަށް އުޅޭ މީހާގެ ނަމުގައި މީޓަރު ނުހުންނާތީ ސަބްސިޑީ ހޯދުން ފަދަ ކަން ކަމަށް ވެސް ދަތިވާ ކަމަށެވެ. އެހެންވެ، މި ގެނައި އިސްލާހާ އެކު އެ މައްސަލަ އަށް ހައްލެއް ލިބޭނެ ކަމަށެވެ.

ކޮމިޓީން ގެނައި ބަދަލުތަކާ އެކު މަޖިލީހުގެ މިއަދުގެ ޖަލްސާގައި އެ ބިލު ފާސްކުރީ އެ ވޯޓުގައި ބައިވެރިވި 57 މެމްބަރުންގެ ތާއިދާއެކު އެވެ.