ސިނގިރެޓް ފޮށިތަކެއް ވަގަށް ނެގި މީހަކު ހަތް މަހަށް ޖަލަށް

ވަގަށް ފިހާރަކަށް ވަދެ، ސިނގިރެޓް ފޮށިތަކެއް ނެގި މީހަކު ހަތް މަހަށް ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

ގއ. ކޮލަމާފުށީ ނަސީމީގޭ އަހުމަދު އާރިފްގެ މައްޗަށް އެ ހުކުމް އައީ 2019 ވަނަ އަހަރު މާލޭގެ ފިހާރެއްގެ ދޮރު ހަލާކުކޮށްލައިގެން އެތަނަށް ވަދެ، 14 ސިނގިރޭޓް ފޮށްޓާއި 450ރ. ވަގަށް ނެގުމުންނެވެ.

އެ މައްސަލާގައި އޭނާގެ މައްޗަށް ތިން ދައުވާއެއް ދައުލަތުން ކުރި އެވެ. އެއީ ވައްކަމުގެ ދައުވާ އާއި ފިހާރައިގެ ދޮރަށް ގެއްލުން ދިނުމުން މުދަލަށް ގެއްލުން ދިނުމުގެ ދައުވާ އާއި ސިއްރުން އެތަނަށް ވަދެފައިވާތީ އެނގިހުރެ ހުއްދަ ނޫން ތަނަކަށް ވަނުމުގެ ދައުވާ އެވެ.

އެ ތިން ދައުވާއަށް ވެސް އޭނާ ކޯޓުގައި އެއްބަސްވި އެވެ.

އޭނާގެ އިއުތިރާފުން ކުށް ސާބިތުވާތީ، މިދިޔަ ބުދަ ދުވަހު ވައްކަމުގެ ދައުވާގައި އިއްވީ ހަތަރު މަހާއި 24 ދުވަހުގެ ޖަލު ހުކުމެކެވެ. އެނގިހުރެ ހުއްދަ ނޫން ތަނަކަށް ވަނުމުގެ ދައުވާގައި އިއްވީ ދެ މަހާއި 12 ދުވަހުގެ ޖަލު ހުކުމެކެވެ. އަދި މުދަލަށް ގެއްލުން ދިނުމުގެ ކުށުގައި އިއްވީ ނުވަ ދުވަހުގެ ޖަލު ހުކުމެކެވެ.