ހިޔާ ފްލެޓްތަކަށް އަލުން ކަރަންޓު ދޭން ގިނަ ވަގުތުތަކެއް ނަގާނެ: ސްޓެލްކޯ

ހުޅުމާލެ 2 ގެ ހިޔާ ޓަވަރުތަކުން މިއަދު ހެނދުނު ކަރަންޓުގެ ހިދުމަތް ކެނޑުނީ އެ ޓަވަރުތަކަށް ކަރަންޓު ދިނުމަށްޓަކައި އަޅާފައިވާ މައި ކޭބަލަކަށް ލިބުނު ގެއްލުމަކުން ކަމަށާއި އެ މައްސަލަ ހައްލު ކުރަން ގިނަ ވަގުތުތަކެއް ނަގާނެ ކަމަށް ސްޓެލްކޯ އިން ދެންމެ ބުނެފި އެވެ.

އެ ކުންފުނިން ބުނީ، މައި ކޭބަލަށް ގެއްލުންވީ، ހުޅުމާލެ 2 ގައި އިމާރާތްކުރުމުގެ މަސައްކަތްކުރާ ބަޔަކު ކޮންނަނިކޮށް ކަމަށެވެ. އެހެންވެ، އެ ކޭބަލް މަރާމާތު ކުރުމުގެ މަސައްކަތް ސްޓެލްކޯ އިން އަންނަނީ ކުރަމުންނެވެ.

ސްޓެލްކޯ އިން ބުނީ، ހިޔާ ޓަވަރުތަކަށް ކަރަންޓު ދިނުމަށް އަޅާފައިވާ ކޭބަލް މަރާމާތު ކުރުމަށް ގިނަ ވަގުތުތަކެއް ނަގާނެ ކަމަށް މިހާރު ބެލެވޭތީ، އެ ކޭބަލް ވަކިކޮށް، އެހެން ކޭބަލެއް މެދުވެރިކޮށް އަލުން ކަރަންޓު ދިނުމުގެ މަސައްކަތް މިހާރު އަންނަނީ ކުރަމުން ކަމަށެވެ.

"މި މަސައްކަތަށް ހޭދަވާނީ 2 ގަޑިއިރު ކަމަށް ބެލެވޭ،" ސްޓެލްކޯ އިން ބުންޏެވެ.

ހުޅުމާލެ 2 ގައި އިމާރާތް ކޮށްފައިވާ 25 ބުރީގެ 16 ޓަވަރުގައި ވިއްސަކަށް ހާސް މީހުން ދިރިއުޅެ އެވެ. ކޮންމެ ޓަވަރެއްގައި 3-4 ލިފްޓް ހުންނައިރު މިއަދު ކަރަންޓު ކެނޑުނު ވަގުތު ޓަވަރު އެކެއްގެ ލިފްޓެއްގައި ތިބި ބަޔަކު ގަޑިއެއްހާއިރަށް ތާށިވި އެވެ. އެ މީހުން ލިފްޓުން ނެރުނީ ލިފްޓްތައް ސާވިސް ކުރާ މީހުންގެ އެހީތެރިކަމާއެކު އެވެ.