މާލޭގެ މީހުންނަށް ގޯތި ދޭ އުސޫލުގެ މައްސަލަ ހައި ކޯޓަކަށް ނުބެލޭނެ: ދައުލަތް

މާލެ ސަރަހައްދުން މާލޭގެ މީހުންނަށް ގޯތި ދޫކުރުމުގެ އުސޫލު ބާތިލްކުރަން ހައި ކޯޓަށް ހުށަހެޅި މައްސަލަ ފުރަތަމަ މަރުހަލާގައި އެ ކޯޓަށް ނުބެލޭނެ ކަމަށް ބުނެ، އެ މައްސަލަ ބޭރުކޮށްލަން ދައުލަތުން މިއަދު އެދެފި އެވެ.

ބިންވެރިޔާ ސްކީމްގެ ދަށުން މާލޭގެ މީހުންނަށް މާލެ ސަރަހައްދުން ގޯތި ދިނުމާ ބެހޭގޮތުން ހައުސިން މިނިސްޓްރީން އެކުލަވާލި އުސޫލުގައި މާލޭގެ ރައްޔިތުންގެ ކަމުގައި ބަލާނެ މިންގަނޑު ބާތިލު ކުރަން ހައި ކޯޓަށް ދުސްތޫރީ މައްސަލައެއް ހުށަހެޅުއްވީ ވަކީލު ހުސައިން ޝިހާދާއި ހަސަން ފަލާހެވެ.

އެ މައްސަލާގެ އަޑުއެހުންތައް ހައި ކޯޓުގައި މިއަދުން ފެށުމާ އެކު، އެޓާނީ ޖެނެރަލްގެ އޮފީހުން އިޖުރާއީ ނުކުތާއެއް ނެގީ އެއީ ދުސްތޫރީ މައްސަލައަކަށް ނުވާތީ ފުރަތަމަ މަރުހަލާގައި ހައި ކޯޓަށް އެ މައްސަލަ ނުބެލޭނެ ކަމަށް ބުނެ އެވެ.

ދައުލަތުން ބުނި ގޮތުގައި ދުސްތޫރީ މައްސަލައަކަށް ވަނީ ގާނޫނެއް ނުވަތަ ގަވާއިދެއް ބާތިލުކުރަން ހުށަހަޅާ މައްސަލަތައް ކަމަށް ވާއިރު، ގޯތި ދޫކުރުމުގެ އުސޫލަކީ ގަވާއިދުގެ ބައެއް ނޫނެވެ. އެއީ ގޯތި ދޫކުރުމަށް ކުރި އިއުލާނުގެ ބަޔަކަށް ވާތީ އެއީ އިދާރާއަކުން ނިންމި ނިންމުމެއް ކަމަށް ދައުލަތުން ބުންޏެވެ.

ފަލާހް ވިދާޅުވީ އެއީ ހައުސިން މިނިސްޓްރީން ހެދި ގަވާއިދެއްގެ ދަށުން އެކުލަވާލި އުސޫލެއް ކަމަށް ވާއިރު، އެ މައްސަލަ ދުސްތޫރީ މައްސަލައިގެ މާނައިގެ ތެރެއަށް ވަންނާނެ ކަމަށެވެ. ދައުލަތުގެ އިދާރާތަކުން ނިންމާ ނިންމުންތައް ވެސް ދުސްތޫރީ މައްސަލާގެ ތެރެއަށް ވަންނަ ކަމަށް އޭނާ ވިދާޅުވި އެވެ.

އެއީ އިއުލާނެއްގެ ބައެއް ކަމަށް ދައުލަތުން ބުނާތީ ފަނޑިޔާރުންގެ ބެންޗުން ސުވާލު ކުރެއްވީ ގޯތި ދޫކުރުމުގެ ޝަރުތެއް އިއުލާނަކުން ކަނޑައަޅަނީ ކިހިނެއްތޯ ވިދާޅުވެ އެވެ. ފަލާހް ވެސް ވިދާޅުވީ އިއުލާނަކީ ޝަރުތު ކަނޑައަޅާ އެއްޗެއް ނޫން ކަމަށެވެ.

ދައުލަތުން ބުނީ ގޯތި ދޫކުރަން އިއުލާން ކުރާއިރު އިތުރު ޝަރުތުތަކެއް ކަނޑައެޅުމުގެ ބާރު ބަންޑާރަ ގޯތި ދޫކުރުމުގެ ގަވާއިދުގެ ދަށުން އޮންނަ ކަމަށެވެ.

އިތުރު ޝަރުތު ކަނޑައަޅާނީ ގަވާއިދުގެ ދަށުން ކަމަށްވާ ނަމަ، އެ ޝަރުތުތައް ގަވާއިދުގެ ބަޔަކަށް ނުވަނީ ކީއްވެގެންތޯ ބެންޗުން ސުވާލު ކުރެއްވި އެވެ. ދައުލަތުން ބުނީ އެ ހާލަތުގައި އެ ޝަރުތެއް ބާތިލް ކުރެވޭނީ ދަށު ކޯޓަކުން ކަމަށެވެ.

އެ މައްސަލާގައި ދެން އޮންނާނީ އެ މައްސަލަ ކުރިއަށް ގެންދެވޭނެ ކަމާ މެދު ގޮތެއް ނިންމުން ކަމަށް ބެންޗުން އިއުލާން ކުރެއްވި އެވެ.

އެ މައްސަލާގައި ވަގުތީ އަމުރަކަށް އެދުނުއިރު، ލިޔުމުގެ ކުށެއް އޮތުމުން ފަނޑިޔާރުން ނިންމެވީ އަމުރާ މެދު މިހާރު ގޮތެއް ނުނިންމޭނެ ކަމަށެވެ.

މި މައްސަލަ ހައި ކޯޓުން ބައްލަވަނީ ފަސް ފަނޑިޔާރުންގެ ބެންޗުންނެވެ. އެއީ ފަނޑިޔާރު މުހައްމަދު ނިޔާޒާއި ފަނޑިޔާރު ހުސައިން މަޒީދާއި ފަނޑިޔާރު ފާތިމަތު ފަރުހީޒާ އާއި ފަނޑިޔާރު ހުޒައިފާ މުހައްމަދާއި ފަނޑިޔާރު ދީބާނާޒް ފަހުމީ އެވެ. ރިޔާސަތަކީ ފަނޑިޔާރު ނިޔާޒެވެ.