ތިލަފުށީގެ ފަޅުތެރެ ކުނިން ފުރިއްޖެ

މޫދަށް އުކާލައިފައި ހުންނަ ކުނިތަކުން ކ. ތިލަފުށީގެ ފަޅުތެރެ ފުރިއްޖެ އެވެ.

ވޭސްޓް މެނޭޖުމަންޓް ކޯޕަރޭޝަން (ވެމްކޯ) ގެ އޮފިޝަލަކު "މިހާރު" އަށް މިއަދު ވިދާޅުވީ ތިލަފުށީގެ ބައެއް ސައިޓުތަކުން މޫދަށް އެޅިފައި ހުންނަ ކުންޏާއި ދޯނިފަހަރުންނާއި އެހެން ގޮތްގޮތުން ވެސް މޫދަށް އެޅިފައި ހުންނަ ކުނިބުނިން ތިލަފުށީގެ ފަޅުތެރެ ފުރިފައިވާ ކަމަށެވެ.

"މިހާރު އޮއިވަރު ހުރި ގޮތުން އެ ހުރިހާ ކުންޏެއް އެއްތަނަކަށް ޖަމާވެފައި ހުރީ،" އޮފިޝަލް ވިދާޅުވި އެވެ.

މާލެ ސަރަހައްދުގައި ކުނި މެނޭޖު ކުރުމުގެ މަސައްކަތް ކުރާ ވެމްކޯ އިން ބުނިގޮތުގައި ތިލަފުށީގެ ފަޅުތެރޭގައި ހުރި ކުނިތައް ނެގުމުގެ މަސައްކަތް އެ ކުންފުނިން އަންނަނީ ކުރަމުންނެވެ.

ވެމްކޯ އިން ޓުވީޓް ކުރި ފޮޓޯތަކުން ފެންނަ ގޮތުގައި، ތިލަފުށީގެ ފަޅުތެރެ އޮތީ ލަކުޑި އާއި ފުޅިމަދާއި އަދި އެކި ވައްތަރުގެ ޕްލާސްޓިކް ކުނިބުނިން ފުރިފަ އެވެ. އެ ކުންފުނީގެ ވެހިކަލެއް ބޭނުންކޮށްގެން ކުނިތައް ނެގުމުގެ މަސައްކަތް ކުރާތަން ވެސް ފޮޓޯތަކުން ފެނެ އެވެ.

މީގެ ކުރިން ވެސް، ތިލަފުށީގެ ފަޅުތެރޭގައި ކުނިބުނި ގިނަވެ، ކުނިތައް ނަގާފައިވެ އެވެ.

ކުނި ބޭނުންކޮށްގެން ހިއްކާފައި އޮތް ތިލަފުށީގައި މިދިޔަ އަހަރު ކުނި އެންދުން ހުއްޓާލި އެވެ. އޭގެ ފަހުން، މިހާރު އެ ރަށުގައި ކުނި މެނޭޖުކުރަމުން އަންނަ ޒަމާނީ އާ ވަސީލަތްތައް ބޭނުންކޮށްގެންނެވެ.