ވޯލްޑް ކަޕްގެ "އެންމެ ރީތި ފޭން" ރާއްޖޭގައި

މިދިޔަ އަހަރު ގަތަރުގައި ބޭއްވި ވޯލްޑް ކަޕްގައި ބޮޑު ސަމާލުކަމެއް ހޯދި ކްރޮއޭޝިއާގެ މޮޑެލް އިވާނާ ކޮނޯލް ޗުއްޓީއަށް ރާއްޖެ އަތުވެއްޖެ އެވެ.

އުމުރުން 30 އަހަރުގެ އިވާނާ އޭނާގެ އިންސްޓަގްރާމްގައި ރާއްޖޭގެ ރިސޯޓެއްގައި ނަގާފައި ހުރި ފޮޓޯތަކެއް އިއްޔެ ޕޯސްޓުކޮށްފައިވެ އެވެ. އެއީ ކޮން ރިސޯޓެއް ކަމެއް އެނގޭކަށް ނެތެވެ.

ވޯލްޑްކަޕުގައި އޭނާ މަޝްހޫރު ވެފައިވަނީ "އެންމެ ރީތި ފޭން" ގެ ގޮތުގަ އެވެ. އޭނާގެ ގައުމުގެ ދިދަ ރަމްޒުކޮށްދޭ ކުރު ޓޮޕްތަކެއް ލައިގެން ގައުމީ ޓީމަށް ސަޕޯޓުކުރަން ދަނޑަށް ގޮސް ހުރި ފޮޓޯތައް އޭރު މުޅި ސޯޝަލް މީޑިއާގައި ވަނީ ވައިރަލް ވެފަ އެވެ.

އެ ފޮޓޯތައް މައްސަލަގަނޑަކަށް ވެ އެއްބަޔަކު ދެކޮޅަށް އަޑު އުފުލި އެވެ. އެއީ ގަތަރުގައި ހުއްދަ ނޫން މިންވަރަށް އޭނާ ނިވާކަން ކުޑަކޮށް ހުންނާތީ އެވެ.

ވޯލްޑް ކަޕަށް ފަހު އިވާނާ އަށް ވަނީ މިލިއަނުން އިންސްޓަގްރާމް ފޮލޯވަރުން އިތުރުވެފަ އެވެ. މުބާރާތުގެ ކުރިން މިލިއަނަކާ ގާތްކުރާ ވަރަށް ވެސް ފޮލޮވަރުން ނެތް އިވާނާގެ އިންސްޓަގްރާމަށް ފޮލޯކުރާ މީހުންގެ އަދަދު މިހާރު އުޅެނީ 3.6 މިލިއަންގަ އެވެ.