ހަރުކަށި މީހުން ވަކިން ބަންދު ކުރާ ވިންގްގެ މަސައްކަތް ޖުލައިގައި ނިމޭނެ: އިމްރާން

މާފުށީ ޖަލުގައި ބަންދުކުރާ ހަރުކަށި ފިކުރުގެ މީހުން ވަކިން ބައިތިއްބޭނެ ވިންގެއް ޖަލުގައި ގާއިމު ކުރުމުގެ މަސައްކަތް މި އަހަރުގެ މެދުތެރޭގައި ނިންމޭނެ ކަމަށް ހޯމް މިނިސްޓަރު އިމްރާން އަބްދުﷲ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން އިމްރާން ވިދާޅުވީ، ޖަލުތަކުގައި ހަރުކަށި ފިކުރު ފެތުރުން ހުއްޓުވުމަށް ބައިނަލްއަގުވާމީ އެހީތެރިކަމާއި ރާއްޖޭގެ އެންޖީއޯތަކާ ގުޅިގެން ގިނަ މަސައްކަތްތަކެއް ކުރަމުން އަންނަ ކަމަށެވެ.

މި ސަރުކާރުން ވެރިކަމާ ހަވާލުވި އިރު ތަފާތު ކުށްތައް ކުރާ މީހުން ކެޓަގަރައިޒް ކުރުމެއް ނޯންނަ ކަމަށް އިމްރާން ވިދާޅުވި އެވެ. ނަމަވެސް މިހާރު ވަކިން ހާއްސަކޮށް ހަރުކަށި ފިކުރުގެ ގައިދީން އެސެސް ކުރާނެ ވަސީލަތްތައް ގާއިމްކޮށް، އެސެސްކޮށް އެހެން ގައިދީންނާ ވަކިން ބައިތިއްބޭނެ މަސައްކަތް ކުރަމުން އަންނަ ކަމަށް އިމްރާން ވިދާޅުވި އެވެ.

"އެފަދަ ފަރާތްތަކުގެ ފަރާތުން މުޅި ޖަލުގެ ނިޒާމާ ކުރިމަތިވާ ގޮންޖެހުންތަކުން އަރައިގަތުމަށް ސީދާ އެފަދަ ފަރާތްތައް ބައިތިއްބާނެ ހައި ސެކިއުރިޓީ ވިންގެއްގެ މަސައްކަތް މާފުށީ ޖަލުގައި މިހާރު ދަނީ ކުރިޔަށް. މި އަހަރުގެ ޖޫން، ޖުލައި ހިސާބުގައި ވިންގް ނިންމާލެވޭނެ،" އިމްރާން ވިދާޅުވި އެވެ.

އެ މަސައްކަތް ކުރުމަށް ސިންގަޕޫރު ފަދަ ގައުމުތަކުން ހަދާފައިވާ ޑިޒައިންތައް ޑިވެލޮޕް ކުރުމުގެ މަސައްކަތް ކުރަމުން އަންނަ ކަމަށް އިމްރާން ވިދާޅުވި އެވެ. ނަމަވެސް އެ ގައުމުގެ ފެސިލިޓީ ހަދާފައި ވަނީ 50 މިލިއަން ޑޮލަރު ހަރަދު ކޮށްގެން ކަމަށާއި ރާއްޖެ އަށް އެ މަސައްކަތް ކުރަން ލިބުނީ 35 މިލިއަން ދިވެހި ރުފިޔާ ކަމަށް އިމްރާޏް ވިދާޅުވި އެވެ.

"ދެން ބައްލަވާ އަޅުގަނޑުމެން ގެންނަން ޖެހޭނެ ގޮތް. އެހެން ނަމަވެވެސް ރާއްޖޭގެ މާލީ ތަނަވަސްކަން ހުރި މިންވަރަށް ބަލާފައި އިރާދަކުރެވިއްޔާ އެފަދަ ފަރާތްތައް ގެންގުޅޭނެ އެކަށީގެންވާ ވަރުގެ ފެސިލިޓީއަކަށް ބަދަލުވާނެ،" އިމްރާން ވިދާޅުވި އެވެ.

މިދިޔަ އަހަރުގެ ތެރޭގައި ހޯމް މިނިސްޓްރީ އާއި ޓްރާންސްޕޭރަންސީ މޯލްޑިވްސް ގުޅިގެން ވަނީ ރާއްޖޭގެ ޖަލުތަކުގައި ހަރުކަށި ފިކުރުގެ ހާލަތު އޮތް މިންވަރާ ގުޅޭ ދިރާސާއެއް ހަދައިފަ އެވެ.

އެ ދިރާސާގެ ރިޕޯޓުގައިވާ ގޮތުން، އެހެން ގައިދީންނާ ހަރުކަށި ފިކުރު މީހުން އެއް ތަނެއްގައި ބަންދު ކޮށްފައި ހުންނާތީ އެ މީހުންގެ ނުފޫޒު އެހެން ގައިދީންނަށް ފޯރުވަ އެވެ. މީހުން ސިކުނޑި ދޮވެ، ދީނީ ގޮތުން ނުބައި މައުލޫމާތުތަކެއް ދީ ނުރައްކާތެރި ކުށްތަކަށް އަރައިގަތުމަށް ހިތްވަރު ދެމުން އަންނަ ކަމަށް ވެސް އެ ރިޕޯޓުގައި ބުނެފައި ވެ އެވެ.