ޔުނިވާސިޓީތަކުގެ އިދާރީ މުވައްޒަފުންގެ މުސާރަ 35 ޕަސެންޓަށް ބޮޑުވާނެ: ސަރުކާރު

ޔުނިވާސިޓީ މުވައްޒަފުންގެ މުސާރައަށް ގެނައި ބަދަލާއެކު، އެތަންތަނުގައި މަސައްކަތް ކުރާ އިދާރީ މުވައްޒަފުންގެ މުސާރަ 35 ޕަސެންޓަށް ބޮޑުވާނެ ކަމަށް ސަރުކާރުން މިއަދު ބުނެފި އެވެ.

ޔުނިވާސިޓީ މުވައްޒަފުންގެ މުސާރައަށް އައި ބަދަލާ ގުޅޭ ގޮތުން ނޫސްވެރިންނަށް މައުލޫމާތު ދިނުމަށް މިއަދު ހެނދުނު ރައީސް އޮފީހުގައި ބޭއްވި ނިއުސް ބްރީފިންގައި ފިނޭންސް މިނިސްޓަރު އިބްރާހިމް އަމީރު ވިދާޅުވީ، ދައުލަތުގެ އެހެން އޮފީސްތަކުގައި ވެސް އިދާރީ މުވައްޒަފުންނަށް މުސާރައިގެ ކުރިއެރުން ދިނުމަށް ޕްލޭންކޮށްފައިވާ ގޮތަށް، ޔުނިވާސިޓީތަކުގެ އިދާރީ މުވައްޒަފުންގެ މުސާރައަށް ވެސް ބަދަލު އަންނާނެ ކަމަށެވެ.

"މި ހުރިހާ މުވައްޒަފުންނަކީ ވެސް ކުރިއަށް އޮތް ތަނުގައި ދައުލަތުގެ ޕޭ ފްރޭމްވޯކަށް ބަދަލުވާނެ މުވައްޒަފުން. ދައުލަތުގެ ޕޭ ފްރޭމްވޯކަށް ބަދަލުވާއިރު ދައުލަތުގެ ހުރިހާ ފަންތިއެއްގެ މުވައްޒަފުން ވެސް އެ ހަމައެއްގައި ހިމެނޭ،" އަމީރު ވިދާޅުވި އެވެ.

ފިނޭންސް މިނިސްޓްރީން އާއްމުކުރި ބައެއް ތަފްސީލްތައް

• ގައުމީ ޔުނިވާސިޓީގައި އިދާރީ މުވައްޒަފުންގެ ގޮތުގައި 376 މުވައްޒަފުން މަސައްކަތް ކުރޭ.

• އިސްލާމިކް ޔުނިވާސިޓީގައި އިދާރީ މުވައްޒަފުންގެ ގޮތުގައި 64 މުވައްޒަފުން މަސައްކަތް ކުރޭ.

• އިދާރީ މުވައްޒަފުންނަށް ދައުލަތުގެ ބަޖެޓުން މަހަކު ޖުމްލަ 951،973ރ. ހަރަދުވާނެ.

• އެއީ އަހަރަކު 11.3 މިލިއަން ރުފިޔާ.

މިނިސްޓަރު އަމީރު ގޮތުގައި، ގައުމީ ޔުނިވާސިޓީ އާއި އިސްލާމިކް ޔުނިވާސިޓީ އަދި ޕޮލިޓެކްނިކްގެ މުވައްޒަފުންގެ މުސާރައަށް މި މަހުން ފެށިގެން ގެނައި މި ބަދަލާ އެކު، ޖުމްލަ 767 މުވައްޒަފުންގެ މުސާރަ ބޮޑުވާނެ އެވެ.

ފިނޭންސް މިނިސްޓްރީން ބުނީ ޔުނިވަސިޓީތަކުގެ މުވައްޒަފުންގެ މުސާރައަށް ގެނައި ބަދަލާ އެކު، ދައުލަތުގެ ބަޖެޓުން އަހަރަކު މުޅި ޖުމްލަ 62.5 މިލިއަން ރުފިޔާ ހަރަދުވާނެ ކަމަށެވެ. އެއީ ކުރީގައި އެކަމަށް ހޭދަކުރާ ބެޖެޓާ އަޅާ ބަލާއިރު، 5.2 މިލިއަން ރުފިޔާގެ އިތުރުވުމެކެވެ.

ނަމަވެސް، މާޗުން ފެށިގެން މުސާރަ ބޮޑުކުރުމުން މި އަހަރު ދައުލަތުގެ ބަޖެޓުން އެކަމަށް ހޭދަވާނީ މުޅި ޖުމްލަ 52 މިލިއަން ރުފިޔާ ކަމަށް މިނިސްޓްރީން ބުންޏެވެ.