މަނަދޫގައި ސީސީޓީވީ ކެމެރާ ހަރުކޮށްދޭނެ ބަޔަކު ހޯދަނީ

ނ. މަނަދޫގެ އެކި ސަރަހައްދުތަކުގައި ސެކިއުރިޓީ ކެމެރާ ހަރުކޮށްދޭނެ ބަޔަކު ހޯދަން އެ ރަށު ކައުންސިލުން މިއަދު އިއުލާންކޮށްފި އެވެ.

އެ ރަށު ކައުންސިލްގެ އިއުލާނުގައި ބުނީ ކައުންސިލުން ދޭ މައުލޫމާތާ އެއްގޮތަށް ރަަށުގެ އެކި ސަރަޙައްދުތަކުގައި ސެކިއުރިޓީ ކެމެރާ ހަރުކޮށްދޭނެ ބަޔަކު ހޯދަން ބޭނުންވާ ކަމަށެވެ. އެކަމަށް ޝައުގުވެރިވާ ފަރާތްތަކުން އެ އިދާރާއަށް އަންދާސީ ހިސާބު ހުށަހެޅުމަށް އިއުލާނުގައި ބުންޏެވެ.

މި މަސައްކަތް ކުރުމަށް ބިޑް ހުށަހެޅުމަށް އެދިފައި ވަނީ މި މަހު 27 ގެ ކުރިންނެވެ.

މަނަދޫގައި ސީސީޓީވީ ހަރުކުރާނެ ބަޔަކު ހޯދަން އިއުލާންކުރި އިރުގައި، މިދިޔަ ހުކުރު ދުވަހު އެ ރަށުގައި ވަރަށް އަނިޔާވެރި ގޮތަކަށް މަރާލާފައި އޮތް އަންހެނަކު ވަނީ ފެނިފަ އެވެ.

އެ ކައުންސިލްގެ ރައީސް އަބްދުއްރަހުމާން ސަބީހު "މިހާރު" އަށް މަނަދޫގެ އެކި ތަންތަނުގައި ސީސީޓީވީ ހަރުކުރުމަކީ މީގެ އަހަރެއްހާ ދުވަސްކުރިން ކައުންސިލުން ޕްލޭން ކުރަމުން އަންނަ ކަމެއް ކަމަށެވެ.

"ރައްޔިތުންގެ ސަލާމަތާ ރައްކާތެރިކަމަށް އަޅުގަނޑުމެން ކުރަން ރާވާފައި އޮތް ކަމެއް ކުރިން ވެސް. ދެން އެކަމަކު މިކަން [މީހަކު މަރާލުން] ހިނގީމަ މިއީ އަވަސްކުރަން ވެއްޖެ ކަމެއް ކަމަށް ފެންނާތީ މިއަދު އިއުލާންކުރީ،" އޭނާ ވިދާޅުވި އެވެ.

އޭނާ ވިދާޅުވި ގޮތުގައި، ސީސީޓީވީ ހަރުކުރުމުގެ މަސައްކަތް ކުރަން ރޭވިފައި އޮތީ ތިން ފިޔަވައްސަށް ބަހާލައިގެންނެވެ. ފުރަތަމަ ފިޔަވަހީގައި ރަށުގެ ބަނދަރާއި ކައިރި ސަރަހައްދުތަކުގައި ކެމެރާ ހަރުކުރާނެ އެވެ. އަދި ދެން އޮތް ފިޔަވަހިތަކުގައި ރަށުގެ އެހެން ތަންތަނުގައި ކެމެރާ ހަރުކުރާނެ އެވެ.

އެކަނި ދިރިއުޅެމުން އައި ނައީމާ މަރާލާފައި އޮއްވާ ފެނުނީ އޭނާގެ ހަބަރެއް ނުވެގެން ފުލުހުން އެގޭގެ ދޮރު ވައްޓާލައިގެން ވަދެ ބެލި އިރެވެ. އޭނާ ފެނުނުއިރު ހަށިގަނޑުގައި ބޮޑެތި ޒަހަމްތައް ހުއްޓެވެ. ތަހުގީގަށް ބޭނުންވާ މައުލޫމާތު ފުލުހުން ނެގުމަށް ފަހު، ނައީމާގެ ހަށިގަނޑު އިއްޔެ ހަވީރު ވަނީ އެ ރަށުގައި ވަޅުލައިފަ އެވެ.

އާންމުކޮށް މަރުގެ މައްސަލަތަކުގައި މީހުން ވަޅުލަނީ ޕޯސްޓްމޯޓަމް ހެދުމަށް ފަހު ކަމުގައި ވިޔަސް، މި މައްސަލާގައި ޕޯސްޓްމޯޓަމް ނެހެދީ ހަށިގަނޑުން ބޭނުންވާ ސާމްޕަލްތައް ލިބިފައި ވާތީ އާއި އިތުރަށް ޕޯސްޓްމޯޓަށް ހަދަން ޖެހޭ ސަބަބެއް ނެތް ކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުން ކަމަށް ފުލުހުން ބުންޏެވެ.

އެ މައްސަލަ ތަހުގީގުކުރަން ފުލުހުންގެ ހާއްސަ ޓީމެއް މާލެއިން އެ ރަށަށް ގޮސް، މިހާރު އަންނަނީ ހަރަކާތްތެރިވަމުންނެވެ. އެ މައްސަލަ ނިމެންދެން، ކައުންސިލްގެ ހުއްދަ ނެތި އެ ރަށަށް އަރައި، ފޭބުން ކައުންސިލުން ވަނީ މަނާކޮށްފަ އެވެ.