ޖާބިރުގެ ވާހަކަ ހަމައިން ނެއްޓި ނަން އިއްވައިފި

ރައްޔިތުންގެ މަޖިލިހުގެ މިއަދުގެ ޖަލްސާގައި ކާށިދޫ ދާއިރާގެ މެމްބަރު އަބްދުﷲ ޖާބިރު ވާހަކަ ދެއްކެވި އިރު، ހަމައިން ނެއްޓި ތަކެއްޗަށް ގެއްލުން ދޭން ފެށުމާ އެކު ރިޔާސަތުން އޭނާގެ ނަން އިއްވައިފި އެވެ.

ޖާބިރު ހިތްހަމަނުޖެހުނީ، މަސްވެރިކަމުގެ ސިޔާސަތުތައް ސަރުކާރަށް ތަންފީޒު ނުކުރެވޭ ކަމަށް ބުނެ، ހުށަހެޅި ގަރާރަށް ހެންވޭރު ދެކުނު ދާއިރާގެ މެމްބަރު ހުސައިން ޝަމީމް (އަނދުން ހުސެއިން) ވާހަކަ ދައްކަވަނިކޮށް ނިޒާމީ ނުކުތާއެއް ނެންގެވުމުން ރިޔާސަތުން ޖާބިރަށް ފުރުސަތު ނުދެއްވުމުންނެވެ.

މަޖިލީހުގެ ރިޔާސަތު މިއަދު ބެލެހެއްޓެވީ، ވިލުފުށީ ދާއިރާގެ މެމްބަރު ހަސަން އަފީފެވެ. އެކަމަކު، ނިޒާމީ މައްސަލަ އަށް ފުރުސަތު ނުދެއްވުމުން ޖާބިރުގެ ހިތްހަމަނުޖެހުން އަމާޒުވީ މަޖިލީހުގެ ރައީސް/ ކުރީގެ ރައީސް މުހަންމަދު ނަޝީދަށެވެ.

ނިޒާމީ މައްސަލަ ނެންގެވުމުން ޖާބިރަށް ފުރުސަތު ނުދެއްވީ، އަފީފު ވިދާޅުވި ގޮތުގައި ދެން ވާހަކަ ދައްކަވަން ފުރުސަތު އޮތީ ޖާބިރަށް ކަމަށް ވާތީ އާއި ނިޒާމީ ކަމެއް ހިނގާފައި ނެތް ކަމަށެވެ.

ޖާބިރު ވާހަކަ ފައްޓަވައި، މަޖިލީހުގެ ރައީސަށް ވަރަށް ބޮޑަށް ފާޑުވިދާޅުވެ ބޭއަދަބީ ބަސްތައް ވިދާޅުވި އެވެ. އެހެންވެ، ޖާބިރުގެ ވާހަކަތައް ރިޔާސަތުން ހުއްޓުވި އެވެ. އަދި އެކަހަލަ ބަސްތައް މަޖިލީހުގެ އެއްވެސް މެމްބަރަކު އަނެއް މެމްބަރަކާ ދިމާއަށް ވިދާޅުނުވެވޭނެ ކަމަށް އަފީފު ވިދާޅުވި އެވެ.

މަޖިލީހުގައި ބޭއަދަބީ ބަހެއް ވިދާޅުވި ކަމަށް ޖާބިރު އިންކާރު ކުރެއްވި އެވެ. އަދި، "އައުގުރާނައިގެ" ލިސްޓެއް ހަދާފައި ފޮނުވަންވީނޫންތޯ އޭނާ ރިޔާސަތާ ސުވާލު ކުރެއްވި އެވެ.

ޖާބިރު ވިދާޅުވީ އެ ގޮނޑީގައި ނަޝީދަށް ނީންނެވޭނެ ކަމަށާއި އެކަމަކު އެ މަގާމަށް ގަލޮޅު އުތުރު ދާއިރާގެ އީވާ އަބްދުﷲ ގެންނަން އޭނާ ތާއީދު ކުރައްވާ ކަމަށެވެ. އަދި ރައީސް އިބްރާހިމް މުހަންމަދު ސޯލިހު ދެން އަންނަ ދައުރަކަށް ހޮވާނެ ކަމަށް އޭނާ ތަކުރާރުކޮށް ވިދާޅުވި އެވެެ.

ޖާބިރު ވިދާޅުވީ އޭނާ އަށް މި މަޖިލީހުގައި ބޭނުން ކޮންމެ ވާހަކައެއް ވެސް ދެއްކޭނެ ކަމަށެވެ. އޭނާގެ އަތުން ފައިސާ ނަގައިގެން މަޖިލީހުގެ ރައީސް ކަމަށް ނަޝީދު ވަޑައިގެން އެ މަގާމުގައި ދެމި ނުހުރެވޭނެ ކަމަށާއި އެތަނުން ވަކިވާންޖެހޭނެ ކަމަށް އޭނާ ވިދާޅުވި އެވެ.

ވަގުތު ހަމަވެގެން ދިޔަ ފަހުން ވެސް ޖާބިރު ވާހަކަ ދައްކަވަމުން ގެންދެވި އެވެ. އަދި، މާފަންނު މެދު ދާއިރާގެ އިބްރާހިމް ރަޝީދު (ބޮންޑޭ) ވާހަކަ ކުރިއަށް ގެންދަވަނިކޮށް ހަޅޭއްވައި، ރިޔާސަތުގެ ކުރިމައްޗަށް ހުއްޓި ވަޑައިގެން ވެސް އަޑު ގަދަ ކުރެއްވި އެވެ. އަދި ބޮންޑޭ ވާހަކަ ދައްކަވަމުން ދަނިކޮށް ޖާބިރު އޭނާ ކައިރިއަށް ވަޑައިގެން މައިކް ވެސް ވައްޓާލަ އެވެ.

ރިޔާސަތުން ޖާބިރުގެ ނަން އިއްވެވީ އެހެންވެ އެވެ. އެކަމަކު، ނަން އިއްވުމާ އެކު ޖާބިރު އަމިއްލަ އަށް ނުކުމެވަޑައިގަތެވެ.

ޖާބިރު އިށީނދެވަޑައިގަންނަވާ ގޮނޑި ކައިރީގައި އަދި އޭގެ ފަހުން މަޖިލީހުގެ ތެރޭގައި ވެސް އަޑުގަދަ ކުރެއްވި އެވެ.