ރޮޒައިނާ އާއި އަނދުން ހުސައިނާ ހެދި ނަޝީދަށް ނުރައްކާ އޮތް ކަމަށް ތުހުމަތުކޮށް ޕޮލިހަށް

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ބޮމުގެ ހަމަލާއާ ގުޅިގެން ސެކިއުރިޓީ ވަރުގަދަކޮށްފައި ވަނިކޮށް، އެކަމާ ދެކޮޅަށް މަޖިލީހުގެ މީދޫ ދާއިރާގެ މެމްބަރު ރޮޒައިނާ އާދަމާއި ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) ވާހަކަ ދެއްކެވުމަކީ އިތުރު ހަމަލާއެއްގެ ބިރު އޮތް ކަމެއް ކަމަށް ބުނެ މައްސަލަ ޕޮލިހަށް ހުށަހަޅައިފި އެވެ.

ނަޝީދަށް އިތުރު ހަމަލާއެއް ދޭން ދުރާލައި ރާވަމުންދާ ކަމަށް ތުހުމަތު ކުރައްވައި މައްސަލަ ހުށަހެޅުއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެވެ.

އެ ސިޓީގައި އިންތި ވިދާޅުވީ ބޮމެއް ގޮއްވާލައި ފުރާނަ ނުރައްކަލަކަށް ހުށަހެޅުނު ނަޝީދަށް ދައުލަތުން ފޯރުކޮށްދޭން މަޖުބޫރުވި ސެކިއުރިޓީ ހުއްޓާލަން ބާރުއަޅައި ރޮޒައިނާ އާއި އަނދުން ހުސެއިން ތަކުރާރުކޮށް ގެންދަވަނީ ވާހަކަ ދައްކަވަމުން ކަމަށެވެ.

އޭނާ އިޝާރާތް ކުރެއްވީ ދައުލަތުން ބޮޑު ހޭދައެއްކުރައްވާ ވެރިއަކު ރައްޔިތުންނަށް ގެއްލުންވާ ގޮތަށް އަމަލުކުރައްވާ ކަމަށް ވިދާޅުވެ، މަޖިލީހުގައި ރޮޒައިނާ އާއި އަނދުން ހުސެއިން ދައްކަވާ ވާހަކަތަކަށެވެ. ދައުލަތުން ނަޝީދަށް ހޭދަކުރައްވާ ފައިސާގެ އަދަދުގެ ތަފްސީލްތަކާ ހަވާލާދެއްވައި އަނދުން ހުސެއިން ވަނީ ވަރަށް ބޮޑަށް ފާޑުވިދާޅުވެފަ އެވެ.

ނަޝީދުގެ ސެކިއުރިޓީއާ ހަމައަށް ބަހުގެ ހަމަލާތައް ބަދަލުވީ، މަޖިލީހުގައި ހިމެނިވަޑައިގަންނަވާ ރައީސް އިބްރާހިމް މުހައްމަދު ސޯލިހްގެ މެމްބަރުންނާއި ނަޝީދުގެ އަރިސް މެމްބަރުން، ހިމެނޭ "ފިކުރެއްގެ ދިރުމުގެ" އަރައިރުންވުންތަކުގެ ތެރޭގަ އެވެ.

ފުލުުހަށް ހުށަހެޅި މައްސަލާގައި އިންތި ވިދާޅުވީ ނަޝީދަށް އަމާޒުކުރި ޓެރަރިސްޓް ހަމަލައާ ގުޅިގެން މިހާތަނަށް އިންސާފު ނުލިބި ވަނިކޮށް، ނުފޫޒުގަދަ އެ ދެ މެމްބަރުން އެގޮތަށް ވާހަކަ ދެއްކެވުމަކީ ކަންބޮޑުވުމެއް ކަމަށެވެ. އެ މައްސަލަ މޮނިޓާކުރަން ރައީސް އިބްރާހިމް މުހައްމަދު ސޯލިހް ކަނޑައެޅުއްވި މަންދޫބު، އައްބާސް ފާއިޒް ވެސް މައްސަލަ ލަސްވާތީ ކަންބޮޑުވުން ފާޅުކުރެއްވި ކަމަށް ވިދާޅުވި އެވެ.

"އެ ނުރައްކާތެރި ހަމަލާ ރައްދުކޮށްފައި ވަނީ ރައީސް މުހައްމަދު ނަޝީދުގެ ހަށިކޮޅަށް ނުރައްކާ އޮތް މިންވަރު "ކްރިޓިކަލް" ލެވެލްގައި ވަނިކޮށް އެ ހަމަލާއިން ރައްކާތެރިކަން ފޯރުކޮށްނުދެވުމުންކަން އިންކުއަރީ ރިޕޯޓުން އެނގެ އެވެ،" ފުލުސް އޮފީހަށް އިންތި ހުށަހެޅުއްވި ސިޓީގައި ވެ އެވެ.

މިހެން އޮއްވައި ނަޝީދަށް ސެކިއުރިޓީ ފޯރުކޮށްދިނުމާ ދެކޮޅަށް 241 ކޮމިޓީގެ ނައިބު މުގައްރިރު، އަނދުން ހުސެއިނާއި ރޮޒައިނާ އެކި ފޯރަމްތަކުގައި ވާހަކަ ދެއްކެވުމަކީ ނުބައި ރޭވުމެއް އޮތް ކަމެއް ކަމަށް އިންތި ވިދާޅުވި އެވެ.

އެ ސިޓީގައި އިންތި ވިދާޅުވީ ސަރުކާރާ ގުޅުން އޮންނަ އަދި ނުފޫޒު ގަދަ މަގާމްތަކުގައި ތިއްބެވި ދެ ބޭފުޅުންނަކީ ނަޝީދާ މެދު މަތީ ދަރަޖައެއްގެ ރުޅިވެރިކަމާއި ނަފްރަތު އޮންނަކަން އެނގޭ ގޮތަށް ބަސްތައް ރައްދުކުރައްވަމުން ގެންދަވާ ދެ ބޭފުޅުން ކަމަށެވެ.

"... އަދި އެގޮތަށް ވާހަކަފުޅު އެ ދައްކަވަނީ އެމަނިކުފާނުގެ ސެކިއުރިޓީ ދަށްކުރެއްވުމުގެ ބޭނުންފުޅުގައި ކަމަށް ގަބޫލުކުރެވެ އެވެ. އަދި އެ މަގުން މަސައްކަތް ކުރައްވައި، ސެކިއުރިޓީ ދަށްކުރުން އެ ބޭފުޅުންނަށް ކާމިޔާބުވެއްޖެ ނަމަ އެމަނިކުފާނު އިތުރު ނުރައްކަލަކަށް ހުށަހެޅިގެންދާނެ ކަން އެ ބޭފުޅުންނަށް ޔަގީންވާތީ ކަމަށް ގަބޫލުކުރެވެ އެވެ،" ސިޓީގައިވެ އެވެ.

އިންތި އެދިވަޑައިގަތީ އެކަމުގެ ހަގީގަތް ބައްލަވައި ޖިނާއީ އަމަލެއް އެކުލެވޭ ނަމަ އެކަން ތަހުގީގު ކޮށްދެއްވުމަށެވެ.