ކުށްކުރާ މީހުންނާ އެއް ފެންވަރަށް މުއައްސާތައް ކުރިއަރަން ޖެހޭ: ނައިބު ރައީސް

ކުށްކުރާ ފަރާތްތަކާ އެއް މިންވަރަށް ޖިނާއީ އަދުލުގެ ނިޒާމުގައި ހިމެނޭ މުއައްސަސާތައް ވެސް ކުރިއަރަން ޖެހޭނެ ކަމަށް ނައިބު ރައީސް ފައިސަލް ނަސީމް މިއަދު ވިދާޅުވެއްޖެ އެވެ.

ޖިނާއީ އަދުލުގެ ނިޒާމާބެހޭ މަތީ ފެންވަރުގެ ކޮންފަރެންސް ފެށުމަށް މިއަދު މާލޭގައި ބޭއްވި ޖަލްސާ ޝަރަފްވެރިކޮށް ދެއްވައި، ވާހަކަފުޅު ދައްކަވަމުން ނައިބު ރައީސް ވިދާޅުވި ކުށްކުރާ މީހުންގެ ވައްޓަފާޅި ބަދަލުވެ، ވަރަށް ބޮޑަށް ކުރިއަރައިގެން ގޮސްފައިވާ ކަމަށެވެ. އެހެންވެ، ޖިނާއީ އަދުލުގެ ނިޒާމުގެ މުއައްސަސާތަކާއި ޝަރުއީ ނިޒާމު ވެސް އެ ފެންވަރަށް ކުރިއަރައިގެން ދާން ޖެހޭނެ ކަމަށް އެ މަނިކުފާނު ވިދާޅުވި އެވެ.

"ކުށްކުރުމުގެ ވައްޓަފާޅި އާއި ކުށްކުރާ ގޮތް ވަރަށް ތަފާތު. އެހެންވީމާ އެ މީހުންނާ އަރާ އެބަ ހަމަ ކުރަންޖެހޭ. އެކަން ވެސް ހޯދަން އެބަޖެހޭ. ހަމައެއާ އެކު ޝަރުއީ ދާއިރާގެ ތަމްރީނާ އަރާ ހަމަކުރުމަކީ އަޕްޓޭޑްވުން." ނައިބު ރައީސް ވިދާޅުވި އެވެ.

ނައިބު ރައީސް ވިދާޅުވީ ބަޔަކު ދެކެ ހިތްހަމަނުޖެހުމެއް އޮތުމަކީ އެ ބަޔަކާ މެދު ބޭއިންސާފުން ކަންކަން ޖެހޭ ސަބަބެއް ނޫން ކަމަށާއި އަދުލު އިންސާފު ގާއިމްކުރުމަކީ ދީނީ ގޮތުން އޮތް ބޮޑު އަމާނާތެއް ކަމަށް އެ މަނިކުފާނު ވިދާޅުވި އެވެ. އަދި ސަރުކާރުން ވަރަށް ބޮޑަށް އިސްކަން ދޭ ކަމަށް އެމަނިކުފާނު ވިދާޅުވި އެވެ،

"ހިތްހަމަނުޖެހުމެއް އޮންނަ އޮތުމަކީ އެއީ އެ މީހަކަށް އިންސާފު ނުވަތަ އަދުލުވެރިކަމާއެކު ކަންތައްތައް ކުރިއަށް ނުގެންދަން ޖެހޭ ސަބަބެއް ކަމުގައި ދެކިގެން ނުވާނެ." ނައިބު ރައީސް ވިދާޅުވި އެވެ.

ނައިބު ރައީސް ވިދާޅުވީ ރާއްޖެފަދަ ކުޑަ މުޖްތަމައުއެއްގައި ކުށްކުރާ ގިނަ މީހުންނަކީ އާއިލީ ގޮތުން ނުވަތަ ކޮންމެވެސް ގޮތަކުން ގާތްކަމެއް އޮތް ބަޔަކަށް ވިޔަސް، ތަފާތު ކުރުމެއް ނެތި އިންސާފު ގާއިމްވާން ޖެހޭނެކަން ގަބޫލު ކުރަން ޖެހޭ ކަމަށެވެ. އަދި އިންސާފު ލިބުމަކީ އެންމެންގެ ހައްގެއް ކަމަށް އެ މަނިކުފާނު ވިދާޅުވި އެވެ.

"އަޅުގަނޑުމެން ގަބޫލު ކުރަން ޖެހޭނެ އެ މީހާ ކުށެއް ކޮށްފައި އޮތް ކަމަށް ވަންޏާ އެއީ މާ ދެރަ ކަމެއް. އޭގެ ސަބަބުން އާއިލާއަކަށް ނުވަތަ ބަޔަކަށް ކުރާ އަސަރު މާ ބޮޑުވާނެ." ޖިނާއީ އަދުލުގެ ނިޒާމުގައި ތަފާތު ނުކުރުމުގެ މުހިންމު ކަން ފާހަގަ ކުރައްވައި، ނައިބު ރައީސް ވިދާޅުވި އެވެ.

ނައިބު ރައީސް ވިދާޅުވި ގޮތުގައި އަދުލު އިންސާފުގެ ދާއިރާ ހަރުދަނާ ކުރަން ސަރުކާރުން ގިނަ މަސައްކަތްތަކެއްކޮށް، ގިނަ ކުރިއެރުންތަކެއް ހޯދިފައިވެ އެވެ.

އެ ރަސްމިއްޔާތުގައި ނައިބު ރައީސް ވަނީ ޖިނާއީ އަދުލުގެ ނިޒާމުގައި ހިމެނޭ މުއައްސަސާތަކުގެ މެދުގައި ފަސޭހައިން މައުލޫމާތު ބަދަލު ކުރެވޭ ކްރިމިނަލް ޖަސްޓިސް ޑާޓާ ބޭސްއެއް އިފްތިތާހުކޮށް ދެއްވައިފަ އެވެ. އެ ޑޭޓާ ބޭސްގައި މުހިންމު މައުލޫމާތުތައް އާންމުންނަށް ވެސް ފެންނަން ހުންނާނެ އެވެ.