ޖަޕާނާއި އިނގިރޭސިން ހީރޯޝީމާ މުއާހަދާ ގާއިމުކުރަނީ

ސަލާމަތާއި ރައްކާތެރިކަމުގެ ދާއިރާ އިން ދެ ގައުމުގެ ދެމެދުގައި އިތުރަށް ގުޅުން ބަދަހިކުރުމުގެ ގޮތުން، "ހީރޯޝީމާ މުއާހަދާ"ގެ ނަމުގައި އެއްބަސްވުމެއް ގާއިމުކުރުމަށް، އިނގިރޭސި ވިލާތާއި ޖަޕާނުން ނިންމައިފި އެވެ.

ޖަޕާނުގެ ހޯރީޝީމާގައި މިއަދު ސޮއިކުރަން ހަމަޖެހިފައިވާ މުއާހަދާގައި އިނގިރޭސި ވިލާތުގެ ފަރާތުން ސޮއިކުރައްވާނީ ބޮޑުވަޒީރު ރިޝީ ސުނަކް އަދި ޖަޕާނުގެ ފަރާތުން އެ ގައުމުގެ ބޮޑުވަޒީރު ފުމިއޯ ކިޝީޑާ އެވެ. މި މުއާހަދާގެ ދަށުން ކުރުމަށް ހަމަޖެހިފައިވާ އެންމެ މުހިންމު އެއް ކަމަކީ، އިނގިރޭސި ވިލާތުން ކުރިން އެއްބަސްވުފައިވާ ގޮތުގެ މަތިން، އެ ގައުމުގެ ހަނގުރާމަމަތީ މަތިންދާބޯޓު އުފުލާ މަނަވަރު އެކުލެވޭ ކަނޑުގެ ލަޝްކަރެއް އިންޑޯ-ޕެސިފިކް ސަރަހައްދަށް ފޮނުވުމެވެ.

އޭގެ އިތުރުން ދެ ގައުމުގެ އަސްކަރިއްޔާ އިން ގުޅިގެން ބާއްވަމުން އަންނަ އަސްކަރީ ތަމްރީންތަކުގައި ބައިވެރިކުރާ އިނގިރޭސި ސިފައިންގެ އަދަދު ކުރިމަގުގައި އިތުރުކުރުން، މި މުއާހަދާގައި ހިމެނެ އެވެ.

ވިޔަފާރި އާއި އިންވެސްޓްމެންޓްގެ ދާއިރާ އިން ވެސް ދެ ގައުމުގެ ދެމެދުގައި ގުޅުން ބަދަހިކުރުމަށް މި މުއާހަދާ އިން ބާރުއަޅަ އެވެ. އޭގެ އިތުރުން ސައެންސާއި ޓެކްނޮލޮޖީގެ ދާއިރާއިންނާއި، ތިމާވެށީގެ މައްސަލަތައް ފަދަ، ބައިނަލްއަގުވާމީ މުޖްތަމައުގެ މަސްލަހަތާ ގުޅިފައިވާ ކަންކަމުގައި ދެ ގައުމުން އެއްބާރުލުމަށް ވެސް މި މުއާދާއިން މަގުފަހިވާނެ އެވެ.

މިއަދު ސޮއިކުރާ މުއާހަދާއާ ބެހޭ ގޮތުން، އިނގިރޭސި ބޮޑުވަޒީރު ރިޝީ ސުނަކް ނެރުއްވި ބަޔާނެއްގައި ވިދާޅުވެފައިވަނީ ހީރޯޝީމާ މުއާހަދާއަކީ ދެ ގައުމުގެ ހަތިޔާރު އެޅި ލަޝްކަރުތަކުގެ މެދުގައި އެއްބާރުލުން އުފައްދައިދޭނެ މުއާހަދާއެއް ކަމަށެވެ. އޭގެ އިތުރުން، ދެ ގައުމުގެ އިގްތިސާދު ކުރިއެރުވުމާއި ސައެންސާއި ޓެކްނޮލޮޖީގެ ދާއިރާއިން ދެ ގައުމުގެ މެދުގައި ތަޖުރިބާ ހިއްސާކުރުމަށް ވެސް މި މުއާހަދާ އިން ބާރުއަޅައިދޭ ކަމަށް ވެސް ރިޝީ ސުނަކް ވިދާޅުވި އެވެ.

މި މުއާހަދާގައި ސޮއި ކުރުމަށް ހަމަޖެހިފައިވަނީ، މާދަމާ ހީރޯޝީމާގައި ފަށާ ޖީ7 (ގްރޫޕް އޮފް ސެވަން)ގެ ގައުމުތަކުގެ އެންމެ އިސް ވެރިންގެ މަހާސިންތާގައި ބައިވެރިވެވަޑައިގަތުމަށް، އިނގިރޭސި ބޮޑުވަޒީރު ރިޝީ ސުނަކް ޖަޕާނަށް ކުރައްވާ ދަތުރުފުޅުގަ އެވެ. އެ މަހާސިންތާގައި ބައިވެރިވުމަށް ރިޝީ ސުންކަ މިއަދު ހެނދުނު ޖަޕާނުގެ ވެރިރަށް ޓޯކިޔޯ އަށް ވަޑައިގެން، ޖަޕާނުގެ އެންމެ މަޝްހޫރު ވިޔަފާރިވެރިންނާ އެކުގައި މިއަދު ހެނދުނު ވަނީ ބައްދަލުވުންތަކެއް ބާއްވައިފަ އެވެ.

އިނގިރޭސި ވިލާތާއި ޖަޕާނާ ދެމެދު އަސްކަރީ ގޮތުންނާއި ސަލާމަތީ ދާއިރާއިން ގުޅުން ބަދަހިކުރަމުން ދާއިރު، އުތުރު ކޮރެއާގެ މިސައިލް އަޖުމަބެލުންތަކުގެ ސަބަބުން ޖަޕާނާއި ދެކުނު ކޮރެއާ ދަނީ ކަންބޮޑުވުން ފާޅުކުރަމުންނެވެ. އޭގެ އިތުރުން އެ ސަރަހައްދުގައި ޗައިނާގެ ސިޔާސީ އަދި އަސްކަރީ ނުފޫޒު ފަތުރަމުން ދާތީ، އެކަމާ ވެސް ޖަޕާނާއި ދެކުނު ކޮރެއާ ކަންބޮޑުވެ އެވެ.