ރަހީނުކުރި މައްސަލާގައި ހައްޔަރުކުރި މީހާ ބަންދަށް، ކުޑަކުއްޖާ އާއިލާއާ ހަވާލުކޮށްފި

މާލޭގައި ގެއެއްގެ ތެރޭގައި ތިން މީހަކު ރަހީނުކޮށްގެން ގެންގުޅުނު މައްސަލާގައި ހައްޔަރުކުރި މީހާ ބަންދުކޮށް، އެ މައްސަލާގައި ހައްޔަރުކުރި ކުޑަކުއްޖާ އޭނާގެ އާއިލާއާ މިއަދު ހަވާލުކޮށްފި އެވެ.

ފުލުހުން ބުނީ އެ މައްސަލާގައި ހައްޔަރުކުރި މީހާގެ ބަންދަށް ކްރިމިނަލް ކޯޓުން މިއަދު 15 ދުވަސް ދީފައިވާ ކަމަށެވެ. އަދި ކުޑަކުއްޖާ އާއިލާއާ ހަވާލުކުރީ ކަމަށް ފުލުހުން ބުންޏެވެ.

އެނގިފައިވާ ގޮތުގައި، ހެންވޭރު އަބަދަށްއުފާ މަގުގައި ހުރި ގެއެއްގައި ރަހީނުކޮށްގެން ގެންގުޅެނިކޮށް އިއްޔެ ސަލާމަތްކުރި މީހުންގެ މައްސަލަ ގުޅެނީ މަސްތުވާތަކެއްޗާ އެވެ. އެކަމަކު، އެ މައްސަލައާ ގުޅޭ އިތުރު ތަފުސީލެއް އަދިވެސް ނުލިބެ އެވެ.

ފުލުހުން އިއްޔެ ބުނީ މާލޭގައި ގެއެއްގައި ބަޔަކު ރަހީނުކޮށްގެން ގެންގުޅޭ ކަމުގެ މައުލޫމާތު ލިބިގެން ފުލުހުން އެތަނަށް ގޮސް އެ ގެއަށް ވަނީ ބާރުގެ ބޭނުންކޮށްގެން ކަމަށެވެ.

ރަހީނުކޮށްގެން އެ ގޭގައި ގެންގުޅުނީ ދިވެހި ތިން ފިރިހެނުންނެވެ. އެ މީހުން ސަލާމަތްކޮށް، ފަރުވާއަށް ހޮސްޕިޓަލަށް ގެންދިޔަ ކަމަށް ވެސް ފުލުހުން ބުންޏެވެ. ފުލުހުން ބުނި ގޮތުގައި ރަހީނުކޮށްފައި ތިބި އިރު އެ މީހުންނަށް ވަނީ އަނިޔާ ވެސް ކޮށްފަ އެވެ.