Roadha Mihaaru
ރަހީނުކުރުމުގައި ފްލެޓުގެ ވެރިމީހާ ބައިވެރިވި: ޕޮލިސް

ރަހީނުކުރުމުގައި ފްލެޓުގެ ވެރިމީހާ ބައިވެރިވި، މަސްތުވާތަކެއްޗަށް ޕޮޒިޓިވް: ޕޮލިސް

14 ނޮވެމްބަރ 2024

މިދިޔަ ބުރާސްފަތި ދުވަހުގެ ރޭ ހިޔާ ފްލެޓެއްގެ ތެރޭގައި މީހަކު ރަހީނުކޮށްގެން އަނިޔާކުރި މީހުންގެ ތެރޭގައި އެ ފްލެޓްގެ ވެރިޔާ ވެސް ހުރި ކަމަށާއި އޭނާ މަސްތުވާތަކެއްޗަށް ޕޮޒިޓިވް ކަމަށް ފުލުހުން ބުނެފި އެވެ.

މާއިދާ މުހައްމަދު ރަޝާދު މާއިދާ މުހައްމަދު ރަޝާދު

މިދިޔަ ބުރާސްފަތި ދުވަހުގެ ރޭ ހިޔާ ފްލެޓެއްގެ ތެރޭގައި މީހަކު ރަހީނުކޮށްގެން އަނިޔާކުރި މީހުންގެ ތެރޭގައި އެ ފްލެޓްގެ ވެރިޔާ ވެސް ހުރި ކަމަށާއި އޭނާ މަސްތުވާތަކެއްޗަށް ޕޮޒިޓިވް ކަމަށް ފުލުހުން ބުނެފި އެވެ.

ފުލުހުން ބަލަމުން އަންނަ މައްސަލަތަކާ ގުޅިގެން އިސްކަންދަރުކޮށީގައި ބޭއްވި ޕްރެސް ކޮންފަރެންސްގައި، ރަހީނުކުރި މައްސަލައިގެ ތަފްސީލް ދެމުން ފުލުހުން ބުނީ އެ ފްލެޓަކީ މަސްތުވާތަކެތީގެ މައްސަލައެއްގައި ކުރިން ވެސް ބަލައިފާސްކުރި ތަނެއް ކަމަށެވެ. މި ފަހުން އެ ތަނުގައި މީހަކު ރަހީނުކުރީ ވެސް އެފަދަ މައްސަލައެއްގައި ކަމަށް މިހާތަނަށް ބެލެވޭ ކަމަށެވެ.

އެޕާޓްމެންޓުގެ ވެރިޔާއާ އެކު 12 މީހުން މި މައްސަލާގައި ވަނީ ހައްޔަރުކޮށްފަ އެވެ.

އެ ޕްރެސް ކޮންފަރެންސްގައި، ހުޅުމާލޭގެ ސީރިއަސް ކްރައިމް ޑިޕާޓްމަންޓްގެ ހެޑް އަދި ސްޕްރިންޓެންޑެންޓް އޮފް ޕޮލިސް އަހުމަދު ސާމީ ވިދާޅުވީ މީހަކު ރަހީނުކޮށްގެން ފްލެޓެއްގައި ގެންގުޅޭ ކަމުގެ ރިޕޯޓު ލިބުނީ ބުރާސްފަތި ދުވަހުގެ ރޭ 7:50 ހާއިރު ކަމަށެވެ.

އެ ވަގުތުން ފެށިގެން ރަހީނުކޮށްގެން އެ މީހާ ގެންގުޅޭ ޓަވަރާއި އެޕާޓްމަންޓު ހޯދަން ގިނަ މަސައްކަތްތަކެއް ފުލުހުން ކޮށްފައިވާ ކަމަށް ސާމީ ވިދާޅުވި އެވެ.

ރަހީނުކުރި މީހާ ގެންދިޔަ ތަން ފުލުުހުން ހޯދީ ސީސީޓީވީ ފޫޓޭޖު ބަލައިގެންނެވެ. އޭނާ ބަންދުކުރީ އެޗް9ގެ 20 ވަނަ ފްލޯގެ 11 ވަނަ އެޕާޓްމަންޓުގަ އެވެ.

ތަޅު ހަލާކުކޮށްލައިގެން ފުލުހުން އެތަނަށް ވަތްއިރު، ރަަހީނުކޮށްފައި ހުރި މީހާ އިނީ ބޯ ބާލާފައި ކަމަށާއި އޭރު ތައްޔާރުވަމުން ދިޔައީ އިނގިލި ބުރިކޮށްލަން ކަމަށް ފުލުހުން ބުންޏެވެ.

ސާމީ ވިދާޅުވި ގޮތުގައި އަނިޔާގެ ސަބަބުން އެ މީހާ ހުރީ ނަފްސާނީ ގޮތުން ވަރަށް ބޮޑަށް އަސަރުކޮށްފަ އެވެ. އޭނާ ރައްކާތެރި މާހައުލަށް ގެންގޮސް، ކައުންސިލިން ވެސް ދީފައިވާ ކަމަށް ވެސް ސާމީ ވިދާޅުވި އެވެ.

އެތަނުން ފެނުނު ބައެއް ބަނގުރާ ފުޅި.

އެތަނުން ފެނުނު ބައެއް ބަނގުރާ ފުޅި.

އެ ކޭސްގެ ތަފްސީލް ދެއްވި، ސީރިއަސް އެންޑް ހައި އިމްޕެކްޓް ކްރައިމް ޔުނިޓުގެ އިންސްޕެކްޓަރު އަލީ އިސްމާއިލް ވިދާޅުވީ ހިޔާގެ އެޕާޓްމަންޓަށް ފުލުހުން ވަތް އިރު 12 މީހުން ތިބި ކަމަށެވެ. އެ މީހުން ތިބީ މަސްތުގެ ހާލަތުގައި ކަމަށް ބެލެވިގެން އެ މީހުންގެ ޔޫރިން ޓެސްޓް ނެގުމަށް މަސައްކަތްކުރި ނަމަވެސް އެކަމަށް ހުއްދަ ދިނީ އެންމެ މީހެކެވެ.

އެއީ އެ ފްލެޓް ލިބިފައިވާ ލ. މާވަށް، ޖަމީލާ މަންޒިލް، އާދަމް ހުސެއިން އެވެ. އޭނާގެ ޔޫރިން މަސްތުވާތަކެއްޗަށް ޕޮޒިޓިވް ކަމަށް ފުލުހުން ބުންޏެވެ.

ހިޔާ ފްލެޓެއްގެ ތެރޭގައި މީހަކު ރަހީނުކުރި މައްސަލާގައި ހައްޔަރުކުރި 12 މީހުން.---ފޮޓޯ: ޕޮލިސް

ހިޔާ ފްލެޓެއްގެ ތެރޭގައި މީހަކު ރަހީނުކުރި މައްސަލާގައި ހައްޔަރުކުރި 12 މީހުން.---ފޮޓޯ: ޕޮލިސް

އަލީ އިސްމާއިލް ވިދާޅުވި ގޮތުގައި އެ ތަނުން ހޯދާފައިވާ ތަކެތީގެ ތެރޭގައި ކަތުރާއި ޓްރިމަރާއި ކިވީ ބްރޭންޑުގެ ހަތަރު އިންޗި ވަޅި އަކާއި ކަޓަރެއް ވެސް ހިމެނެ އެވެ.

ކޯޓު އަމުރެއްގެ ދަށުން އެތަން ބަލައިފާސްކުރި އިރު މަސްތުވާތަކެތި ހުރި ގާތްގަނޑަކަށް 28 ރަބަރު ޕެކެޓް ފެނިފައިވެ އެވެ. އަދި ފިލްމު ހުސްކުރި ދަޅުގައި މަސްތުވާތަކެތި ފެނިފައިވާއިރު 11 ފުޅި ބަނގުރާ ވެސް ފެނުނެވެ.

ފުލުހުން ބުނި ގޮތުގައި 16،700 ރުފިޔާ އާއި ވިކްޓިމްގެ ފޯނު ވެސް އެތަނުން ފެނުނެވެ.