ލޯފަން މީހުންނަށް ދެން އަމިއްލައަށް ވޯޓު ލެވޭނެ!

ލޯފަން މީހުންނަށް އިތުރު މީހެއްގެ އެހީތެރިކަމާ ނުލައި ވޯޓުލެވޭ ގޮތް ހަދަން އިންތިހާބުތަކާ ބެހޭ އާންމު ގާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސް އިބްރާހިމް މުހައްމަދު ސޯލިހު ތަސްދީގުކުރައްވައިފި އެވެ.

ރައީސް އޮފީހުން ބުނީ އިންތިހާބުތަކާ ބެހޭ ގާނޫނަށް ގެނައި އިސްލާހުގެ ބިލު ރައީސް ތަސްދީގުކުރެއްވީ މިދިޔަ ބުދަ ދުވަހު ކަމަށެވެ.

އެ ބިލަށް ގެނައި މައިގަނޑު އިސްލާހަކީ ލޯފަން މީހުންނަށް އިތުރު މީހެއްގެ އެހީތެރިކަމާ ނުލައި ވޯޓުލެވޭ ގޮތް ހެދުމާއި ރިޔާސީ އިންތިހާބަށް ކުރިމަތިލުމަށް އެދޭ މީހުން އެކަމަށް އެދި އިލެކްޝަންސް ކޮމިޝަނަށް ހުށައެޅުމަށް ކުރިން ދީފައި އޮންނަ 10 ދުވަހުގެ މުއްދަތު 14 ދުވަހަށް އިތުރުކުރުމެވެ.

މިދިޔަ ހޯމަ ދުވަހު ރައްޔިތުންގެ މަޖިލީހުން މި ބިލު ފާސްކުރީ 51 މެމްބަރުންގެ އިއްތިފާގުންނެވެ.

މި ގެނައި އިސްލާހުތަކަށް އަމަލުކުރަން ފެށުމާ ގުޅިގެން އީސީގެ ނައިބް ރައީސް އިސްމާއިލް ހަބީބް ކުރެއްވި ޓުވީޓެއްގައި ވިދާޅުވީ ޓެމްޕްލޭޓެއް ބޭނުންކޮށްގެން، ލޯފަން މީހުން އަމިއްލައަށް ވޯޓުލުމަށް އިންތިހާބުތަކާ ބެހޭ އާންމު ގާނޫނަށް ގެނެވުނު އިސްލާހަކީ، ހަމަހަމަކަމާއެކު ވޯޓުދިނުމުގެ ހައްގު އަދާކުރުމަށް އެޅުނު ވަރަށް މުހިންމު ފިޔަވަޅެއް ކަމަށެވެ.

މިއީ އިންތިހާބީ ނިޒާމަށް ލިބުނު ވަރަށް ބޮޑު ކުރިއެރުމެއް ކަމަށް ވެސް އޭނާ ވިދާޅުވި އެވެ.

"މިކަމާ ގުޅިގެން ކުރަން ޖެހޭ މަސައްކަތްތަކަށް އީސީ އިން ވަނީ ތައްޔާރު ވެފަ އެވެ. އަދި ހޭލުންތެރިކަން އިތުރުކުރުމަށް ކުރަން ޖެހޭ މަސައްކަތްތައް ކުރުމަށް ގުޅުންހުރި މުއައްސަސާތަކާއެކު މަޝްވަރާ ފެށިފައި ވެ އެވެ،" ހަބީބްގެ ޓުވީޓްގައި ވެ އެވެ.

މި ގެނައި އިސްލާހާއެކު ލޯފަން މީހުން ވޯޓުލުމަށް ބޭނުންކުރާނީ ވޯޓު ކަރުދާހުގެ ތެރެއަށް ލައިގެން ނުވަތަ ވޯޓު ކަރުދާހުގެ މަތީގައި ވަގުތީ ގޮތުން ހަރުކޮށްގެން، ވޯޓުލެވޭ ގޮތަށް ތައްޔާރުކޮށްފައިވާ އެތެރެ ފެންނަ ޕްލާސްޓިކް ޑިވައިސެކެވެ. އެ ޕްލާސްޓިކް ޓެމްޕްލޭޓްގައި ވޯޓު ދިނުމަށްޓަކައި ފާހަގަ ޖަހަން ޖެހޭ ގޮޅިއާ ދިމާލުގައި ފާހަގަ ޖެހޭ ގޮތަށް ކެނޑުމެއް ހިމެނޭނެ އެވެ.

ލޯފަން މީހުންގެ ވޯޓުގެ ސިއްރު ނުހިފެހެއްޓޭ ކަމުގެ ޝަކުވާ އަބަދުވެސް އޮވެ އެވެ. އެކަމަށް ހައްލެއް ގެނައުމަށް ބްލައިންޑް އެސޯސިއޭޝަނުން ވަނީ އެކި ފަހަރު މަތިން ރާއްޖޭގެ އެކި މުއައްސަސާތަކާއި ރައްޔިތުންގެ މަޖިލިހުގެ މިނިވަން މުއައްސަސާތަކާ ބެހޭ ކޮމިޓީއާ ވެސް ބައްދަލުކޮށް، ޝަކުވާތައް ހިއްސާކޮށްފަ އެވެ.