ސާފް ޗެމްޕިއަންޝިޕްގައި ދަގަނޑޭގެ ރެކޯޑާ ޗެތުރީ އެއްވަރު ކޮށްފި، އެކަމު ކުވެއިތު ބައްޔެއް ނުކުރެވުނު

ސާފް ބަންގަބަންދު ޗެމްޕިއަންޝިޕް 2023 ގައި އިންޑިއާ ގުރޫޕް ސްޓޭޖުގެ ފަހު މެޗުގައި 1-1 އިން ކުވެއިތާ އެއްވަރުވި މެޗުގައި ގޯލު ޖަހައި ކެޕްޓަން ސުނިލް ޗެތުރީ ރާއްޖޭގެ އަލީ އަޝްފާގު (ދަގަނޑޭ) ހަދާފައިވާ ރެކޯޑާ ހަމަކޮށްފި އެވެ.

އަނިޔާގެ ސަބަބުން މި މުބާރާތުގައި ވާދަކުރާ ރާއްޖޭގެ ގައުމީ ޓީމުގައި ނުހިމެނޭ އަޝްފާގަކީ ސާފް ޗެމްޕިއަންޝިޕް މުބާރާތުގައި މުޅި އެކު 23 ގޯލު ޖަހައިގެން މުބާރާތުގައި މިހާތަނަށް އެންމެ ގިނަ ގޯލު ޖަހާފައިވާ ކުޅުންތެރިޔާ އެވެ. މިރޭ ޗެތުރީ ކާމިޔާބު ކުރި ގޯލާ އެކު އޭނާ ވެސް ވަނީ މުޅި އެކު 23 ގޯލު ހަމަ ކޮށްފަ އެވެ.

ފުރަތަމަ ހާފު ނިމެނިކޮށް ކޯނަރަކުން ހުރަސްވި ބޯޅައެއް ގޯލަށް ފޮނުވާލައިގެން ޗެތުރީ ކާމިޔާބު ކުރި ގޯލަކީ އޭނާ ގައުމީ ޓީމަށް ޖަހައިދިން 92 ވަނަ ގޯލެވެ. އަދި މި މުބާރާތުގައި އޭނާ ކާމިޔާބު ކުރި ފަސްވަނަ ގޯލެވެ. ފުރަތަމަ މެޗުގައި ޕާކިސްތާނާ ދެކޮޅަށް ތިން ގޯލު ޖަހައި ހެޓްރިކް ފުރިހަމަ ކުރި ޗެތުރީ ވަނީ ދެވަނަ މެޗުގައި ނޭޕާލް ކޮޅަށް ވެސް ގޯލެއް ޖަހައިފަ އެވެ.

ކުވެއިތުން ގޯލު ޖެހީ މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ އަށް މިނިޓުގެ ތެރެއިން ދެވަނަ މިނިޓުގެ ތެރޭގަ އެވެ. މިއީ ކުވެއިތުގެ އަބްދުﷲ އަލްބްލޯޝީ ފޮނުވާލި ބޯޅައެއް އިންޑިއާގެ ޑިފެންޑަރު އަންވަރު އަލީ ފައިގައި ޖެހިފައި ބައިކޮޅަށް ވަން ގޯލެކެވެ.

ފަހު ވަގުތު އެއްވަރު ވުމުން އިންޑިއާ އަށް ގުރޫޕްގެ ދެވަނަ

އިންޑިއާ އާއި ކުވެއިތު ވެސް ވަނީ ގުރޫޕް ސްޓޭޖުގެ ފުރަތަމަ ދެ މެޗު ކާމިޔާބު ކޮށްގެން ސެމީ ފައިނަލްގެ ޖާގަ ޔަގީން ކޮށްފަ އެވެ. މިރޭގެ މެޗު އެއްވަރު ވުމުން ގުރޫޕްގެ އެއްވަނަ ލިބުނީ ކުވެއިތަށެވެ. އެއީ ގޯލުގެ ތަފާތުން ދެ ޓީމު ވެސް އެއްވަރުވެ، ޖެހި ގޯލުން ކުވެއިތަށް ކުރި ލިބޭތީ އެވެ.

ކުވެއިތުން ޖެހި ގޯލަކީ އިންޑިއާ ކޮޅަށް މިއަހަރު މިހާތަނަށް އެޓީމު ކުޅުނު ނުވަ މެޗުން ވަން ފުރަތަމަ ގޯލެވެ. ނުވަ މެޗުގެ ތެރެއިން ދެ މެޗު އެއްވަރު ވެފައި ވާއިރު ހަތް މެޗުން ވަނީ މޮޅުވެފަ އެވެ.

ސެމީ ފައިނަލްގައި އިންޑިއާ ކުޅެން ޖެހޭނީ ރާއްޖެ ހިމެނޭ ގުރޫޕް ބީގެ އެއްވަނަ ހޯދާ ޓީމަކާ ދެކޮޅަށެވެ. ކުވެއިތު ނުކުންނާނީ ގުރޫޕް ބީގެ ދެވަނަ ޓީމާ ދެކޮޅަށެވެ.

ފުރަތަމަ މެޗުގައި ޕާކިސްތާނާ ދެކޮޅަށް ކުޅުނު މެޗުގައި ރަތް ކާޑު ދެއްކި އިންޑިއާގެ ހެޑް ކޯޗު އީގޯ ސްޓިމަކް ވަނީ އޭނާގެ ސަސްޕެންޝަން ފުރިހަމަކޮށް، މިރޭގެ މެޗުގައި ބެންޗުން ޓީމަށް އިރުޝާދު ދިނުމުގެ ފުރުސަތު ހޯދައިފަ އެވެ. މި މެޗުގެ ފުރަތަމަ ހާފުގައި ކޯޗަށް ރީނދޫ ކާޑެއް ދައްކާފައި ވާއިރު، މެޗު ނިމެން 10 މިނިޓަށް ވެފައި ވަނިކޮށް އޭނާ އަށް ވަނީ އަނެއްކާ ވެސް ރަތް ކާޑެއް ދައްކައި ބެންޗުން ފޮނުވާލައިފަ އެވެ.

މެޗުގެ އެންމެ ފަހު މިނިޓުގައި ދެ ޓީމުގެ ކުޅުންތެރިންގެ މެދުގައި ހިނގި ހަމަނުޖެހުންތަކާ ގުޅިގެން އިންޑިއާގެ ރަހީމް އަލީ އާއި ކުވެއިތުގެ ހަމަދު އަލްގައްލާފް އަށް ވެސް ވަނީ ރެފްރީ ރަތް ކާޑު ދައްކައިފަ އެވެ.