އެއާ އެންބިއުލެންސެއްގައި ހަފީޒު ބޭރަށް ގެންދަން އެހީ ހޯދަނީ

މާލޭގެ މަގުމަތިން ބާރު ސްޕީޑުގައި ދުއްވި ސައިކަލުން ޖެހި އަނިޔާވި ގައުމީ ޔުނިވާސިޓީ ލެކްޗަރާ އަލީ ހަފީޒް، އިތުރު ފަރުވާއަށް ރާއްޖެއިން ބޭރަށް ގެންދިއުމަށް އާއިލާއިން އެހީ ހޯދަން ފަށައިފި އެވެ.

ހަފީޒްގެ ބައެއް ގާތް މީހުން ބުނި ގޮތުގައި، އޭނާގެ ހާލު އަދިވެސް ވަރަށް ސީރިއަސް އެވެ. އޭނާއަށް ފަރުވާދެމުން އަންނަނީ އޭޑީކޭގެ އައިސީޔޫގަ އެވެ. އެކްސިޑެންޓްވި ދުވަހުން ފެށިގެން މިއަދާ ހަމައަށް ވެސް އޭނާގެ ހާލަތަށް ބަދަލެއް ނާދެ އެވެ.

އޭނާގެ ހާލު ދެރަކަމުން ކޮމާޝަލް ފްލައިޓެއްގައި ރާއްޖެއިން ބޭރަށް އިތުރު ފަރުވާއަށް ގެންދެވޭކަށް ނެތެވެ. އެހެންވެ، އާއިލާއިން މިހާރު މަސައްކަތް ކުރަމުން އަންނަނީ އެއާ އެންބިއުލެންސެއްގައި އޭނާ އިންޑިއާއަށް ގެންދިއުމަށް ކަމަށް އެނގިފައިވެ އެވެ. އެއީ ވަރަށް އަގުބޮޑު ހިދުމަތެކެވެ.

އެއާ އެމްބިއުލެންސްގައި ބޭރަށް ގެންދަން ގާތްގަނޑަކަށް 42،500 ޑޮލަރު (ގާތްގަނޑަކަށް 655،000ރ.) ހޭދަވާނެ ކަމަށް މިހާތަނަށް ލަފާކުރެވެ އެވެ.

ތައުލީމީ ދާއިރާއަށް 18 އަހަރަށް ވުރެ ގިނަ ދުވަހު ހިދުމަތްކޮށްދެއްވާފައިވާ ހަފީޒްގެ ބައެއް ރައްޓެހިންނާއި އާއިލާއިން ވެސް އަންނަނީ އެހީ ހޯދުމުގެ މަސައްކަތް ކުރަމުންނެވެ.

މިދިޔަ ބުދަ ދުވަހު އެ އެކްސިޑެންޓް ހިނގީ، ހަފީޒް ފަތިސްނަމާދުން ފައިބައިގެން މަޖީދީމަގުން ހިނގާފައި ދަނިކޮށް މަގުމަތިން ބާރު ސްޕީޑުގައި ދުއްވި ސައިކަލުން ޖެހި އެވެ.

ފުލުހުން ބުނީ ސައިކަލް ދުއްވި 22 އަހަރުގެ މީހާއަކީ ލައިސަންސް އޮންނަ މީހެއް ނޫން ކަމަށެވެ. އެ އެކްސިޑެންޓަށް ފަހު އޭނާ ނުފިލާ ކަމަށާއި އޭނާއަށް ވެސް އަނިޔާވެގެން ފަރުވާދިން ކަމަށް ފުލުހުން ބުންޏެވެ.